წარმოგიდგენთ ქართველ ფეხბურთელებს, რომლებიც ეროვნული ჩემპიონატიდან პირდაპირ ევროპის ტოპ ხუთ ლიგაში მოხვდნენ. მომენტი, როცა საქართველოს პირველობიდან დიდ ევროპულ ფეხბურთამდე მხოლოდ ერთი ნაბიჯია.
გიორგი აბუაშვილი | კოლხეთიდან - მეცში, იჯარა
მეცში ქართველი ლეგიონერების დიასპორას დასაბამი დაუდო გიორგი მიქაუტაძემ, რომელმაც ფრანგულ გუნდში წარუშლელი კვალი დატოვა. დღეს, ლოთარინგიაში თამაშობენ გიორგი წიტაიშვილი და გიორგი აბუაშვილი, ამ ორიდან ერთ-ერთი კი ტოპ 5 ლიგაში საქართველოს პირველობიდან მოხვდა.
საუბარია კოლხეთის საკუთრებაში მყოფი თავდამსხმელის შესახებ, რომელიც "ლე გრენამ" განათხოვრების წესით აიყვანა. ცნობისთვის, ქართველმა ფორვარდმა სენ-სიმფორიენზე უკვე 2 შეხვედრის ჩატარებაც მოასწრო. მისი უმთავრესი მისია საფრანგეთის უმაღლეს დივიზიონში სტეფან ლე მინანის გუნდისთვის ადგილის შენარჩუნება იქნება.
საბა გოგლიჩიძე | ტორპედოდან - ემპოლიში, €450 ათასი
გოგლიჩიძემ ხმაურიანად შეაბიჯა იტალიური ფეხბურთის სამყაროში და სადებიუტო სეზონში მიაღწია ისტორიულ შედეგს - ემპოლი მასთან ერთად კოპა იტალიას 1/2 ფინალში გავიდა. ტოსკანელებმა გზად მოუგეს ტურინის იუვენტუსს და ამ ყველაფრის მონაწილე საბაც იყო. დღეს, ქართველი უკანახაზელი უკვე უდინეზეს მოთამაშეა.
აღსანიშნავია ის ფაქტი, რომ "ლურჯებმა" ტორპედოს ყოფილი ცენტრალური მცველის "ზებრებში" გაყიდვით კოლოსალური მოგება ნახეს. თავად განსაჯეთ: 450 000-ად ნაყიდი მოთამაშე კასტელანის ბინადრებმა გაასხვისეს 4 მილიონად, რაც თითქმის 9-ჯერ უფრო დიდი თანხაა. ყველაფერი კი ქუთაისურ კლუბში იწყებოდა.
ლევან ყენია | ლოკომოტივიდან - შალკეში, €500 ათასი
უნიჭიერესი გამთამაშებელი, რომელმაც შალკეში გადასვლამდე გაიბრწყინა ლოკომოტივში, ასევე საქართველოს ნაკრების სხვადასხვა ასაკობრივ ეროვნულ გუნდებში, მათ შორის მთავარშიც. სამწუხაროდ, ხშირმა ტრავმიანობამ და რეაბილიტაციის პროცესში არსებულმა პრობლემებმა ლევანს ათამაშების საშუალება არ მისცა.
ქართველმა გამთამაშებელმა გელზენკირხენში მოასწრო მხოლოდ 14 მატჩის ჩატარება, რომელშიც მან გაიტანა ერთი გოლი და გააკეთა სამი ასისტი. "მაღაროელების" დატოვების შემდეგ, თბილისური კლუბის აღზრდილმა ფლეიმეიქერმა მოიარა არაერთი გუნდი, მაგრამ ჩვეულ ფორმაში ჩადგომა ვერ შეძლო.
გიორგი ქინქლაძე | დინამო თბილისიდან - მან სიტიში, €4 მილიონი
მან სიტიში გადასვლამდე ქინქლაძე აღმოჩნდა თავდაპირველად მეორე ბუნდესლიგის ბინადარ საარბრიუკენში, მოგვიანებით კი ბოკა ხუნიორსშიც კი. ამის გარდა, გიორგი საცდელი ვადით რეალსა და ატლეტიკოშიც იყო. მანჩესტერულ კლუბში ტრანსფერამდე მან ჩაატარა კარიერის საუკეთესო სეზონი დინამოში, რომელშიც 30 შეხვედრაში 19 ბურთი შეაგდო.
