ამბობენ, რომ მილანს ზამთრის სატრანსფერო ფანჯრის დროს ახალი ცენტრალური მცველი არ შეუძენია, მაგრამ ეს ასე არ არის - 3 იანვარს, ფანჯრის გახსნისთანავე, კლუბმა ოფიციალურად გამოაცხადა ძველი "მეგობრის", მატეო გაბიას მილანში დაბრუნება.
სიმართლე უნდა ითქვას, რომ ეს არ იყო საოცნებო გარიგება. ყველაფერზე მეტად, არჩევანი ნაკარნახევი იყო საგანგებო სიტუაციით, რომელიც იმ მომენტში მილანის დაცვაში ხდებოდა. პიოლის განკარგულებაში მცველებიდან თითქმის არავინ იყო. ჩაო, კალულუ, ტომორი, ყველა მათგანს ტრავმა ჰქონდა და დაცვის ცენტრში თამაში, ტეო ერნანდესს უწევდა. შემდეგ კი გუნდში გაბია დაბრუნდა და ყველაფერი შეიცვალა.
მილანში, ორ თვეზე ნაკლებ დროში, გაბიას უკვე იმაზე მეტი მატჩი აქვს ჩატარებული, ვიდრე ვილიარეალში სეზონის პირველ წრეში. 8 მატჩი 7-ის წინააღმდეგ. ამ 8-დან კი თითქმის ყველა მატჩში მატეომ მოედანზე დიდი დრო გაატარა.
მილანის დაცვა კრიტიკას ვერ უძლებს, თუ გადავხედავთ ციფრებს - 32 გაშვებული გოლი, ძალიან ცუდი შედეგია და ამის ფონზე, გაბიას ინდივიდუალური შედეგები და კარგი თამაში, ნამდვილად გასაკვირია. პირველ რიგში იმიტომ, რომ ჩვენ ვსაუბრობთ ფეხბურთელზე, რომელიც ვილარეალის სათადარიგოთა სკამზე იყო და მილანში მხოლოდ იმიტომ დააბრუნეს, რომ ტრავმების ეპიდემია იყო.
მაგალითისთვის ავიღოთ ბოლო ტურის შეხვედრა, სადაც მილანი სან სიროზე ატალანტას დაუპირისპირდა. გაბიას ამჯერად ჩაოს გვერდით მოუწია თამაში. ამ დუეტმა ჯერ ყოფილი თანაგუნდელი დე კეტალარე გაანეიტრალა, შემდეგ კი ლუკმენი-სკამაკას შეტევასაც არაფერი დაუთმო. ჩაო ტრავმის შემდეგ ძალიან ცუდ ფორმაში დაბრუნდა, თუმცა როდესაც გერმანელს გვერდით გაბია დაუყენეს, მალიკს თავდაჯერება დაუბრუნდა. გაბიას ტოპ მატჩები ჰქონდა რენის, ნაპოლისა და ფროზინონეს წინააღმდეგაც, იმის მიუხედავად, რომ "ჯალაძურიმ" მენიოს კარი ორჯერ აიღო, მატეო დაცვის ხაზში მაინც საუკეთესო იყო.
სტეფანო პიოლი: "გუნდში დაბრუნების შემდეგ გაბიას პერფორმანსი ყოველთვის მაღალ დონეზეა. მე ფეხბურთელებს ვარჩევ მათი თამაშის მიხედვით, ამ მომენტისთვის კი მატეო კარგ ფორმაშია და სხვებზე უკეთესად თამაშობს. თუ ასე გააგრძელებს, არაფრის შეცვლას არ ვაპირებ, ის ისევ სასტარტო შემადგენლობის წევრი იქნება."
პიოლისთვის გაბია ისეთი შეუცვლელი ფეხბურთელი გახდა, როგორიც ტეო და ლეაო არიან. მატეოს გვერდით ჯერ კიაერი თამაშობდა, ახლა ჩაო, ტრავმებიდან ბრუნდებიან კალულუ და ტომორი, თუმცა როგორც ჩანს, მატეო ხელშეუხებელი გახდა და დაცვის ცენტრში, მეორე ადგილისთვის ბრძოლა სხვებს მოუწევთ.
რა იქნება მომავალში? გაბია აღარ იქნება ერთი ჩვეულებრივი რიგითი ფეხბურთელი, რომელიც კლუბის აკადემიიდან მოდის, მან ყველა კრიტიკოსი გააჩუმა და გუნდს დაანახა, რომ მისი ნდობა შეიძლება. მილანთან 6-თვიანი განშორების შემდეგ, ესპანეთიდან სულ სხვა ადამიანი დაბრუნდა. გაბია დღეს მილანის წამყვანი ფეხბურთელია და მოსალოდნელია, რომ ასეთი თამაშით ის მალე იტალიის ეროვნულ ნაკრებში მიიღებს მიწვევას.
