La Gazzetta dello Sport Georgia-ზე პროგნოზების ლიგა ახალი სათამაშო კვირით გრძელდება. მონაწილეებს ამ უიქენდზეც შეუძლიათ წინასწარ განსაზღვრულ სპორტულ ღონისძიებებზე პროგნოზების გაკეთება.
მონაწილეთა მიერ გაკეთებული პროგნოზები ფასდება წინასწარ დადგენილი წესებით, რის შემდეგაც შედგება ლიდერბორდი, რომელიც ასახავს თითოეული მონაწილის შედეგებს.
მე-15 ტურის პროგნოზების მიღება დაწყებულია და დასრულდება 2026 წლის 31 იანვარს 17:00 საათზე.
La Gazzetta dello Sport Georgia-ს პროგნოზების ლიგის მხარდაჭერია ნატახტარი.
რა უნდა გავითვალისწინოთ მე-15 ტურის წინ?
ლივერპული VS. ნიუკასლი | 31 იანვარი, 23:55 საათი
პრემიერ ლიგის 24-ე ტურში რამდენიმე გამორჩეული დაპირისპირება გველოდება, საიდანაც ერთ-ერთი უდავოდ ენფილდზე გაიმართება. მაყურებელს წინ ორი არც ისე კარგ ფორმაში მყოფი გუნდის შეხვედრა ელოდება, სადაც არნე სლოტის ლივერპული ედი ჰაუს ნიუკასლს უმასპინძლებს.
გუნდები ამ მატჩს დაახლოებით ერთნაირ ფორმაში ხვდებიან. ლივერპულმა ბოლო 5 მატჩიდან 1 წააგო, ხოლო 4 ფრედ დაასრულა. რაც შეეხება ნიუკასლს, "კაჭკაჭებმა" 3-ჯერ იმარჯვეს, ერთხელ დამარცხდნენ და ერთხელაც ფრე ითამაშეს.
ლივერპული ამ ტურს 36 ქულით ხვდება და იმედოვნებს, რომ გამარჯვების შემთხვევაში ოთხეულში დაბრუნებას შეძლებს. რაც შეეხება სტუმარ გუნდს, ნიუკასლი 33 ქულით, მე-9 პოზიციაზე იკავებს და გამარჯვების შემთხვევაში სწორედ ლივერპულს გაუთანაბრდება.
პირველ წრეში გამართული დაპირისპირება ლივერპულის გამარჯვებით, 2-3 დასრულდა. სენტ ჯეიმს პარკზე შეკრებილმა მაყურებელმა საოცარი მატჩი იხილა, სადაც გუნდებმა ერთმანეთს არაფერი დაუთმეს.
ახლა კი რაც შეეხება გუნდების დანაკლისს - ლივერპულის სამატჩო განაცხადში ბრედლი, ლეონი, გომესი და ისაკი ვერ მოხვდებიან, ხოლო ედი ჰაუს განკარგულებაში ჟოელინტონი, კრაფტი, ლივრამენტო და შერი არ იქნებიან.
ლივერპულის სავარაუდო შემადგენლობა: ალისონი, ფრიმპონგი, კონატე, ვან დაიკი, კერკეზი, გრავენბერხი, მაკ ალისტერი, სობოსლაი, სალაჰი, ეკიტიკე, ვირცი;
ნიუკასლის სავარაუდო შემადგენლობა: პოუპი, ტრიპიე, ჩაო, ბოტმანი, ჰოლი, გიმარაეში, ტონალი, მაილი, გორდონი, ვისა, ბარნსი;
გუნდებმა შუა კვირაში ჩემპიონთა ლიგაზე ითამაშეს. ლივერპულს საკმაოდ მარტივი გასეირნება ჰქონდა - არნე სლოტის გუნდმა ყარაბახს 6-0 მოუგო, ხოლო რაც შეეხება ნიუკასლსს, ედი ჰაუს გუნდი პარი სენ-ჟერმენს დაუზავდა, 1-1.
ლივერპული და ნიუკასლი ისტორიაში სულ 185-ჯერ დაუპირისპირდნენ ერთმანეთს, საიდანაც მერსისაიდელებმა 92 მოიგეს, ხოლო "კაჭკაჭებმა" მეტოქეს 49-ჯერ სძლიეს. რაც შეეხება ფრედ დასრულებულ მატჩებს, გუნდები 44-ჯერ დაზავდნენ.
