დინამოს მწვრთნელი თამაშობდა შტურმ გრაცში, რომელმაც მოწინააღმდეგესთან ორი შეხვედრის ჯამში 3:1 იმარჯვა (2:0, 1:1). ცნობისთვის, საქართველოს ყველაზე ტიტულოვანი გუნდის კარში მაშინ იდგა გიორგი ლორია, ისე როგორც ახლა. როგორც ვხედავთ, 44 წლის მწვრთნელი მისთვის მეტოქე იყო, ახლა კი დამრიგებელი იქნება.
ქართველი მეკარე არ არის ერთადერთი "ჯვაროსანი" ფელდჰოფერის გზაზე, ვოლფსბერგერში მუშაობის დროს ის ლუკა ლოჩოშვილისა და გურამ გიორბელიძის დამრიგებელი იყო. ერთმა ავსტრიელი სპეციალისტის ხელმძღვანელობით 28 მატჩი ჩაატარა, მეორემ კი - 11. სწორედ "მგლებში" მუშაობას უკავშირდება ფერდინანდის მთავარი წარმატება.
2020-2021 წლების სეზონში დინამოს ამჟამინდელმა მწვრთნელმა ავსტრიული გუნდი ევროპა ლიგის 1/16 ფინალში გაიყვანა, გზად კი გადალახეს ჯგუფური ეტაპის ბარიერი, როტერდამის ფეიენოორდის, მოსკოვის ცსკა-სა და ზაგრების დინამოს გავლით. რაც შეეხება პლეიოფს, "შავ-თეთრებმა" ლონდონის ტოტენჰემთან წააგეს.
ეს არის პირველი და ჯერჯერობით უკანასკნელი შემთხვევა, როდესაც ლავანტალის ბინადრები ევროპა ლიგის პლეიოფში ყოფილან. დღეიდან, 44 წლის დამრიგებელი ახალი ფურცლის წერას უკვე თბილისურ კლუბში დაიწყებს. ახალ სამუშაო გარემოში მოსვლის შემდეგ, ფელდჰოფერმა ისაუბრა გუნდის ამჟამინდელ მდგომარეობასა და სამომავლო გეგმებზე.
"დინამოს შესახებ საფეხბურთო ევროპაში ყველამ იცის. ეს არის ტრადიციების მქონე გუნდი, ბრწყინვალე აკადემიითა და ახალგაზრდა ფეხბურთელებით. აქ იმისთვის ვარ, რომ თბილისურ გუნდს განვითარებაში დავეხმარო და ნაბიჯ-ნაბიჯ წავწიო ის წარმატებისაკენ. არ ვარ ჯადოქარი, მაგრამ ვეცდები ჩემი გამოცდილების გამოყენებას", - განაცხადა ავსტრიელმა დამრიგებელმა.
ფერდინანდი კარგად იცნობს ქართულ ფეხბურთს, მისი ფავორიტი მოთამაშე კი ოთარ კიტეიშვილია - "ლურჯ-თეთრების" აკადემიის აღზრდილი და ამ გუნდის ყოფილი მოთამაშე. შეგახსენებთ, რომ ქართველი შუახაზელი დინამოს აკადემიაში 2011-2013 წლებში ირიცხებოდა, შემდეგი 5 წელი კი მან უკვე მთავარ გუნდში გაატარა.
შტურმის ნახევარმცველმა თბილისური კლუბის შემადგენლობაში ჩაატარა 126 შეხვედრა და გაიტანა 23 გოლი. 44 წლის მწვრთნელი მას შემდეგნაირად ახასიათებს:
"პირველ რიგში, მინდა გამოვარჩიო კიტეიშვილი, რომელიც ჩემი აზრით, ქართულ ფეხბურთს იდეალურად წარმოაჩენს. ის არის ნიჭიერი და მშრომელი მოთამაშე.
ოთარი არის სამაგალითო ფეხბურთელი როგორც აქაური ბიჭებისთვის, ისე მერწმუნეთ, რომ ავსტრიელებისთვისაც", - განაცხადა ფელდჰოფერმა.
მან ძალიან კარგად იცის, რომ საქართველოს ეროვნული გუნდის წარმატება უდიდეს კავშირშია "ლურჯ-თეთრების" აკადემიასთან, რომელმაც ნაკრებს არაერთი მოთამაშე აღუზარდა.
დინამოში პირველ ნაბიჯებს დგამდნენ ხვიჩა კვარაცხელია, გიორგი მამარდაშვილი, გიორგი ჩაკვეტაძე და სხვები. დღეს, ამ გუნდის ახალი თაობის წარმომადგენლებისთვის სწორი კურსის მიცემა არის ავსტრიელი დამრიგებლის პასუხისმგებლობა და მან უკვე ძალიან კარგად იცის, თუ რას ნიშნავს ეს ყველაფერი.
