La Gazzetta dello Sport Georgia-ზე პროგნოზების ლიგა დაბრუნდა. მცირე პაუზის შემდეგ, მონაწილეებს ისევ შეუძლიათ წინასწარ განსაზღვრულ სპორტულ ღონისძიებებზე პროგნოზების გაკეთება.
მონაწილეთა მიერ გაკეთებული პროგნოზები ფასდება წინასწარ დადგენილი წესებით, რის შემდეგაც შედგება ლიდერბორდი, რომელიც ასახავს თითოეული მონაწილის შედეგებს.
მესამე ტურის პროგნოზების მიღება დაწყებულია და დასრულდება 2025 წლის 8 ნოემბერს 14:00 საათზე.
La Gazzetta dello Sport Georgia-ს პროგნოზების ლიგის მხარდაჭერია ნატახტარი.
რა უნდა გავითვალისწინოთ მესამე ტურის წინ?
ტოტენჰემი - მანჩესტერ იუნაიტედი
პრემიერ ლიგის ამ ტურში რამდენიმე გამორჩეული დაპირისპირება გველოდება, ერთ-ერთს კი ქალაქი ლონდონი უმასპინძლებს. მაყურებელს წინ საკმაოდ საინტერესო დაპირისპირება ელოდება, სადაც ერთმანეთს ტომას ფრანკის ტოტენჰემი და რუბენ ამორიმის მანჩესტერ იუნაიტედი შეხვდებიან.
ამ მატჩს ტოტენჰემი კარგ ხასიათზე ხვდება - "მამლებმა" შუა კვირაში ჩემპიონთა ლიგის მატჩი ჩაატარეს, სადაც კოპენჰაგენს 4 უპასუხო გოლი გაუტანეს. იმის მიუხედავად, რომ ტომას ფრანკის გუნდი ბოლო ტურში ლონდონურ დერბიში დამარცხდა, ფანები იუნაიტედთან დაპირისპირებას მაინც იმედიანად ხვდებიან.
რაც შეეხება ოლდ ტრაფორდის ბინადრებს, რუბენ ამორიმის გუნდს საკმაოდ კარგი პერიოდი უდგას. "წითელი ეშმაკები" უკვე 4 მატჩია, რაც არ აგებენ და ასეთ კარგ ფორმაშიც დიდი ხანია არ ყოფილან. ტოტენჰემსა და მანჩესტერ იუნაიტედს საკმაოდ დიდი ისტორია აკავშირებთ. გუნდები ერთმანეთს ჯამში 192-ჯერ დაუპირისპირდნენ, საიდანაც 93 გამარჯვება მანჩესტერ იუნაიტედს დარჩა, ხოლო 53-ჯერ ტოტენჰემმა იმარჯვა. რაც შეეხება ფრედ დასრულებულ შეხვედრებს, გუნდები ჯამში 46-ჯერ დაზავდნენ, რაც ცოტა ნამდვილად არაა.
ტოტენჰემი ამ მატჩს კვლავ დიდი დანაკლისით ხვდება. ტომას ფრანკის გუნდში ტრავმები რადუ დრაგუშინს, ჯეიმს მედისონს, დეიან კულუსევსკის, ივ ბისუმასა და დომინიკ სოლანკეს აწუხებთ, ხოლო რაც შეეხება მანჩესტერ იუნაიტედს, რუბენ ამორიმი ამ მატჩს ოპტიმალური შემადგენლობით ხვდება. ერთადერთი ფეხბურთელი, რომელიც განაცხადში არ იქნება ლისანდრო მარტინესია.
ტოტენჰემის სავარაუდო შემადგენლობა: ვიკარიო, პორო, რომერო, ვან დე ვენი, უდოჯი, პალინია, სარი, ბენტანკური, ტელი, სიმონსი, რიშარლისონი.
მანჩესტერ იუნაიტედის სავარაუდო შემადგენლობა: ლამენსი, იორო, დე ლიხტი, შო, დიალო, კაზემირო, ფერნანდეში, დალო, მბიუმო, შეშკო, კუნია.