იმის გათვალისწინებით, რომ გუნდებს შორის ჩატარებულ ბოლო 5 შევხვედრაში ჯამში 22 გოლი გავიდა, დიდია იმის ალბათობა, რომ მაყურებელი შაბათს გასამართ მატჩშიც ბევრ გატანილ გოლს იხილავს. ჩვენი ვარაუდია, რომ ორივე გუნდი შეძლებს გოლის გატანას, თუმცა ფავორიტის დასახელება გაგვიჭირდება.
ტოტენჰემი VS. მანჩესტერ სიტი | 1 თებერვალი, 20:30 საათი
24-ე ტურის მეორე გამორჩეულ მატჩს ლონდონი უმასპინძლებს, სადაც ტომას ფრანკის ბიჭები პეპ გვარდიოლას შეგირდებს დახვდებიან.
ტოტენჰემს საშინელი პერიოდი უდგას, რის გამოც ტომას ფრანკის გაშვებას კლუბში განიხილავენ. "მამლებს" 23 ტურის შემდეგ 28 ქულა აქვთ და 13-ე პოზიციას იკავებენ, რაც ძალიან დიდ პრობლემას წარმოადგენს.
რაც შეეხება მანჩესტერ სიტის, "ქალაქელებიც" დიდად კარგად ვერ გამოიყურებიან, თუმცა საჩემპიონო რბოლაში მაინც რჩებიან. პეპ გვარდიოლას გუნდს 46 ქულა აქვს და ლიდერ არსენალს მხოლოდ 4 ქულით ჩამორჩება.
სეზონის პირველი მატჩი ტოტენჰემის გამარჯვებით, 0-2 დასრულდა. იმ მომენტში ტომას ფრანკის გუნდმა სერიოზული განაცხადი გააკეთა, თუმცა მოლოდინები არ გამართლდა და ლონდონელებს საშინელი კრიზისი დაეწყოთ.
გუნდები ამ პრინციპულ მატჩს ძალიან დიდი დანაკლისით ხვდებიან. მანჩესტერ სიტის სამატჩო განაცხადში გვარდიოლი, დიაში, სავინიო, კოვაჩიჩი და სტოუნსი ვერ მოხვდებიან. რაც შეეხება ტოტენჰემს, ტომას ფრანკის განკარგულებაში ბენტანკური, ბერგვალი, პორო, დევისი, მედისონი, კულუსევსკი და კუდუსი არ იქნებიან.
ტოტემჰემის სავარაუდო შემადგენლობა: ვიკარიო, სპენსი, რომერო, ვან დე ვენი, უდოჯი, გალაგერი, ბისუმა, სიმონსი, ოდობერი, ტელი, სოლანკე;
მანჩესტერ სიტის სავარაუდო შემადგენლობა: დონარუმა, ნუნიეში, ხუსანოვი, გეჰი, ო'რაილი, როდრი, ბერნარდო სილვა, რეინდერსი, სემენიო, ჰოლანდი, დოკუ;
როგორც ტოტენჰემმა, ისე მანჩესტერ სიტიმაც შუა კვირაში ჩემპიონთა ლიგაზე ითამაშა. ტომას ფრანკის ბიჭებმა აინტრახტი 0-2 დაამარცხეს და საუკეთესო 8 გუნდში მოხვედრა მოახერხეს, რაც შეეხება სიტის, პეპის შეგირდებმა გალათასარაის საკმაოდ მარტივად 2-0 სძლიეს და ასევე შეძლეს საუკეთესოებს შორის მოხვედრა.
გუნდებს შორის ისტორიაში ჩატარებული მატჩების რაოდენობა 165 ითვლის, საიდანაც ტოტენჰემმა 66 მოიგო, ხოლო სიტიმ 64-ჯერ იმარჯვა. "მამლები" და "ქალაქელები: სულ 35-ჯერ დაზავდნენ.
ჩვენი პროგნოზია, რომ მაყურებელი ბევრ გატანილ გოლს იხილავს და იმის ფონზე, რომ ტოტენჰემის დანაკლისი უფრო სოლიდურია, ფავორიტად მანჩესტერ სიტის დავასახელებთ.
