ლუკა მოდრიჩის წასვლის შემდეგ, მადრიდის რეალს ახალი ათიანი ეყოლება. ლეგენდარულმა გამთამაშებელმა ესპანურ გუნდში შექმნა მთელი ეპოქა და "სამეფო კლუბი" დატოვა თავაწეულმა, ყველაზე ტიტულოვანი ფეხბურთელის სტატუსით. დგება ახალი მე-10 ნომრის ჯერი და ასეთი ბერნაბეუს ბინადრებისთვის კილიან მბაპე იქნება.
ჩაბი ალონსოს გუნდის თავდამსხმელის წინაშე დგას საინტერესო გამოწვევა - ის უნდა გახდეს პირველი დიდი ფრანგი ათიანი ევროპის ყველაზე ტიტულოვანი კლუბის ისტორიაში. დიახ, რეალს ჰყოლია არაერთი ლეგენდარული მე-10 ნომერი, მაგალითისთვის ზემოთხსენებული ხორვატი ფლეიმეიქერი თუნდაც.
მილანის ახალწვეული გამთამაშებლის გარდა, ასევე ფერენც პუშკაში, მიქაელ ლაუდრუპი, ლუიშ ფიგუ, კლარენს ზეედორფი, უესლი სნეიდერი, მესუთ იოზილი და სხვები, მაგრამ ფრანგი მათ შორის არავინ ყოფილა. უცნაურია, იმის გათვალისწინებით, რომ მადრიდში "მამლების" არაერთ ლეგენდარულ წარმომადგენელს უთამაშია.
"სამეფო კლუბის" ფრანგ ფეხბურთელებზე პირველ რიგში გვახსენდებიან ზინედინ ზიდანი და ქარიმ ბენზემა, თუმცა ისინი სხვა ნომრებით თამაშობდნენ. ტურინის იუვენტუსის ყოფილმა გამთამაშებელმა ბერნაბეუზე მოირგო მე-5 ნომერი, რადგან იმ დროს 10 ფიგუს მიერ იყო დაკავებული.
ლიონის ოლიმპიკის აღზრდილ თავდამსხმელი კი თავიდან იყო მე-11 ნომერი, შემდეგ კი ცხრიანი.რაც შეეხებათ უშუალოდ ფრანგ ათიანებს, ასეთი რეალის ისტორიაში იყო 3: ჟან ლუსიანო (1950/51), რაიმონდ კოპა (1956/57) და ლასანა დიარა (2009/11)...ამ უკანასკნელის მე-10 ნომრით ასპარეზობა განსაკუთრებით უცნაურად ჩანდა.
რაც შეეხება კოპას, დიახ, მან მადრიდში დატოვა დიდი სახელი, თუმცა ათიანით მხოლოდ ერთი სეზონი ითამაშა. ლეგენდარული გარემარბი ხშირ შემთხვევაში მე-7 და მე-8 ნომრით ასპარეზობდა. როგორც ვხედავთ, სტატუსი "სამეფო კლუბის" დიდი ფრანგი მე-10 ნომერი, მართლაც ვაკანტურია.
შეძლებს თუ არა ამ მისიის შესრულებას პარის სენ-ჟერმენის ყველა დროის საუკეთესო ბომბარდირი? საფუძველი ნამდვილად ჩაყრილია. კარლო ანჩელოტის შეგირდებს შარშან ჰქონდათ წარუმატებელი სეზონი, მაგრამ ეს არ ითქმის ფრანგ ფორვარდზე, რომელმაც 59 შეხვედრაში 44 ბურთი შეაგდო.
ეს ყველაფერი იმის გათვალისწინებით, რომ სანტიაგო ბერნაბეუს ბინადრების ახალმა ათიანმა სადებიუტო სეზონი ჩაატარა. დიახ, "დონატელო" ყველაზე შედეგიანი ახალწვეულია რეალის ისტორიაში, ოქროს ბუცისა და პიჩიჩის ჯილდოთი თავის კოლექციაში, მაგრამ მან ეს გააკეთა მაშინ, როცა მე-9 ნომრით ასპარეზობდა.
მომავალი სეზონიდან მადრიდისა და კონკრეტულად 26 წლის თავდამსხმელისთვის იწყება ახალი ეპოქა - ახალი გამოწვევა, ახალი დამრიგებელი, ახალი ნომერი. მბაპესგან ელიან ძალიან ბევრს და "სამეფო კლუბის" ლიდერად მოიაზრებენ სწორედ მას, რაღაც მხრივ ჯუდ ბელინგემსა და ვინისიუს ჟუნიორზე მეტადაც.
არაერთხელ გვინახავს ფრანგი თავდამსხმელის დაუვიწყარი პერფომანსები ათიანით ზურგზე, თუმცა ეს ხდებოდა ნაკრებში, ახლა კი ბერნაბეუზე გაბრწყინების დრო დგება. კილიანმა თითქოს უნდა გააერთიანოს რეალის დიდი ფრანგებისა და დიდი მე-10 ნომრების მემკვიდრეობა ერთ ელემენტად.