იმის მიუხედავად, რომ გუნდებს შორის ბოლო ორ დაპირისპირებაში ჯამში სულ 2 გოლი გავიდა, ამ მატჩში მოსალოდნელია, რომ ბევრ გატანილ გოლს ვიხილავთ. გუნდებმა ამ სეზონში 17-17 გოლის გატანა მოახერხეს, ხოლო საკუთარ კარში ტოტენჰემმა 8, ხოლო იუნაიტედმა 16 ბურთი მიიღო.
შეგახსენებთ, გუნდებმა ბოლოს ევროპა ლიგის ფინალში ითამაშეს, სადაც ტოტენჰემმა მეტოქეს მინიმალური ანგარიშით, 1-0 მოუგო და ნანატრ ტიტულს დაეუფლა.
მანჩესტერ სიტი - ლივერპული
პრემიერ ლიგის კლასიკა, სადაც ძალიან ბევრი რაღაც უნდა გადაწყდეს. პეპ გვარდიოლას გუნდი ამ შეხვედრას შედარებით კარგ ფორმაში ხვდება, თუმცა არც არნე სლოტის გუნდი ჩადის ეტიჰადზე უხასიათოდ - მერსისაიდელებმა ცუდი სტარტის შემდეგ, ზედიზედ ორი მატჩის მოგება მოახერხეს, თანაც ერთი რეალ მადრიდი იყო, რომელსაც პირწმინდად აჯობეს.
შუა კვირაში ორივე გუნდმა ჩემპიონთა ლიგაზე ითამაშა. სიტიმ საკმაოდ მარტივი გამარჯვება მოიპოვა - გვარდიოლას გუნდმა დორტმუნდს 4-1 მოუგო. თავისი მორიგი გოლი გაიტანა ერლინგ ჰოლანდმა, რომელიც საუცხოო ფორმაშია. რაც შეეხება ლივერპულს, როგორც უკვე ზემოთ ვახსენეთ, სლოტის შეგირდებმა რეალ მადრიდს არაფერი დაუთმეს და დამსახურებული გამარჯვებაც მოიპოვეს.
მანჩესტერ სიტი ამ დაპირისპირებას მინიმალური დანაკლისით ხვდება - ტრავმა მხოლოდ მატეო კოვაჩიჩს აწუხებს, ხოლო რაც შეეხება ლივერპულს, არნე სლოტი ამ პრინციპულ დაპირისპირებას ალისონ ბეკერის, ჯოვანი ლეონისა და ჟერემი ფრიმპონგის გარეშე შეხვდება. ალექსანდერ ისაკის ამბავი მატჩამდე რამდენიმე საათით ადრე გადაწყდება, რადგან არის შანსი შვედი ფორვარდი სამატჩო განაცხადში მოხვდეს.
მანჩესტერ სიტის სავარაუდო შემადგენლობა: დონარუმა, ნუნიეში, დიაში, გვარდიოლი, ო’რაილი, გონსალესი, რეინდერსი, ფოდენი, შერკი, ჰოლანდი, დოკუ.
ლივერპულის სავარაუდო შემადგენლობა: მამარდაშვილი, ბრედლი, კონატე, ვან დაიკი, რობერტსონი, მაკ ალისტერი, გრავენბერხი, სობოსლაი, სალაჰი, ეკიტიკე, გაკპო.
რაც შეეხება ისტორიასა და წინა წლებში გამართულ მატჩებს - მანჩესტერ სიტი და ლივერპული ჯამში 194-ჯერ დაუპირისპირდნენ ერთმანეთს, საიდანაც მერსისაიდულმა კლუბმა 92 მატჩი მოიგო, ხოლო სიტიმ 52-ჯერ მოახერხა მეტოქის დამარცხება. ფრედ დასრულებულ მატჩებს რაც შეეხება, გუნდები 50-ჯერ დაზავდნენ.
