La Gazzetta dello Sport Georgia-ზე პროგნოზების ლიგა ახალი სათამაშო კვირით გრძელდება. მონაწილეებს ამ უიქენდზეც შეუძლიათ წინასწარ განსაზღვრულ სპორტულ ღონისძიებებზე პროგნოზების გაკეთება.
მონაწილეთა მიერ გაკეთებული პროგნოზები ფასდება წინასწარ დადგენილი წესებით, რის შემდეგაც შედგება ლიდერბორდი, რომელიც ასახავს თითოეული მონაწილის შედეგებს.
მეხუთე ტურის პროგნოზების მიღება დაწყებულია და დასრულდება 2025 წლის 22 ნოემბერს 16:00 საათზე.
La Gazzetta dello Sport Georgia-ს პროგნოზების ლიგის მხარდაჭერია ნატახტარი.
რა უნდა გავითვალისწინოთ მეხუთე ტურის წინ?
არსენალი - ტოტენჰემი
ნოემბრის სანაკრებო პაუზის დასრულების შემდეგ, პრემიერ ლიგის მოყვარულებს მე-12 ტურში სუპერ დაპირისპირება ელოდებათ - ჩრილო ლონდონური დერბი ემირეითს სთედიუმზე! მიკელ არტეტას საჩემპიონო გზაზე დიდი გამოცდა ელოდება, სადაც მეტოქე ტომას ფრანკის "მამლები“ იქნებიან.
გუნდები ამ შეხვედრას განსხვავებულ ფორმაში ხვდებიან. იმის მიუხედავად, რომ არსენალმა ბოლო ტურში სანდერლენდთან მნიშვნელოვანი ქულები დაკარგა, "მეთოფეებს“ მაინც საოცარი სვლა აქვთ და მიმდინარე სეზონში მხოლოდ 1 წაგებით იწონებენ თავს. რაც შეეხება ტოტენჰემს, ტომას ფრანკის გუნდი არც ისე კარგ ფორმაში ხვდება ამ პრინციპულ დაპირისპირებას. "მამლებმა“ ბოლო ჩატარებული 5 მატჩიდან მხოლოდ ორი მოიგეს, 2-ჯერ დამარცხდენენ და ერთხელ ფრე ითამაშეს.
გუნდები ამ დაპირისპირებას ძალიან დიდი დანაკლისით ხვდებიან. არსენალს ტრავმის გამო გაბრიელ მაგალიაესი, მარტინ ოდეგორი და კაი ჰავერცი ვერ დაეხმარებიან. ხოლო რაც შეეხება გაბრიელ მარტინელის, ნონი მადუეკესა და ვიქტორ გიოკერეშს, მათი თამაში კითხვის ნიშნის ქვეშაა.
რაც შეეხება ტოტენჰემს, არც ტომას ფრანკის გუნდშია ტრავმების მხრივ კარგი სიტუაცია - ლონდონურ დერბის არც მეტი, არც ნაკლები 9 ფეხბურთელი გამოტოვებს. რადუ დრაგუშინი, ჯეიმს მედისონი, დეიან კულუსევსკი, ივ ბისუმა, დომინიკ სოლანკე, ლუკას ბერგვალი, ბენ დევისი, არჩი გრეი, რანდალ კოლო მუანი - ეს ფეხბურთელები სამატჩო განაცხადში არ იქნებიან.
არსენალსა და ტოტენჰემს დიდი ისტორია აკავშირებთ. კლუბები ერთმანეთს ჯამში 197-ჯერ დაუპირისპირდნენ, საიდანაც 84 არსენალმა მოიგო, ხოლო 61 ტოტენჰემმა. რაც შეეხება ფრედ დასრულებულ მატჩებს, გუნდები 52-ჯერ დაზავდნენ.
ზემოხსენებული ტრავმების მიუხედავად, არსენალს შეიძლება ითქვას, რომ მაინც ღრმა შემადგენლობა ჰყავს და მიკელ არტეტა მოედანზე დიდი ალბათობით საკმაოდ ძლიერ შემადგენლობას გამოიყვანს, რასაც ვერ ვიტყოდით ტოტენჰემზე, რომელსაც საკმაოდ ცუდად აქვს საქმე და ბევრი წამყვანი ფეხბურთელი დააკლდება ამ შეხვედრაში.
არსენალის სავარაუდო შემადგენლობა: რაია, ტიმბერი, სალიბა, ინკაპიე, კალაფიორი, ზუბიმენდი, რაისი, საკა, ეზე, ტროსარი, მერინო;
ტოტენჰემის სავარაუდო შემადგენლობა: ვიკარიო, პორო, რომერი, ვან დე ვენი, სპენსი, პალინია, სარი, ბენტანკური, კუდუსი, რიშარლისონი, სიმონსი;
არსენალის კარგი დაცვის მიუხედავად, მოსალოდნელია, რომ მაყურებელი ბევრ გატანილ გოლს იხილავს და არც ეს შეხვედრა გამოდგება მოსაწყენი. როდესაც საქმე ასეთ პრინციპულ მატჩსა და დერბის ეხება, ძნელია ფავორიტის დასახელება, რადგან ერთ კონკრეტულ შეხვედრაში ყველაფერი შეიძლება მოხდეს. ამ ყველაფერს ემატება სატურნირო ცხრილიც - კონკურენტი გუნდები არც ერთ და არც მეორე გუნდს აკლია, შესაბამისად, ამ მატჩს ყურადღებით ბევრი დააკვირდება.
