ნიუკასლ იუნაიტედი დაბრუნდა ჩემპიონთა ლიგაზე და გახსნით ტურში ბარსელონას დაუპირისპირდება. აღსანიშნავია, რომ პირველად, როდესაც "კაჭკაჭები" მოხვდნენ მთავარ საკლუბო ტურნირზე, მათი მეტოქე ასევე კატალონიური კლუბი იყო. ეს ყველაფერი ხდებოდა 1997/98 წლების სეზონში და "ჯორდების" ლიგაზე მოხვედრაში უდიდესი როლი ითამაშა გუნდის იმდროინდელმა ახალწვეულმა, თემურ ქეცბაიამ.
ჩემპიონთა ლიგაზე ქართული გოლით მოხვედრილი ნიუკასლი
პრემიერ ლიგის 1996/1997 წლების სეზონის შედეგების მიხედვით, ნიუკასლ იუნაიტედმა დაიკავა მეორე ადგილი, რითაც გაიფორმა ჩემპიონთა ლიგის საგზური, მაგრამ შესარჩევის გავლით. "კაჭკაჭების" მეტოქე იყო ზაგრების დინამო, რომელსაც იმ დროს კროაცია ერქვა. პირველ შეხვედრაში დაფიქსირდა 2:1 "ჯორდების" სასარგებლოდ, მე-2 თამაშში კი მაყურებელმა ნამდვილი თრილერი იხილა.
90-ე წუთამდე ანგარიში იყო 1:1, რაც ნიშნავდა იმას, რომ კენი დალგლიშის გუნდი ჩემპიონთა ლიგისგან ერთ ნაბიჯში იმყოფებოდა. ბოლო წუთი: "ლურჯები" შეი გივენის კარში იტანენ მე-2 ბურთს, რის შედეგადაც დამატებითი დრო ინიშნება. ყველაფერი მიდიოდა 11-მეტრიანებისკენ, მაგრამ 119-ე წუთზე ქეცბაიამ მარიან ვლაკის გუნდის იმედები დაასამარა.
მაკსიმირის ბინადრების ჩაშლილი შეტევა, ფაუსტინო ასპრილას გადაცემა ქართველ შემტევზე და გოლი! - ნიუკასლ იუნაიტედი ჩემპიონთა ლიგაზეა, პირველად თავის ისტორიაში. აღსანიშნავია ის, რომ თემური მოედანზე შემოვიდა 102-ე წუთზე, 17 წუთის შემდეგ კი მან "კაჭკაჭების" ისტორიაში უმნიშვნელოვანესი ბურთი შეაგდო.
სიკვდილის ჯგუფი - ბარსელონა, ნიუკასლი, დინამო კიევი, პსვ
კროაციას ბარიერის გადალახვის შემდეგ, ნიუკასლ იუნაიტედი მოხვდა ჩემპიონთა ლიგის ფინალურ ეტაპზე, სადაც ჯგუფში მოწინააღმდეგეები ბარსა, დინამო კიევი და პსვ იყვნენ. დაწყება გამოდგა უბრალოდ ტრიუმფალური: ასპრილას ჰეთ-თრიქით "კაჭკაჭებმა" კატალონიელებს 3:2 მოუგეს.
აღსანიშნავია ისიც, რომ მატჩის 49-ე წუთისთვის "ჯორდები" "ბლაუგრანას" 3:0-ს ანადგურებდნენ. გივენის კარი მოგვიანებით აიღეს ლუიშ ფიგუმ და ლუის ენრიკემ, მაგრამ კამპ ნოუს ბინადრების გადასარჩენად ეს საკმარისი არ გამოდგა. ქეცბაია მოედანზე შემოვიდა 81-ე წუთზე, ლეგენდარული ჯონ ბარნსის გასვლის შემდეგ.
დალგლიშის გუნდს იმ დროს ტრავმირებული ჰყავდა მთავარი მეგოლე და ლიდერი, ალან შირერი, რომლის ფუნქცია-მოვალეობებს ერთმანეთში ინაწილებდა რამდენიმე შემტევი, მათ შორის ქართველი ფორვარდიც. სენტ ჯეიმს პარკის ბინადრებმა ტურნირი დაიწყეს იმედისმომცემად, მაგრამ შემდეგ, მათ ანგარიშზე 3 წაგება 1 ფრე დაფიქსირდა.
დიახ, ნიუკასლ იუნაიტედმა ვერაფერი გააწყო განმეორებით მატჩში ლუი ვან გაალის გუნდთან, ასევე "თეთრ-ლურჯებსა" და ეინდჰოვენთანაც. ექვსი შეხვედრის შემდეგ, "კაჭკაჭებმა" დააგროვეს შვიდი ქულა, რაც საკმარისი გამოდგა ბარსას გადასასწრებად, მაგრამ არა ვალერი ლობანოვსკის გუნდისა და "ფერმერების".
თემურმა მონაწილეობა მიიღო ექვსივე მატჩში, თუმცა "ჯორდების" ჩემპიონთა ლიგის პლეიოფში გაყვანა, ვერ მოხერხდა. არსებობს ასეთი მოსაზრება: დალგლიშის გუნდს რომ ჰყოლოდა შირერი, ყველაფერი სულ სხვა სცენარით წარიმართებოდა. ისიც უნდა ითქვას, რომ დებიუტის კვალობაზე, სენტ ჯეიმს პარკის ბინადრების გამოსვლა მაინც დადებითად შეფასდა.
მითუმეტეს, თუ გავითვალისწინებთ იმას, თუ ვინ იყვნენ ნიუკასლ იუნაიტედის კონკურენტები - კატალონიური გრანდი არაერთი ვარსკვლავით თავის შემადგენლობაში, დინამო ანდრეი შევჩენკოსთან ერთად, რომელიც ერთი წლის შემდეგ აღმოჩნდება ლიგის 1/2 ფინალში, ასევე ფილიპს არენას ბინადრები ლიუკ ნილისით გუნდში.
ცნობისთვის, რონალდო ნაზარიო ბელგიელ შემტევს დაასახელებს საუკეთესო თავდამსხმელად, რომლის გვერდითაც მას უთამაშია. იმავე ჯგუფში კიეველები ორი შეხვედრის ჯამში "ბლაუგრანას" გაანადგურებენ 7:0-ს, უკრაინელი მომავალი ოქროს ბურთის მფლობელი კი კამპ ნოუზე ჰეთ-თრიქს გაიფორმებს.
ჩემპიონთა ლიგის ახალ სეზონს "კაჭკაჭები" კვლავ იწყებენ ბარსელონასთან მატჩით, ისე როგორც 28 წლის წინ, როდესაც მთავარ საკლუბო ტურნირზე პირველად აღმოჩნდნენ. მართალია, ამჯერად ქართული გოლის გარეშე, მაგრამ "ჯორდების" ჩვენიანი ფორვარდის მემკვიდრეობა დღემდე ცოცხლობს.
