La Gazzetta dello Sport Georgia-ზე პროგნოზების ლიგა ახალი სათამაშო კვირით გრძელდება. მონაწილეებს ამ უიქენდზეც შეუძლიათ წინასწარ განსაზღვრულ სპორტულ ღონისძიებებზე პროგნოზების გაკეთება.
მონაწილეთა მიერ გაკეთებული პროგნოზები ფასდება წინასწარ დადგენილი წესებით, რის შემდეგაც შედგება ლიდერბორდი, რომელიც ასახავს თითოეული მონაწილის შედეგებს.
მე-9 ტურის პროგნოზების მიღება დაწყებულია და დასრულდება 2025 წლის 20 დეკემბერს 15:00 საათზე.
La Gazzetta dello Sport Georgia-ს პროგნოზების ლიგის მხარდაჭერია ნატახტარი.
რა უნდა გავითვალისწინოთ მე-9 ტურის წინ?
ტოტენჰემი VS. ლივერპული
პრემიერ ლიგის მე-17 ტურში რამდენიმე გამორჩეული მატჩი გველოდება, თუმცა ტურის ცენტრალურ დაპირისპირებას უდავოდ ლონდონი უმასპინძლებს. მაყურებელს წინ ტოტენჰემი-ლივერპულის საოცრად დაძაბული შეხვედრა ელოდება.
გუნდები ამ შეხვედრას არც ისე კარგ ფორმაში ხვდებიან, შესაბამისად, ფავორიტის დასახელება გაგვიჭირდება. ტომას ფრანკის გუნდმა ბოლო 5 მატჩიდან მხოლოდ ორი მოიგო, ხოლო არნე სლოტის გუნდმა ხასიათი ცოტა გამოიწორა და ბოლო 5 მატჩიდან 3-ჯერ შეძლო გამარჯვება.
ამ გუნდების სეზონი ერთმანეთს ძალიან ჰგავს, ვინაიდან სტარტზე მოლოდინები სულ სხვანაირი იყო, ხოლო რეალობამ კი გვაჩვენა, რომ როგორც ტოტენჰემს, ისე ლივერპულსაც უმძიმესი სეზონი აქვს. ტომას ფრანკისთვის ამ მატჩს ორმაგად დიდი დატვირთვა, აქვს რადგან გავლენიან ინგლისურ გამოცემებს თუ დავუჯერებთ, ტოტენჰემში მის გაშვებას სერიოზულად განიხილავენ. რაც შეეხება არნე სლოტს, ლივერპულის უფროსობა ნიდერლანდელ სპეციალისტს ბოლომდე ენდობა და მისი გუნდიდან გაშვებას არავინ განიხილავს.
ახლა კი რაც შეეხება ურთიერთშეხვედრებს, ტოტენჰემსა და ლივერპულს საკმაოდ დიდი ისტორია აკავშირებთ. გუნდები ერთმანეთს ჯამში 185-ჯერ დაუპირისპირდნენ, საიდანაც უფრო მეტი ლივერპულმა მოიგო, კერძოდ 91-ჯერ. ტოტენჰემმა მერსისაიდული კლუბის დამარცხება სულ 50-ჯერ მოახერხა, ხოლო გუნდები ჯამში 44-ჯერ დაზავდნენ.
რაც შეეხება გუნდების დანაკლისს. ტომას ფრანკის განკარგულებაში 4 ფეხბურთელი არ იქნება: დეიან კულუსევსკი, ჯეიმს მედისონი, დომინიკ სოლანკე და ივ ბისუმა. ამ მატჩს უფრო დიდი დანაკლისით ლივერპული ხვდება - ჯო გომესი, ჟერემი ფრიმპონგი, ჯოვანი ლეონი და კოდი გაკპო არნე სლოტის განკარგულებაში არ იქნებიან. რაც შეეხება დომინიკ სობოსლაის, მისი ამბავი მატჩამდე რამდენიმე საათით ადრე გადაწყდება.