რაც შეეხება ქართველი გამთამაშებლის ინგლისურ კარიერას, ეს არის მემკვიდრეობა, რომელიც დღემდე აქტუალური და ფასდაუდებელია. სამწუხაროდ, თბილისური კლუბის აღზრდილმა ფლეიმეიქერმა "ქალაქელებთან" ერთად ინგლისის უმაღლეს დივიზიონში ჩაატარა მხოლოდ 1 სეზონი, მაგრამ წლების შემდეგ, ის ამ ადგილას დერბი ქაუნთისთან ერთად დაბრუნდა.
ლევან კობიაშვილი | დინამო თბილისიდან - ფრაიბურგში, იჯარა-გამოსყიდვა, €125 ათასი
კობიაშვილი დინამოდან თავდაპირველად გადავიდა ვლადიკავკაზის ალანიაში, თუმცა ამ გუნდში ის განათხოვრების წესით თამაშობდა. ფრაიბურგში ტრანსფერი მოხდა უშუალოდ თბილისიდან, 125 000-ის სანაცვლოდ. გასათვალისწინებელია ისიც, რომ გერმანულმა კლუბმა ლევანი ჯერ აიყვანა იჯარით, ქვედა ლიგაში თამაშის დროს.
ქართველი ნახევარმცველის გამოსყიდვის მომენტში კი ბრისგაუელები უკვე ბუნდესლიგაში ასპარეზობდნენ. ალექსანდრე იაშვილსა და ლევან ცქიტიშვილთან ერთად, შალკეს ყოფილი შუახაზელი სრულიად დამსახურებულად ითვლება "არწივების" ისტორიაში ერთ-ერთ საუკეთესო ლეგიონერად.
გიორგი ქოჩორაშვილი | საბურთალოდან - ლევანტეში, €250 ათასი
ქოჩორაშვილს ჰქონდა ხანმოკლე პერიოდი ჟირონას აკადემიაში, იმ დროს, როდესაც აღნიშნული გუნდი ლა ლიგაში აღზევდა. უფრო დასამახსოვრებელი კი გიორგი აღმოჩნდა ლევანტეში, სადაც 250 000-ის სანაცვლოდ გადავიდა. დიახ, თავდაპირველად ის იყო ახალგაზრდულ გუნდში, მაგრამ თავის სადებიუტო სეზონში ქართველ შუახაზელს 1 შეხვედრა პრიმერაშიც აქვს.
ეს მოხდა რეალ ბეტისის წინააღმდეგ გამართულ მატჩში, რომელშიც "ლურჯ-წითლების" ნახევარმცველმა მოედანზე სულ რაღაც ერთი წუთი გაატარა. მოგვიანებით, ვალენსიელთა მე-6 ნომერი პრიმერა დივიზიონში კიდევ 3 შეხვედრას ჩაატარებს. დღეს, ის უკვე ლისაბონის სპორტინგის მოთამაშეა.
ხვიჩა კვარაცხელია | დინამო ბათუმიდან - ნაპოლიში, €13.3 მილიონი
ქართული ფეხბურთის მთავარი ვარსკვლავი, რომლის კარიერა დინამო თბილისში იწყებოდა. შემდეგ იყო რუსთავი, რუსული გუნდები, დინამო ბათუმი და ტოპ 5 ლიგა. კვარამ ნაპოლის შემადგენლობაში პირველივე სეზონში მოიგო სკუდეტო, შემდეგ კი 70 მილიონად პარის სენ-ჟერმენში გადავიდა.
პსჟ-ს რიგებში ხვიჩა დაეუფლა პრაქტიკულად ყველა ტიტულს, რაც კი შეიძლებოდა, მათ შორის სანატრელ ჩემპიონთა ლიგის თასსაც. დიახ, ქართველ ვინგერს ევროპის მთავარი საკლუბო ტურნირის მოსაგებად "ლურჯ-წითლებში" სულ რაღაც რამდენიმე თვე დასჭირდა. მისი დაუჯერებელი თავგადასავალი კიდევ დიდხანს გაგრძელდება.
