ახალი სეზონის წინ, მანჩესტერ სიტიმ გაიფორმა ტიჯანი რეინდერსი და რაიან შერკი - ნახევარმცველები, რომლებმაც ინგლისური გუნდის სახელოვანი შუახაზელების გზა უნდა გააგრძელონ. გავიხსენოთ "ქალაქელთა" ლეგენდარული და ვარსკვლავური ნახევარმცველები, როგორც წარსულიდან, ისე აწმყოდანაც.
მეტ ბასბი
ბასბი პირველ რიგში ასოცირდება მანჩესტერ იუნაიტედის მწვრთნელობასთან და ალექს ფერგიუსონთან ერთად, ის ამ გუნდის საუკეთესო დამრიგებელია. აღსანიშნავია, რომ მეტის საფეხბურთო კარიერამ ჩაიარა "წითელი ეშმაკების" მოსისხლე მტრების, ლივერპულისა და სიტის ბანაკში.
შოტლანდიელმა ნახევარმცველმა მანჩესტერულ გუნდში ჩაატარა 230-მდე მატჩი და ის ინგლისის ასოციაციის თასის გამარჯვებულიც გახდა. ეს ყველაფერი გასული საუკუნის 20-იანებსა და 30-იანებში ხდებოდა. ამის შემდეგ, "ქალაქელთა" ფლანგელი როგორც აღვნიშნეთ, მერსისაიდში გადავიდა.
კევინ დე ბრუინი
ალბათ, მთავარი ფეხბურთელი მან სიტის თანამედროვე ისტორიაში და ზოგადად პრემიერ ლიგის ერთ-ერთი ყველაზე დიდი ნახევარმცველი. 420-ზე მეტი შეხვედრა და 100-ზე მეტი გატანილი ბურთი, ამ ყველაფერს დავუმატოთ 117 ასისტი და 19 მოგებული ტიტული. ეს ყველაფერი დე ბრუინის მემკვიდრეობაა.
ცნობისთვის, კევინზე მეტი საგოლე გადაცემა პრემიერ ლიგაში მხოლოდ რაიან გიგზს აქვს გაკეთებული. მათ შორის არის 162:119 - ეს ყველაფერი იმის გათვალისწინებით, რომ ბელგიელმა ფლეიმეიქერმა ინგლისის ჩემპიონატში უელსელ ვინგერზე 12 სეზონით ნაკლები ჩაატარა.
ფილ ფოდენი
დიახ, ფოდენი ჯერ ძალიან ახალგაზრდაა და ლეგენდების გვერდით მისი დაყენება არის ნაადრევი, თუმცა საუბარია ფეხბურთელის შესახებ, რომელიც სიტის მომავალს წარმოადგენს. კლუბის აღზრდილი ფლეიმეიქერი, რომელიც მთავარ გუნდში 17 წლის ასაკში გამოჩნდა. იმის შემდეგ, ფილმა მანჩესტერელებში 310-ზე მეტი შეხვედრა ჩაატარა.
ამის გარდა, ინგლისელმა გამთამაშებელმა "ქალაქელებში" მოასწრო 98 გოლის გატანა და ეს ყველაფერი 25 წლის ასაკისთვის. მართალია, გასულ სეზონში პეპ გუარდიოლას გუნდის ფლეიმეიქერი არ ყოფილა ისეთი ეფექტური, როგორც წინა წლებში, მაგრამ არავის ეპარება ეჭვი, ახალგაზრდა ნახევარმცველი აუცილებლად დაბრუნდება.
ილქაი გიუნდოგანი
გუარდიოლას გუნდის უმნიშვნელოვანესი წევრი, იმდენად მნიშვნელოვანი, რომ ბარსელონაში გადასვლის შემდეგ, მან სიტიმ გიუნდოგანი დაიბრუნა. ილქაიზე ხშირად პეპი თავის სამწვრთნელო კარიერაში იყენებდა მხოლოდ 3 მოთამაშეს: დე ბრუინს, ედერსონსა და აღნიშნული სიის კიდევ ერთ წევრს.
როგორც მოგეხსენებათ, კევინმა მანჩესტერული გუნდი დატოვა და ნაპოლი აირჩია. მის გზას დიდი ალბათობით გაჰყვება გერმანელი შუახაზელიც, ამჯერად უკვე საბოლოოდ. აღსანიშნავია ისიც, რომ "ქალაქელებმა" ჯერჯერობით ვერ ისწავლეს თავიანთი ლეგენდარული ნახევარმცველის გარეშე თამაში.
გიორგი ქინქლაძე
დრო, როდესაც მან სიტი ტოპ გუნდის სტატუსისგან ძალიან შორს იყო. არაბულ ინვესტიციებამდე კლუბს აშორებდა ორი ათწლეული და იმ დროს მანჩესტერელები ინგლისის ჩემპიონატის აუტსაიდერები იყვნენ. ერთადერთი ნათელი წერტილი იყო ქინქლაძე, რომელიც ლურჯი მაისურით საოცრებებს ჩადიოდა.
"ქალაქელების" გულშემატკივრებმა გიორგი ზედიზედ ორჯერ გუნდის წლის საუკეთესო ფეხბურთელადაც აღიარეს. პრემიერ ლიგიდან გავარდნის შემდეგ, ქართველი ფლეიმეიქერით ინტერესდებოდნენ ბარსელონა, ლივერპული, ინტერი და იუვენტუსი, მაგრამ მან მეინ როუდზე დარჩენა ამჯობინა.
