ნანატრი გამარჯვება 15-წლიანი წარუმატებელი სერიის შემდეგ
"სქაუზერები" გასულ ოთხშაბათს გამართულ შეხვედრამდე "სამეფო კლუბის" დამარცხებას 15 წლის განმავლობაში ვერ ახერხებდნენ. აღნიშნულ გუნდებს შორის ჩატარებული იყო 8 მატჩი: 7-ჯერ მოიგო "ბლანკოსმა", ერთხელაც ფრე დაფიქსირდა. ენფილდელებმა უხერხულ მეტოქესთან წააგეს ჩემპიონთა ლიგის ფინალშიც, თანაც 2-ჯერ.
იყო შემთხვევები, როდესაც ლივერპული საკუთარ კედლებში მარცხდებოდა სამბურთიანი სხვაობითაც კი - 0:3 (22.10.2014), 2:5 (21.02.2023). ეს ყველაფერი "წითლებს" კარლო ანჩელოტის გუნდმა დამართა. ჩემპიონთა ლიგის მთავარ დომინანტთან მოგება ვერ შეძლეს იურგენ კლოპმა და ბრენდან როჯერსმა, რევანში ბერნაბეუს ბინადრებზე არნე სლოტმა აიღო.
ბევრი სკეპტიკურად უყურებდა ნიდერლანდელი მწვრთნელის მერსისაიდში დანიშნვას, თუმცა მან უმოკლეს დროში ყველა კრიტიკოსი დაადუმა. ჩემპიონთა ლიგის მიმდინარე სეზონში გვხვდება ერთადერთი გუნდი, რომელმაც დააფიქსირა 100%-იანი შედეგი, 5/5 მოგება, საუბარი სწორედ "სქაუზერების" შესახებ არის.
ენფილდელებისთვის ყველაზე ტკბილი გამარჯვება, ალბათ, მაინც მეხუთეა, მოწინააღმდეგე ხომ თვით რეალი იყო. დიახ, ეს არ იყო ჩემპიონთა ლიგის ფინალი და არც ზედიზედ მე-8 მოგება მადრიდელებთან, მაგრამ სლოტის გუნდმა მაინც ისტორიულ ნიშნულს მიაღწია. ვნახოთ, კიდევ რას შემოგვთავაზებს ლივერპული ევროსარბიელზე.
11-ქულიანი სხვაობა კიდევ ერთ უხერხულ მეტოქესთან
"სამეფო კლუბის" დამარცხების შემდეგ, "წითლებმა" იგივე "ქალაქელებთანაც" გაიმეორეს. კლოპმა თავის ყოფილ გუნდთან ერთად ისტორია დაწერა, თუმცა მისი თავგადასავალი მერსისაიდში კიდევ უფრო შთამბეჭდავი იქნებოდა რომ არა "ლურჯები", რომლებიც პრემიერ ლიგის ჩემპიონები ბოლო 7 წელიწადში 6-ჯერ გახდნენ.
გავიხსენოთ რამდენიმე შემთხვევა, როდესაც პეპ გუარდიოლას გუნდმა "სქაუზერებს" ერთი ნაბიჯით აჯობა. 2018/2019 წლების სეზონი - მომენტი, როდესაც 97 ქულა ჩემპიონობისთვის საკმარისი არ არის. დიახ, ენფილდელებმა აიღეს ქულების აღნიშნული რაოდენობა, მაგრამ ტიტულს 98 ქულის მქონე ეტიჰადელები დაეუფლნენ.
ერთი სეზონის შემდეგ, კლოპმა ამოისუნთქა და თავის გუნდს ნანატრი ჩემპიონობა მოუტანა - პირველი, 1990 წლის შემდეგ. 2021/2022 წლების სეზონი - სიტი იბრუნებს ჩემპიონობას, ლივერპულთან ისევ 1-ქულიანი სხვაობით, 93:92. იმის შემდეგ, კიდევ 2-ჯერ: გერმანელმა სპეციალისტმა თავის ესპანელ მეტოქეს ვეღარაფერი დაუპირისპირა.
რას ვხედავთ დღეს? ჩემპიონთა ლიგაზე დამარცხებულია "ბლანკოსი", პრემიერ ლიგაში კი - მანჩესტერული გუნდი. ევროსარბიელის მსგავსად, "წითლები" ერთპიროვნული ლიდერები არიან ნისლიან ალბიონზეც, თანაც "ქალაქელებთან" უკვე 11-ქულიანი სხვაობით. მერსისაიდელთა ლეგენდარული სპეციალისტის მემკვიდრეობა ცოცხალია, მას ღირსეულად და ჭკვიანურად ნიდერლანდელი დამრიგებელი აგრძელებს.