ტოტენჰემის სავარაუდო შემაგდნელობა: ვიკარიო, პორო, რომერო, ვან დე ვენი, სპენსი, პალინია, ბენტანკური, კუდუსი, სიმონსი, ჯონსონი, რიშარლისონი;
ლივერპულის სავარაუდო შემადგენლობა: ალისონი, ბრედლი, კონატე, ვან დაიკი, კერკეზი, გრავენბერხი, ჯოუნსი, მაკ ალისტერი, ვირცი, სობოსლაი, ეკიტიკე;
ჩვენი პროგნოზია, რომ მაყურებელს წინ საოცრად დაძაბული და სანახაობრივი მატჩი ელოდება. იმის გათვალისწინებით, რომ გუნდებს შორის ჩატარებულ ბოლო 5 შეხვედრაში ჯამში 26 გოლი გავიდა, ძალიან დიდია იმის ალბათობა, რომ არც შაბათს გასამართი მატჩი იქნება მოსაწყენი და ორივე გუნდი შეძლებს გოლის გატანას.
იუვენტუსი VS. რომა
სერია A-ს მე-16 ტურის ცენტრალური მატჩი, სადაც ორი ისეთი გუნდი უპირისპირდება ერთმანეთს, რომლებიც საჩემპიონო რბოლაში არიან ჩართული. როგორც იუვენტუსი, ისე რომაც ამ შეხვედრას საკმაოდ კარგ ფორმაში ხვდება. ლუჩანო სპალეტის გუნდს ბოლო 6 მატჩიდან მხოლოდ 1 წაგება აქვს, ხოლო რომა 2-მატჩიანი მოგებათა სერიით ხდვდება ამ პრინციპულ დაპირისპირებას.
იმის ფონზე, რომ გუნდებს შუა კვირაში სუპერთასის მატჩები არ აქვთ, შაბათს გასამართ შეხვედრას დასვენებულები ხვხდებიან, რაც ნეიტრალურად განწყობილი გულშემატკივრებისთვის საკმაოდ კარგი ამბავია.
იუვენტუსსა და რომას საკმაოდ დიდი ისტორია აკავშირებთ. გუნდებს შორის არც მეტი, არც ნაკლები 204 მატჩია გამართული, საიდანაც უფრო მეტჯერ "ბიანკონერიმ", კერძოდ 96 შეხვედრაში მოიგო. რაც შეეხება "ჯალოროსის" მოგებათა მაჩვენებელს, რომაელებმა იუვენტუსი 49-ჯერ დაამარცხეს. და ბოლოს, ფრედ დასრულებული მატჩები რაოდენობა, გუნდები სულ 59-ჯერ დაზავდნენ.
იუვენტუსი ამ პრინციპულ მატჩს ორი წამყვანი ფეხბურთელის გარეშე ხდვება - ფედერიკო გატი და დუშან ვლაჰოვიჩი ლუჩანო სპალეტის განკარგულებაში არ იქნებიან. რაც შეეხება რომას, სამატჩო განაცხადში არტემ დოვბიკი არ იქნება.
იუვენტუსის სავარაუდო შემადგენლობა: დი გრეგორიო, კალულუ, ბრემერი, კელი, მაკკენი, ლოკატელი, ტურამი, კამბიაზო, კონსეისაუ, დევიდი, ილდიზი;
რომას სავარაუდო შემადგენლობა: სვილარი, მანჩინი, ნ’დიკა, ერმოსო, ჩელიკი, კრისტანტე, კონე, უესლი, სოულე, პელეგრინი, დიბალა;
იმის გათვალისწინებით, რომ გუნდებს შორის ჩატარებულ ბოლო 5 მატჩში მხოლოდ 6 გოლი გავიდა, მოსალოდნელია, რომ არც ამ შეხვედრაში ვიხილავთ ბევრ გატანილ გოლს. როგორც რომასთვის, ისე იუვენტუსისთვისაც ამ შეხვედრას ძალიან დიდი მნიშვნელობა აქვს, შესაბამისად, ნაკლებ სავარაუდოა, რომ რომელიმე მათგანი გარისკავს და თამაშს გახსნის.
