არსებობს მეორე მხარეც - კლუბის აღზრდილები, რომლებიც "ბლაუგრანამ" გაუშვა ნაადრევად ან სათანადოდ ვერ გამოიყენა. დღეს ვისაუბრებთ სწორედ იმ მოთამაშეებზე, რომლებმაც კარიერის საუკეთესო წლები გაატარეს არა "ლურჯ-ბროწეულისფრებში", არამედ სხვა კლუბებში.
მიკელ არტეტა
არტეტა ბარსელონას აკადემიაში ირიცხებოდა 1997-1999 წლებში და 2002 წლამდე ის ასევე სარეზერვო გუნდის წევრი იყო. მას მშობლიური კლუბის მთავარ გუნდში თამაშის ბედნიერება არასდროს ჰქონია. მიკელმა კარიერის საუკეთესო წლები გაატარა პრემიერ ლიგაში, ევერტონსა და არსენალში, სადაც 350-ზე მეტი მატჩი ჩაატარა.
არტეტა ბარსელონას აკადემიაში ირიცხებოდა 1997-1999 წლებში და 2002 წლამდე ის ასევე სარეზერვო გუნდის წევრი იყო. მას მშობლიური კლუბის მთავარ გუნდში თამაშის ბედნიერება არასდროს ჰქონია. მიკელმა კარიერის საუკეთესო წლები გაატარა პრემიერ ლიგაში, ევერტონსა და არსენალში, სადაც 350-ზე მეტი მატჩი ჩაატარა.
მარკ კუკურელია
ბარსელონას აკადემიასა და სარეზერვო გუნდში გატარებული ექვსი წლის შემდეგ, კუკურელიამ მაინც მიაღწია მთავარ გუნდამდე, თუმცა მხოლოდ ერთი მატჩით თავის აქტივში. კატალონიის შემდეგ, მარკი გაიხსნა ხეტაფესა და ბრაიტონში, დღეს კი ის უკვე ჩელსის მოთამაშეა. მისი კარიერის ყველაზე მნიშვნელოვანი ნიშნული ჯერჯერობით არის ევრო 2024, რომელზეც ის ესპანეთთან ერთად 1/2 ფინალში გავიდა.
სესკ ფაბრეგასი
მიუხედავად იმისა, რომ ფაბრეგასმა ბარსელონას მთავარ გუნდში ჩაატარა 150-ზე მეტი შეხვედრა, მასზე მაინც არ ითქმის, რომ მშობლიურმა კლუბმა ის სრულფასოვნად გამოიყენა. სესკი კატალონიელებისთვის არასდროს ყოფილა ისეთი მნიშვნელოვანი მოთამაშე, როგორიც ის იყო არსენალისა და ჩელსისთვის. ესპანელ გამთამაშებელს "ბლაუგრანაში" ძირითადად უწევდა პრობლემური ზონების ამოვსება, მაშინ, როდესაც ლონდონში ის თავის გემოზე ხატავდა.
ალექს გრიმალდო
გრიმალდო ბარსელონას სტრუქტურაში რჩებოდა 2015 წლამდე, თუმცა მთავარ გუნდამდე მან ვერ მიაღწია. მისი დიდი ფეხბურთი დაიწყო შემდგომ, უკვე ლისაბონის ბენფიკაში, სადაც მან 8 სეზონი ითამაშა. დღეს, ალექსი არის ლევერკუზენის ბაიერის მოთამაშე და ამ გუნდის საოცარი განვლილი სეზონის ერთ-ერთი მთავარი გმირი.
მაურო იკარდი
სკანდალური თავდამსხმელი, რომლის საფეხბურთო გზა 2000-იანი წლების ბოლოს სწორედ ბარსელონას აკადემიაში იწყებოდა. კარდი სერია ა-ში გაყიდეს ჯერ კიდევ მოზარდობის დროს, გენუის სამპდორიაში. კარიერის საუკეთესო წლები კი მაურომ გაატარა მილანის ინტერში, რომლის რიგებში მან 120-ზე მეტი ბურთი გაიტანა.
ტიაგო მოტა
ჟოზე მოურინიოს ინტერის უმნიშვნელოვანესი ფეხბურთელი და დღეს, ევროპის ერთ-ერთი ყველაზე პერსპექტიული მწვრთნელი. მართალია, მოტამ ბარსელონაში ჩაატარა 130-ზე მეტი მატჩი, მაგრამ მისი რეალური ძალა ვნახეთ არა მშობლიურ კლუბში, არამედ მილანურ გრანდსა და პარის სენ-ჟერმენში. არსებობს მოსაზრება, რომ ტიაგო ადრე თუ გვიან დაბრუნდება კატალონიაში, მაგრამ ამჯერად უკვე სპეციალისტის რანგში.
დანი ოლმო
კუკურელიასთან ერთად, დღევანდელი ესპანეთის ნაკრების ერთ-ერთი მთავარი გმირი. ბარსელონას აკადემიაში გატარებული შვიდი წლის შემდეგ, ოლმომ მიაშურა ზაგრების დინამოს, სადაც ის მშვიდ გარემოში ევროპის ერთ-ერთ ყველაზე პერსპექტიულ ფლეიმეიქერად ჩამოყალიბდა. დღეს, დანი არის ლაიფციგის მოთამაშე და გრანდების სასურველი სამიზნე.
ანდრე ონანა
ონანას კარიერა სავსეა აღმასვლებითა და დაღმასვლებით. ბარსელონაში ვერდამკვიდრების შემდეგ, მან საკუთარი თავი ამსტერდამის აიაქსში იპოვა. მოგვიანებით იყო დოპინგ-სკანდალი და ბანი, კარიერის რეანიმირება კი ანდრემ შეძლო ინტერში, რომელთან ერთადაც ის ჩემპიონთა ლიგის ფინალში გავიდა. დღეს, კამერუნელი კარის დარაჯი პრობლემური მანჩესტერ იუნაიტედის ღირსებას იცავს.
ჩავი სიმონსი
მიმდინარე ევროპის ჩემპიონატის კიდევ ერთი გმირი, რომელმაც ნიდერლანდების ნაკრების ნახევარფინალში გასვლაში უდიდესი როლი ითამაშა. სიმონსმა ვერ დაიმკვიდრა ადგილი ბარსელონასა და პარის სენ-ჟერმენში, კარიერის რეანიმირების პროცესი კი ლაიფციგში მოხდა. დღეს, მშობლიური კლუბი მის დაბრუნებაზე პრაქტიკულად ოცნებობს.
ტიაგო ალკანტარა
ბარსელონას მთავარ გუნდში 100-ზე მეტი შეხვედრის ჩატარების მიუხედავად, ტიაგოს სრული პოტენციალი მთავარ გუნდში ვერ ვიხილეთ. მას გახსნის მცდელობები ჰქონდა მიუნხენის ბაიერნსა და ლივერპულში, მაგრამ ხშირი ტრავმიანობა ალკანტარას თავის გემოზე თამაშის საშუალებას არ აძლევდა. ცნობისთვის, ცოტა ხნის წინ, ესპანელმა გამთამაშებელმა კარიერა დაასრულა.
ასევე გამოსარჩევია: ექტორ ბელერინი, ჟერარდ დეულოფეუ, ჯოვანი დოს სანტოსი, ლუის გარსია, დანიელ გუისა, ტაკეფუსა კუბო, ალბერტ ლუკე, ალექს მორენო, მოჰამედ ნაიმი, პეპე რეინა, ადამა ტრაორე.
