ქართველები ჩემპიონთა ლიგაზე - კაშია, კიტეიშვილი და აზაროვი ევროპის საუკეთესო გუნდების პირისპირ

კაშიას ნამდვილად საოცარი წელი გამოუვიდა. ისე მოხდა, რომ კარიერის საუკეთესო მომენტები ცხოვრებამ მას ბოლოსთვის შემოუნახა. ვეტერანი უკანახაზელი "ჯვაროსნებთან" ერთად ევრო 2024-ზე მოხვდა და ნაკრებს უკაპიტნა, დღეს კი ქართველი ცენტრბექი ევროპის ყველაზე პრესტიჟულ საკლუბო ტურნირზე დებიუტისთვის ემზადება.

სლოვანის მოწინააღმდეგე სელტიკი იქნება. გურამი ამ გუნდს აქამდე არასდროს შეხვედრია, თუმცა შოტლანდიის ნაკრების წინააღმდეგ, თანაც შოტლანდიაში თამაშის გამოცდილება მას აქვს. გლაზგოელების შემდეგ, ლიგაზე ბრატისლაველთა მეტოქეები იქნებიან: მანჩესტერ სიტი, ჟირონა, ზაგრების დინამო, მილანი, მადრიდის ატლეტიკო, შტუტგარტი და მიუნხენის ბაიერნი.

როგორც ვხედავთ, სლოვაკებს ურთულესი გზა აქვთ გასავლელი. საქართველოს ნაკრების კაპიტანს დაპირისპირება მოუწევს ჰარი კეინთან, ანტუან გრიზმანთან, ერლინგ ჰოლანდთან, რაფა ლეაუსა და სხვებთან. ყველაზე მრისხანე მეტოქედ, ჯერჯერობით "რეკორდმაისტერი" გამოიყურება, რომელმაც ხორვატული კლუბი 9:2 გაანადგურა.

აზაროვი საქართველოს ნაკრების განკარგულებაში არ ყოფილა ევროპის ჩემპიონატზე, თუმცა სექტემბრის შეხვედრებისთვის ის დაბრუნდა. დღეს, შახტარის მეტოქე ბოლონია იქნება, რომელიც ევროპის ყველაზე პრესტიჟულ საკლუბო ტურნირზე 60 წლის მანძილზე ვერ ხვდებოდა. ფავორიტად მოიაზრება "როსობლუ", მაგრამ წინა სეზონთან შედარებით, ეს გუნდი შესუსტებულია.

"ლურჯ-წითლების" შემდეგ, დონეცკელების მოწინააღმდეგეები იქნებიან: ატალანტა, არსენალი, იანგ ბოიზი, პსვ, ბაიერნი, ბრესტი და დორტმუნდი. როგორც ვხედავთ, მიუნხენელებთან დაპირისპირებას, ვლადიმირ ვაისის გუნდის მსგავსად, ვერც "მაღაროელები" აცდებიან. რაც შეეხება ქართველ განაპირა მცველს, გასულ სეზონში ლიგაზე, ბარსელონასთან შესრულებული ასისტით, მან თავი ნამდვილად დაგვამახსოვრა.

19 სექტემბერს, ჩემპიონთა ლიგაზე თავის შეხვედრას გამართავს კიტეიშვილის შტურმ გრაციც, რომელიც დებიუტანტ ბრესტს ესტუმრება. ავსტრიის ბუნდესლიგის მოქმედი ჩემპიონის შემდეგი მეტოქეები: ბრიუგე, ლისაბონის სპორტინგი, დორტმუნდის ბორუსია, ჟირონა, ლილი, ბერგამოს ატალანტა, ლაიფციგი.

როგორც ვხედავთ, ავსტრიული გუნდის მიერ გასავლელი გზა შეუძლებელი ნამდვილად არ არის. შეგახსენებთ იმასაც, რომ ქართველი ნახევარმცველი ბუნდესლიგის წლის საუკეთესო მოთამაშის ჯილდოსთვის იბრძვის. ლიგაზე გაბრწყინების შემთხვევაში, ოთარის მოგების შანსები მნიშვნელოვნად გაიზრდება.

სლოვანის მეტოქეები - სელტიკი, მანჩესტერ სიტი, ჟირონა, დინამო ზაგრები, მილანი, ატლეტიკო, შტუტგარტი, ბაიერნი;

შახტარის მეტოქეები - ბოლონია, ატალანტა, არსენალი, იანგ ბოიზი, პსვ, ბაიერნი, ბრესტი, დორტმუნდი;

შტურმის მეტოქეები - ბრესტი, ბრიუგე, სპორტინგი, დორტმუნდი, ჟირონა, ლილი, ატალანტა, ლაიფციგი.