გიორგი კვერნაძე | კოლხეთიდან - ფროზინონეში, იჯარა-გამოსყიდვა, €900 ათასი
კვერნაძე ფროზინონეში გადავიდა მაშინ, როდესაც ეს გუნდი სერია ა-ში გამოდიოდა. თავდაპირველად განათხოვრების წესით, მოგვიანებით, "ჯალოაძურიმ" გიორგი კოლხეთიდან 900 000-ად გამოისყიდა. მოკრძალებული კლუბის უმთავრესი მისია არის კალჩოს ელიტაში დაბრუნება და ამ ყველაფერში "ლურჯ-ყვითლებს" ქართველი ვინგერი ეხმარება.
ბენიტო სტირპეს ბინადრების გარემარბმა უკვე მოასწრო 45 მატჩის ჩატარება, რომელშიც გაიტანა ოთხი გოლი და გააკეთა ხუთი საგოლე გადაცემა. გასულ ზაფხულს 22 წლის ვინგერის სახელს უკავშირებდნენ კალჩოს რამდენიმე კლუბს, მაგრამ სრულფასოვან ტრანსფერამდე საქმე არ მისულა.
გიორგი მამარდაშვილი | დინამო თბილისიდან - ვალენსიაში, იჯარა-გამოსყიდვა, €3.85 მილიონი
მეკარე, რომელიც ლა ლიგაში თავის პოზიციაზე მალევე გახდა ერთ-ერთი საუკეთესო. განათხოვრების წესით ლოკომოტივსა და შემდეგ, ვალენსიაში ბრწყინვალე ასპარეზობას მამარდაშვილმა მოგვიანებით დაუმატა დაუვიწყარი პერფომანსები საქართველოს ეროვნულ გუნდშიც. გიორგის კარიერის საუკეთესო მომენტი? ევრო 2024!
ქართველმა მეკარემ ევროპის ჩემპიონატზე ნამდვილად მთელი საფეხბურთო სამყაროს ყურადღება მიიქცია. ლივერპულს მის სანაცვლოდ 30 მილიონის გადახდაც კი არ დაეზარა და დღეს, დინამოს აღზრდილი გოლკიპერი სამომავლოდ ალისონ ბეკერის შემცვლელად მოიაზრება. გამოსარჩევია ისიც, რომ "ღამურებმა" 24 წლის გოლკიპერის გაყიდვით თითქმის 10-ჯერ უფრო დიდი მოგება ნახეს.
ვახტანგ სალია | დინამო თბილისიდან - ნიუკასლში, €800 ათასი
თუ ვსაუბრობთ ქართული ფეხბურთის მომავალზე, პირველ რიგში უნდა ვახსენოთ სალია, რომელიც 18 წლის ასაკში უკვე ნიუკასლ იუნაიტედის მოთამაშეა. ვახტანგის ხელში ჩაგდებას თავდაპირველად ცდილობდა ბეტისი, ასევე მას აკვირდებოდნენ ტოპ კლუბებიც, მაგრამ ყველაზე ოპერატიულად "კაჭკაჭებმა" იმოქმედეს.
სამწუხაროდ, ტრავმის გამო ქართველი თავდამსხმელის დებიუტი "ჯორდების" შემადგენლობაში გადაიდო. ახალგაზრდა შემტევი მოედანს წლის ბოლოსთვის დაუბრუნდება. რაც შეეხება დინამოს ყოფილი მე-7 ნომრის გუნდს, ამ ეტაპზე ის სენტ ჯეიმს პარკის ბინადრების U21-ში განიხილება.
ასევე გამოსარჩევია: რატი ალექსიძე (დინამო თბილისიდან - ჩელსიში), რევაზ არველაძე (დინამო თბილისიდან - კიოლნში), მიხეილ ყაველაშვილი (დინამო თბილისიდან - მან სიტიში), ლუკა კიკაბიძე (ლოკომოტივიდან - ბასტიაში), ამირან სანაია (ზესტაფონიდან - ლე მანში), ლევან ცქიტიშვილი (დინამო თბილისიდან - ფრაიბურგში).