ფრენკ ლამპარდი
დიახ, ლამპარდი არის ლონდონის ჩელსის ლეგენდა და მან სიტიში მან გაატარა სულ რაღაც ერთი სეზონი, თუმცა მისი ისტორია შთამბეჭდავია. ფრენკმა ჟოზე მოურინიოსთან ერთად დაწერა "არისტოკრატების" ისტორია, მაგრამ კარიერის ბოლოსთვის, საყვარელმა სპეციალისტმა ის აითვალწუნა.
ინგლისელ ნახევარმცველს მოუწია პორტუგალიელი მწვრთნელის გუნდის დატოვება, რის შემდეგაც რადარზე გამოჩდნენ მანჩესტერელები, ერთწლიანი კონტრაქტით. როგორც გვახსოვს, "ქალაქელების" შუახაზელმა ახალ კლუბში სადებიუტო ბურთი სწორედ სტემფორდის ბინადრების წინააღმდეგ შეაგდო.
როდრი ერნანდესი
მან სიტის ერთადერთი ფეხბურთელი, რომელიც დაეუფლა ოქროს ბურთს და მეორე ესპანელი მოთამაშე ისტორიაში, ლუის სუარესის შემდეგ, ამ ჯილდოთი. როდრი არის მანჩესტერელთა შეუცვლელი ფიგურა და ამაზე მეტყველებს ის ფაქტი, თუ რა დაემართა გუნდს მისი ტრავმის შემდეგ.
განვლილი სეზონის სტარტზე ჯვარედინი მყესების გაწყვეტის შემდეგ, ერნანდესი ერთი წლით ფეხბურთის გარეშე დარჩა. "ქალაქელების" გუნდი ესპანელი შუახაზელის გარეშე უბრალოდ ჩამოიშალა და ინგლისის ჩემპიონატის საშუალო დონის კოლექტივად იქცა. გამოსარჩევია ასევე გუარდიოლას გუნდის ანტირეკორდები, რომელიც მადრიდის ატლეტიკოს ყოფილი ჩამშლელის არყოფნაში დამყარდა.
ბერნარდო სილვა
ყველაზე ხშირად გამოყენებადი ფეხბურთელი გუარდიოლას სამწვრთნელო კარიერაში. ლეგენდარულმა სპეციალისტმა ბერნარდოსთან ერთად 404 შეხვედრა გადააგორა. სილვამ ამ დროის განმავლობაში მოასწრო 71 ბურთის შეგდება და 72 ასისტის გაფორმება. საკმაოდ მაღალია იმის ალბათობაც, რომ პორტუგალიელმა ფლეიმეიქერმა ამ ზაფხულს სიტი დატოვოს.
მანჩესტერელებში მიმდინარეობს თაობათა ცვლა - წავიდა დე ბრუინი, მიდის გიუნდოგანიც, მოვიდნენ რეინდერსი და შერკი. წამსვლელებს შორის შესაძლოა მონაკოს ექს-ფლეიმეიქერიც აღმოჩნდეს. მის სახელს უკავშირებენ ბარსასა და საუდის არაბეთის რამდენიმე კლუბს.
დავიდ სილვა
ერთ-ერთი პირველი დიდი ვარსკვლავი მან სიტის პოსტ-არაბული ინვესტიციების ეპოქაში. სერხიო აგუერო, ვენსან კომპანი, იაია ტურე და სწორედ სილვა - მანჩესტერელთა ფუნდამენტი 2010-იანების დასაწყისში. მან ინგლისურ კლუბში მოასწრო 436 შეხვედრის ჩატარება, 77 ბურთის შეგდება და 136 ასისტის გაფორმება.
დავიდზე მეტი საგოლე გადაცემა "ქალაქელებში" მხოლოდ დე ბრუინს აქვს გაკეთებული. ის ეფექტური იყო როგორც გარემარბის პოზიციაზე, ისე ფლეიმეიქერადაც. ასაკის მატებასთან ერთად, გუარდიოლამ ესპანელი ვინგერი საბოლოოდ შემოწია ცენტრში, რითაც ინგლისის ჩემპიონატს ახალი დიდი დირიჟორი აჩუქა.
იაია ტურე
მან სიტის 2010-იანების დასაწყისის კიდევ ერთი დიდი ვარსკვლავი. იყო დრო, როდესაც ტურე მსოფლიოს ერთ-ერთი საუკეთესო ცენტრალური შუახაზელიც კი იყო. განსაკუთრებულად გამოსარჩევია 2013/14 წლების სეზონი, რომელშიც იაიამ 49 შეხვედრაში შეაგდო 24 ბურთი და გააკეთა 12 ასისტი.
ივუარელ ნახევარმცველზე მეტი გოლი პრემიერ ლიგის იმ სეზონში მხოლოდ ლუის სუარესისა და დანიელ სტარიჯის დუეტმა გაიტანა. საინტერესოა, რომ მანჩესტერელთა შუახაზელი კლუბიდან წავიდა გუარდიოლას მისვლის შემდეგ, იგივე რამ მოხდა ბარსაშიც, 2010 წელს.
ასევე გამოსარჩევია: კოლინ ბელი, ჯო ფეიგანი, ფერნანდინიო როსა, მარკ-ვივიენ ფოე, ჯეკ გრილიში, რიად მაჰრეზი, სტივ მაკმანამანი, ჯეიმს მილნერი, ალან ოუკსი, კლაუდიო რეინა, პატრიკ ვიეირა.