ინტერი - მილანი
სანაკრებო პაუზის შემდეგ კალჩო დერბი დელა მადონინათი ბრუნდება! მატჩი, რომლის დროსაც ქალაქი მილანი ორად იყოფა - ერთ მხარეს შავ-ლურჯები არიან, ხოლო მეორე მხარეს შავ-წითლები. მაყურებელს წინ სეზონის პირველი მილანური დერბი ელოდება, სადაც ძალიან ბევრი რაღაც უნდა გაირკვეს.
როგორც ინტერი, ისე მილანიც ამ პრინციპულ დაპირისპირებას საკმაოდ კარგ ფორმაში ხვდებიან. კრისტიან კივუს გუნდს 4-მატჩიანი მოგებათა სერია აქვს, ხოლო მაქს ალეგრის ბიჭები ამ შეხვედრას 11-მატჩიანი წაუგებელი სერიით ხვდებიან. ინტერი ნაპოლისთან ერთად ჩემპიონატს 24 ქულით ლიდერობს, რაც შეეხება მილანს, „როსონერი“ 22 ქულით სატურნირო ცხრილში მე-3 პოზიციას იკავებს.
სეზონის წინ, ორივე გუნდმა მთავარი მწვრთნელი შეცვალა და სეზონის 1/3 გასვლის შემდეგ, თამამად შეგვიძლია იმის თქმა, რომ მათი სამუშაო წარმატებით მიმდინარეობს. იმის მიუხედავად, რომ კრისტიან კივუს ბევრი ეჭვის თვალით უყურებდა, რუმინელმა კრიტიკოსების გაჩუმება მოახერხა და სიმონე ინძაგის მიერ დატოვებულ გუნდს საკმაოდ კარგი ფეხბურთის ჩვენება დააწყებინა.მეორე მხარეს მასიმილიანო ალეგრია, რომელიც მილანში დაბრუნდა მისიით, რომელსაც სკუდეტოს მოგება ჰქვია. მედ მაქსს მილანში ყველა კარგად იცნობს და მისი თავიდანვე ყველას სჯეროდა. იმის მიუხედავად, რომ გუნდმა ბოლო ტურებში შედარებით სუსტ მეტოქეებთან მნიშვნელოვანი ქულები დაკარგა, მილანის შავ-წითელ მხარეში მაქს ალეგრის მიერ გაწეული სამუშაოთი ყველა კმაყოფილია.
რაც შეეხება მილანური გუნდების დაპირისპირებას გასულ წლებში. ინტერი და მილანი ერთმანეთს 228-ჯერ შეხვდნენ, საიდანაც უფრო მეტი, კერძოდ 85 "ნერაძურიმ“ მოიგო. მილანის მოგებათა მაჩვენებელი 74 მატჩს ითვლის, ხოლო გუნდებმა მატჩი ფრედ ჯამში 69-ჯერ დაასრულეს.
ინტერი დერბის საკმაოდ სერიოზული დანაკლისით ხვდება. დენზელ დუმფრისი და ჰენრიკ მხითარიანი მილანთან შეხვედრას გამოტოვებენ, რაც კრისტიან კივუსთვის უდიდეს დანაკლისს ნიშნავს. მეორეს მხრივ, მილანში კარგი სიტუაციაა, სადაც ტრავმა თითქმის ყველა ფეხბურთელმა მოირჩინა. ადრიენ რაბიომ გუნდთან ერთად ვარჯიში დაიწყო და ფრანგი ინტერთან ითამაშებს, ხოლო რაც შეეხება სანტიაგო ხიმენესს, მექსიკელიც ახლოსაა დაბრუნებასთან და შეიძლება კვირას გასამართ დაპირისპირებაში მონაწილეობა მანაც მიიღოს.
ინტერის სავარაუდო შემადგენლობა: ზომერი, აკანჯი, ბისეკი, ბასტონი, აუგუსტო, ბარელა, ჩალჰანოღლუ, ჟელინსკი, დიმარკო, ტურამი/ბონი, მარტინესი;
მილანის სავარაუდო შემადგენლობა: მენიო, ტომორი, გაბია, პავლოვიჩი, სალმაკერსი, ფოფანა, მოდრიჩი, რაბიო, ბარტეზაგი, პულისიკი, ლეაო;
სეზონის პირველ დერბი დელა მადონინაში მაყურებელი სანახოაბრივ დაპირისპირებას ელოდება, სადაც წესით და რიგით ბევრ გატანილ გოლს ვიხილავთ. გუნდებმა ბოლო 5 ჩატარებულ შევხედრაში ჯამში 15 გოლის გატანა მოახერხეს, რაც ცოტა ნამდვილად არაა.
ამ და სხვა მატჩებზე გააკეთე პროგნოზები “პროგნოზების ლიგაში”.
