მაგიდასთან დაძაბულობაა - საწერ კალამს ატრიალებს კაცი, რომელმაც უნდა გადაწყვიტოს, დაუჯეროს თუ არა საკუთარ ინტუიციას. მას არ აქვს ფურცელი, რის გამოც ის იღებს მიმტანის მოტანილ ხელსახოცს და იწყებს წერას...ასე იწყებოდა ფეხბურთის ისტორიაში უდიდესი ეპოქა, ლეო მესის ეპოქა.
ფეხბურთში ხშირად ვხვდებით ამბებს, რომლებიც ჰგავს დიდ ეკრანზე გადასაღებ სიუჟეტებს, თუმცა არგენტინელი შემტევის ისტორია იმდენად იშვიათია, რომ თითქოს ზღაპარივით არის. ბარსელონას მომავალი ყველა დროის საუკეთესო მოთამაშის პირველი კონტრაქტის უკან არ იდგა ოფიციალური დოკუმენტები, ყველაფერი დაიწყო იმით, რომ ხელშეკრულება ლაქების საწმენდ ხელსახოცზე დაიწერა.
პატარა ბიჭი როსარიოდან
მესი დაიბადა 1987 წელს არგენტინაში, ქალაქ როსარიოში. ის ბავშვობიდანვე ყველას აკვირვებდა ბურთის ფლობითა და თამაშის წაკითხვის საოცარი უნარით. არგენტინელ ბავშვს უწინასწარმეტყველებდნენ დიდ მომავალს, მაგრამ არსებობდა ერთი პრობლემა: ჰორმონალური ზრდის დეფიციტი.
დიაგნოზმა ყველაფერი შეცვალა. ექიმების თქმით, ლიონელს სჭირდებოდა რეგულარული მკურნალობა - ინიექციები, რომელიც იმ დროს ათას დოლარზე მეტი ღირდა. ოჯახს არ ჰქონდა ასეთი თანხა, ბარსას მომავალი ფლეიმეიქერის ოცნება საფრთხის ქვეშ დადგა. ერთადერთი გზა იყო ისეთი კლუბის პოვნა, რომელიც კატალონიელთა მომავალი მე-10 ნომრის მკურნალობას საკუთარ თავზე აიღებდა.
ბარსელონა - პირველი შთაბეჭდილება
2000 წელს, მესის მამა, ხორხე, შვილთან ერთად ევროპაში გაემგზავრა იმ იმედით, რომ რომელიმე გუნდი ბავშვის უსაზღვრო პოტენციალს დაინახავდა. რამდენიმე კლუბმა თქვა უარი, მაგრამ არა ბარსას ლეგენდარულმა ვინგერმა და იმ დროს უკვე სკაუტმა, კარლეს რეშაკმა, რომელსაც ტალანტების აღმოჩენა ძალიან კარგად ეხერხებოდა.
ესპანელმა სელექციონერმა პირველად მაშინ დაინახა არგენტინელი მოზარდი, როდესაც ის ლა მასიაში საცდელ ვარჯიშზე მივიდა. მინიატურული, ჩუმი ბიჭი ბურთით ისეთ რაღაცებს აკეთებდა, რაც პროფესიონალსაც კი გაუჭირდებოდა. კატალონიელთა სკაუტი მომენტალურად მიხვდა: "ეს არის!".
სპონტანური გადაწყვეტილება
რეშაკის ენთუზიაზმის მიუხედავად, ბარსელონას ხელმძღვანელობა სკეპტიკურად იყო განწყობილი. "ვართ თუ არა მზად, ვალდებულება ავიღოთ მესის მკურნალობაზე?“ - ეს კითხვა იდგა დღის წესრიგში. დრო გადიოდა, თინეიჯერი ფეხბურთელის მშობლებს მოთმინება ეწურებოდათ, ესპანელი სკაუტი პანიკაში იყო.
კარლესი ხორხეს შეხვდა კაფეში, მასთან ერთად იყვნენ კატალონიური გუნდის წარმომადგენლებიც. მესი უფროსი უკმაყოფილო იყო იმ ფაქტით, რომ "ბლაუგრანას" უფროსობა წელავდა დროს და კონკრეტულ პასუხს არ იძლეოდა. დაძაბულობის განმუხტვის მიზნით ინიციატივა საკუთარ თავზე აიღო კამპ ნოუს ბინადრების სკაუტმა, რომელიც ხელშეკრულების გასაფორმებლად მზად იყო.
იმ მომენტში არავის ჰქონდა თან ფურცელი, რის გამოც რეშაკმა კონტრაქტი ხელსახოცზე გააფორმა. დოკუმენტის შინაარსი იყო ასეთი - "ვადასტურებთ, რომ ვთანხმდებით ლიონელ მესისთან შეთანხმების დადებაზე იმ პირობებით, რაც მიღწეულია ხორხე მესისა და კარლეს რეშაკს შორის".
ესპანელმა სელექციონერმა საკუთარ თავზე აიღო არგენტინელი მოზარდის მკურნალობა - განვითარების საკითხი და როგორც დრომ აჩვენა, ბარსასთვის მან საუკეთესო გადაწყვეტილება მიიღო. წლების შემდეგ, ის მინიატურული, ჩუმი, მორიდებული ბიჭი კლუბის ისტორიაში საუკეთესო მოთამაშე გახდება.
ხელსახოცი, როგორც ისტორიული დოკუმენტი
წლების განმავლობაში ეს ხელსახოცი ინახებოდა კერძო კოლექციაში. მისი ღირებულება იზრდებოდა - როგორც ემოციური, ისე ფინანსური თვალსაზრისით. 2024 წელს Sotheby’s-ის აუქციონზე ხელსახოცი გასაყიდად გამოიტანეს. საწყისი ფასი: 300,000 ფუნტი სტერლინგი იყო.
ძალიან მალე ის იქცა მსოფლიოს ერთ-ერთ ყველაზე გამორჩეულ საფეხბურთო დოკუმენტად - უჩვეულო და ძლიერი სიმბოლო იმისა, რომ წარმატება ყოველთვის ფორმალურ გადაწყვეტილებებში არ იბადება. ეს ისტორია მხოლოდ ფეხბურთზე არ არის. ეს არის ისტორია ინტუიციაზე: როცა გრძნობ, რომ რაღაც განსაკუთრებული გაქვს წინ.
ისტორია სწრაფ გადაწყვეტილებაზე – როცა ფურცელი არ გაქვს, თუმცა იცი, რომ უნდა იმოქმედო. ისტორია რწმენაზე – პატარა ბიჭზე, რომელსაც ხმამაღლა საუბარიც უჭირდა, მაგრამ ბურთით მან მთელი სამყარო მოაჯადოვა.
