როგორც გვახსოვს, "ლომები" 2002-2008 წლების შუალედში ლიგა 1-ის ჩემპიონები ზედიზედ შვიდჯერ გახდნენ. აღნიშნული რეკორდი არის ხელუხლებელი დღემდე, მათ შორის პარის სენ-ჟერმენისთვისაც. ამ მიღწევის გარდა, გრუპამა სთეიდიუმის ბინადრები პირველ რიგში ცნობილები არიან თავიანთი აკადემიით, რომელმაც საფეხბურთო სამყაროს არაერთი დიდი ვარსკვლავი აჩუქა.
გავიხსენოთ ლიონის საუკეთესო აღზრდილები, წარსულიდან - დღემდე. სასიხარულო და საინტერესოა ის ფაქტი, რომ ამ ყველაფრის მონაწილეები ქართველი ლეგიონერებიც არიან. დიახ, გიორგი მიქაუტაძე არ არის ერთადერთი "ჯვაროსანი" ოლიმპიკის სკოლიდან. მივყვეთ თანმიმდევრულად და მიმოვიხილოთ მოთამაშეები, რომელთა გზა სწორედ რონში დაიწყო.
წარსულის ლეგენდები
"ლომების" ფუნდამენტი თავიდანვე კლუბის მიერ აღზრდილ ფეხბურთელებზე იდგა. გუნდის ყველა დროის საუკეთესო ბომბარდირი 222 გოლით არის ფლორი დი ნალო, რომელიც სწორედ ჟერლანის ბინადართა სკოლიდან არის. ცნობისთვის, მისი რეკორდის დამხობასთან ახლოს არის კლუბის სხვა აღზრდილი, მაგრამ მის შესახებ მოგვიანებით.
ლიონის ისტორიაში ყველაზე მეტი შეხვედრა (547) ჩატარებული აქვს სერჟ კიეზას, რომელიც ასევე არის აღნიშნული კლუბის ოჯახის წევრი. ლეგენდარული ფრანგი მოთამაშეები ოლიმპიკში ასპარეზოდბნენ 1960-1980 წლებში, მათ გარდა კი შეგვიძლია გამოვარჩიოთ სკანდალურად ცნობილი ბერნარ ლაკომდი, რომელმაც რონულ კლუბში 149 ბურთი გაიტანა.
რატომ სკანდალურად ცნობილი? საქმე ისაა, რომ ფრანგი თავდამსხმელი 1978 წელს "ლომებიდან" მეზობელ სენტ-ეტიენში გადავიდა. აღნიშნული გუნდების მტრობის შესახებ უკვე მოგიყევით. ზემოხსენებულ ტრიოსთან ერთად, შეგვიძლია გავიხსენოთ იური ჯორკაეფის მამა, ჟანიც, რომელიც ასევე ჟერლანიდან არის.
ლიონის აღზრდილებს შორის არის საფრანგეთის ნაკრების ყოფილი მთავარი მწვრთნელი და 2006 წლის მსოფლიო ჩემპიონატის ვიცე-ჩემპიონი, რაიმონდ დომენეკიც. აღნიშნულმა მოთამაშეებმა მშობლიურ კლუბს მიუძღვნეს 100-ეულობით მატჩი, მაგრამ ჩემპიონობამდე საქმე არასდროს მისულა. ოლიმპიკი პერიოდულად რჩებოდა საფრანგეთის ჩემპიონატის გიგანტების ჩრდილში.
დომინირება, რეკორდები და პირველი ქართველი
1990-2000 წლებში რონელებმა საფეხბურთო სამყაროს ლუდოვიკ ჟიული, ფრედერიკ კანუტე და სიდნეი გოვუ აჩუქეს. რაც შეეხება შედეგებს, 21-ე საუკუნის სტარტზე, საფრანგეთის ლიგა მთლიანად ერთი კლუბის თეატრად იქცა. როგორც აღვნიშნეთ, 2002-2008 წლებში, "ლომების" გარდა ჩემპიონი სხვა ვერავინ ხდებოდა.