ჩვენი ვარაუდით, მაყურებელი საკმაოდ გახსნილ მატჩს იხილავს და მოსალოდნელია, რომ ორივე გუნდი გოლის გატანას მოახერხებს. ამ მატჩის ანგარიში ძალიან მნიშვნელოვანი იქნება მიკელ არტეტას არსენალისთვისაც, რადგან სწორედ ეს ორი გუნდია "მეთოფეების" მთავარი კონკურენტი.
მანჩესტერ სიტი-ლივერპულისმატჩთან დაკავშირებით LaGazzetta.ge ქვიზს გთავაზობთ, სადაც საინტერესო კითხვებს შეხვდებით.
ლიონი - პსჟ
საფრანგეთში ტურის ცენტრალური მატჩი ლიონში გაიმართება, სადაც ადგილობრივი გუნდი პარი სენ-ჟერმენს დაუპირისპირდება. გუნდები ამ შეხვედრას არც ისე კარგ ფორმაში ხვდებიან, თუმცა ამის მიუხედავად, მოსალოდნელია, რომ საინტერესო დაპირისპირება გამოცხვება.
იმის მიუხედავად, რომ სეზონის დაწყების წინ ლიონი რამდენიმე ლიდერმა დატოვა, პაულუ ფონსეკამ მოახერხა და მწირი რესურსით "Les Gones" ანგარიშგასაწევი გუნდი გახადა. შემადგენლობას, რომ ჩავხედოთ, ძალიან ბევრ უცნობ მოთამაშეს აღმოვაჩენთ, თუმცა ეს ლიონისთვის პრობლემას ნაკლებად წარმოადგენს, რადგან გუნდი 20 ქულით, მე-6 პოზიციაზე იმყოფება და ლიდერ პარი სენ-ჟერმენს მხოლოდ 4 ქულით ჩამორჩება.
ახალი სეზონი საკმაოდ მძიმედ დაიწყო პარიზულმა გრანდმა, რომელიც ამ პრინციპულ მატჩს ძალიან დიდი პრობლემებით ხვდება. აშრაფ ჰაკიმი, ნუნუ მენდეში, დეზირე დუე და უსმან დემბელე - ეს 4 ფეხბურთელი ლუის ენრიკეს განკარგულებაში არ იქნება, შესაბამისად, ლიონის შანსები ამ მატჩში საგრძნობლად იზრდება.
ლიონის სავარაუდო შემადგენლობა: გრეიფი, მატლანდ-ნაილსი, ნიახატე, მატა, ტალიაფიკო, ტესმანი, მორტონი, ტოლისო, სულცი, მორეირა, სატრიანო.
პარი სენ-ჟერმენის სავარაუდო შემადგენლობა: შევალიე, ბერალდო, მარკინიოსი, პაჩო, ერნანდესი, ზაირე-ემერი, ვიტინია, რუისი, ბარკოლა, რამუში, კვარაცხელია.
ლიონსა და პარი სენ-ჟერმენს საკმაოდ დიდი ისტორია აკავშირებთ. გუნდები ერთმანეთს 111-ჯერ დაუპირისპირდნენ, საიდანაც 51 პარიზულმა გუნდმა მოიგო, ხოლო 34 ლიონმა. ფრედ დასრულებულ მატჩებს რაც შეეხება, გუნდები 26-ჯერ დაზავდნენ. როდესაც ლიონი და პსჟ ერთმანეთს ეთამაშებიან, მაყურებელი ყოველთვის ბევრ გატანილ გოლს ელოდება.
ამ ორ გუნდს შორის ჩატარებულ ბოლო 5 მატჩში ჯამში 22 გოლი გავიდა, რაც იმის ფიქრის საფუძველს გვაძლევს, რომ კვირას გასამართ შეხვედრაშიც ბევრ გატანილ გოლს ვიხილავთ.
ამ და სხვა მატჩებზე გააკეთე პროგნოზები “პროგნოზების ლიგაში”.