იმის ფონზე, რომ იუვენტუსი სახლში თამაშობს, შეიძლება სულ ცოტათი ფავორიტებიც არიან, თუმცა გადაჭრით იმის თქმა, რომ ლუჩანო სპალეტის გუნდი ამ მატჩს აუცილებლად მოიგებს, ნამდვილად არ შეგვიძლია.
შეგახსენებთ, რომას 30 ქულა აქვს და მე-4 პოზიციას იკავებს, ხოლო რაც შეეხება იუვენტუსს, ტურინელები 26 ქულით, მე-5 პოზიციაზე არიან.
იუვენტუსი-რომას მატჩთან დაკავშირებით, LaGazzetta Georgia საინტერესო Quiz-ს გთავაზობთ.
ვილიარეალი VS. ბარსელონა
ლა ლიგის მე-17 ტურის ცენტრალური დაპირისპირება ესტადიო დე ლა კერამიკაზე გაიმართება, სადაც მაყურებელი ვილიარელი-ბარსელონას მატჩს იხილავს. ჰანსი ფლიკის გუნდი პირველი ადგილის გამყარებას შეეცდება, ხოლო მარსელინიოს შეგირდები საჩემპიონო რბოლაში დარჩენას შეეცდებიან.
იმის მიუხედავად, რომ ვილიარეალს ჩემპიონთა ლიგაზე საქმე ძალიან ცუდად აქვს, "ყვითლები" შიდა ჩემპიონატში საოცრად გამოიყურებიან და 16 ტურის თავზე, 35 ქულით, მე-3 პოზიციასაც იკავებენ. რაც შეეხება ბარსელონას, "ბლაუგრანას" ძალიან კარგი სვლა აქვს და ამ შეხვედრას 6-მატჩიანი მოგებათა სერიითაც ხვდება.
გუნდებს საკმაოდ საინტერესო ისტორია აკავშირებთ და მათი დაპირისპირებები ყოველთვის დიდ ყურადღებას იქცევს ხოლმე. ვილიარეალი და ბარსელონაში ჯამში 56-ჯერ დაუპირისპირდნენ ერთმანეთს, საიდანაც 34 კატალონიელებმა მოიგეს, ხოლო 12 "ყვითლებმა“. რაც შეეხება ფრედ დასრულებულ მატჩებს, გუნდები 10-ჯერ დაზავდნენ.
ახლა კი რაც შეეხება გუნდების დანაკლისს. ვილიარეალს ამ შეხვედრაში პაუ კუბანესი, ლოგან კოშტა, ვილი კამბვალა და ჟერარ მორენო დააკლდება, ხოლო ჰანსი ფლიკის განკარგულებაში გავი, არაუხო და დანი ოლმო არ იქნებაინ.
ვილიარეალის სავარაუდო შემადგენლობა: ლუის ჟუნიორი, ფოიტი, მარინი, ვეიგა, პედრასა, ბიუქენანი, კომესანა, გუეი, მოლეირო, პეპე, მიქაუტაძე;
ბარსელონას სავარაუდო შემადგენლობა: გარსია, კუნდე, კუბარსი, მარტინი, ბალდე, პედრი, დე იონგი, იამალი, ფერმინ ლოპესი, რაფინია, რაშფორდი;
გუნდებს შორის ჩატარებულ ბოლო 5 მატჩში მაყურებელმა 27 გატანილი გოლი იხილა, რაც დაგვეთანხმებით ძალიან ბევრია. კვირას გასამართ შეხვედრაშიც მოსალოდნელია, რომ მაყურებელი მოსაწყენ დაპირისპირებას არ იხილავს და წესით და რიგით ბევრ გოლსაც ნახავს.
ამ და სხვა მატჩებზე გააკეთე პროგნოზები “პროგნოზების ლიგაში”.