ჟერლანზე ბრწყინავდა უნიჭიერესი ჰატემ ბენ არფა და კლუბის ისტორიაში ყველაზე წარმატებული აღზრდილი, ქარიმ ბენზემა. მადრიდის რეალთან ერთად ისტორიის დაწერამდე და ოქროს ბურთის მოგებამდე, ფრანგი ფორვარდის გზა სწორედ ლიონში იწყებოდა. მივადექით პირველ ქართველ მოთამაშეს ოლიმპიკის სკოლაში: ალექსანდრე გურული.
გია გურულის ვაჟი რონელების აკადემიაში ირიცხებოდა 2000-იანების დასაწყისში, 2004-2005 წლებში კი მან სარეზერვო გუნდში 17 შეხვედრა ჩაატარა. ცნობისთვის, ქართველი ვინგერის გვერდით "ლომების" ბ გუნდში ლოიკ რემიც თამაშობდა. ვინმეს შეიძლება ახსოვდეს მისი გოლიც სლოვენიის ნაკრებთან, 2010 წლის ნოემბერში გამართულ ამხანაგურ მატჩში.
მსოფლიო ჩემპიონები
1998 წლის მსოფლიო ჩემპიონატზე საფრანგეთის ნაკრების ტრიუმფმა ჩაიარა ჟერლანელების გარეშე, თუმცა რუსეთში გამართულ მუნდიალზე უკვე ისინიც იყვნენ. სამუელ უმტიტი, ნაბილ ფეკირი და კორენტინ ტოლისო - ასეთი იყო ლიონის ტრიო მსოფლიო პირველობაზე. განსაკუთრებულ ყურადღებას იმსახურებს ბარსელონას ყოფილი უკანახაზელი, რომელმაც რაფა ვარანთან ერთად, "მამლების" დაცვაში ნამდვილი გაუვალი კედელი შექმნა.
"გალიელებში" იყო იმდენად მაღალი კონკურენცია, რომ მსოფლიო ჩემპიონატის საბოლოო განაცხადში ვერ მოხვდნენ ოლიმპიკის სხვა აღზრდილები - ალექსანდრ ლაკაზეტი და ანტონი მარსიალი. იმავე დეკადაში რონელებმა საფეხბურთო სამყაროს აჩუქეს უსემ აუარი, მაქსიმ გონალონსი, კლემენტ გრენიე, ანტონი ლოპესი და სხვები.
ახალი თაობა
გრუპამა სთეიდიუმის ბინადრები საფეხბურთო სამყაროს ახლაც ამარაგებენ ახალი ვარსკვლავებით - ბრედლი ბარკოლა, მალო გუსტო, პიერ კალულუ, კასტელო ლუკება და ა.შ. ლიონის აკადემიაში სხვადასხვა დროს გამოჩენილი მოთამაშეები დღეს ევროპულ გრანდებში ასპარეზობენ. აღსანიშნავია, რომ არაერთი აღზრდილი ოლიმპიკის მთავარ გუნდშიც არის.
შეგვიძლია გავიხსენოთ რაიან შერკი, თუმცა ჩვენთვის, მთავარი ასეთი ფეხბურთელი გიორგი მიქაუტაძე არის. 2015 წელს, რონული გუნდის აკადემიასთან განშორების შემდეგ, ქართველმა ფორვარდმა მოიარა რამდენიმე კლუბი, გაიტანა 100-მდე ბურთი, მიიღო ევრო 2024-ის თანაბომბარდირის ჯილდო, შემდეგ კი სახლში დაბრუნდა.
"ლომების" აღზრდილი თავდამსხმელის გადმობირებას აქტიურად ცდილობდნენ მონაკო, ნიცა, რენი და სხვები, თუმცა ახალგაზრდა შემტევმა გადაწყვიტა დაბრუნება იქ, საიდანაც ყველაფერი დაიწყო. 24 წლის ფორვარდმა გრუპამა სთეიდიუმის ბინადრების საპატივსაცემოდ 69-ე ნომერიც კი აიღო. შეგახსენებთ, რომ აღნიშნული რიცხვი ქალაქ ლიონის სატელეფონო კოდია.
მიქაუტაძის სადებიუტო სეზონი სავსეა დაღმასვლებითა და აღმასვლებით - პირველ შეხვედრაში მან ვერგამოიყენა პენალტი, შემდეგ კი კიდევ შვიდი მატჩის მანძილზე გოლის გატანას საერთოდ ვერ ახერხებდა. ქართველმა ფორვარდმა ნავსი გატეხა ოსერთან თამაშში, თანაც პირდაპირ დუბლით! რამდენიმე მატჩის შემდეგ, ჟორჟმა გაიტანა ევროპა ლიგაზეც, კვლავ 2-ჯერ.
ოლიმპიკის ახალგაზრდა თავდამსხმელის გვერდით თამაშობენ ძველი გვარდიის წარმომადგნელებიც - ლაკაზეტი, ტოლისო და ლოპესი, რომლებიც გუნდში ერთგვარი მენტორების როლსაც ასრულებენ. განსაკუთრებით საინტერესოა 24 წლის ფორვარდის კავშირი ალექსანდრთან, რომელიც მისი კონკურენტიც არის.
ფრანგ თავდამსხმელს აქვს რონული გუნდის კაპიტნის, ლეგენდისა და ერთ-ერთი საუკეთესო ფეხბურთელის სტატუსი. მის ანგარიშზე არის 190 გოლი და დი ნალოს რეკორდის დასამხობად მას კიდევ 33 ბურთის გატანა სჭირდება. ბევრის აზრით, "ლომების" ვეტერანი ლიდერის სრულფასოვანი შემცვლელი მომავალში სწორედ საქართველოს ეროვნული გუნდის 22-ე ნომერი იქნება.
ოლიმპიკის ახალგაზრდა თავდამსხმელის გვერდით თამაშობენ ძველი გვარდიის წარმომადგნელებიც - ლაკაზეტი, ტოლისო და ლოპესი, რომლებიც გუნდში ერთგვარი მენტორების როლსაც ასრულებენ. განსაკუთრებით საინტერესოა 24 წლის ფორვარდის კავშირი ალექსანდრთან, რომელიც მისი კონკურენტიც არის.
ფრანგ თავდამსხმელს აქვს რონული გუნდის კაპიტნის, ლეგენდისა და ერთ-ერთი საუკეთესო ფეხბურთელის სტატუსი. მის ანგარიშზე არის 190 გოლი და დი ნალოს რეკორდის დასამხობად მას კიდევ 33 ბურთის გატანა სჭირდება. ბევრის აზრით, "ლომების" ვეტერანი ლიდერის სრულფასოვანი შემცვლელი მომავალში სწორედ საქართველოს ეროვნული გუნდის 22-ე ნომერი იქნება.
რატომ მომავალში და არა ახლა? გრუპამა სთეიდიუმის ბინადრების ათიანი წასვლას არ ჩქარობს. მისი მიზანი სწორედ ყველა დროის საუკეთესო გოლეადორობაა და ლიონი 33 წლის ფორვარდს ამის საშუალებას უდიდესი ალბათობით მისცემს კიდეც. თავად ვეტერანი შემტევი თვლის, რომ მიქაუტაძესთან კონკურენცია არცერთ მხარეს არ აზარალებს, პირიქით, ისინი ერთმანეთს ავსებენ.
იმედი დავიტოვოთ, რომ ოლიმპიკი შეძლებს 500-მილიონიანი დავალიანების დაფარვას, ლიგა 1-ში ადგილის შენარჩუნებას, შემდეგ კი ლაკაზეტსა და ქართველ ფორვარდს შორის ბალანსის პოვნას. რონული კლუბი სჭირდება ფრანგულ ფეხბურთს, ეს ფაქტი ჯერ კიდევ ათწლეულების წინ დამტკიცდა.
