ჟოზე მოურინიო მადრიდის რეალში - ლეგენდარული მწვრთნელის კარიერის ყველაზე არაერთგვაროვანი პერიოდი. გულშემატკივრების ნაწილი მიიჩნევს, რომ "სამეფო კლუბის" 2000-იანების კრიზისიდან ამოსვლა დაიწყო სწორედ პორტუგალიელი სპეციალისტით და მან მათი საყვარელი გუნდისთვის რეალურად ბევრი კარგი რამ გააკეთა.
ლა ლიგის ჩემპიონობა 100 ქულით, ასევე ესპანეთის თასისა და სუპერ თასის ფინალებში ბარსელონას დამარცხება. ამის გარდა, გამოსარჩევია ისიც, რომ მილანის ინტერის ყოფილ დამრიგებელთან ერთად, სანტიაგო ბერნაბეუს ბინადრებმა 7-წლიანი პაუზის შემდეგ, ევროპის მთავარი საკლუბო ტურნირის 1/2 ფინალში პირველად ითამაშეს.
ჩვენ მივეჩვიეთ რეალის გამარჯვებებს ჩემპიონთა ლიგაზე, თუმცა 2003 წლიდან - 2010-მდე, ევროპის ყველაზე ტიტულოვანი გუნდი როგორც აღვნიშნეთ, 1/2 ფინალამდეც კი შორს იყო. დიახ, მომდევნო წლებში კარლო ანჩელოტიმ და ზინედინ ზიდანმა "განსაკუთრებულის" აღნიშნული მიღწევა სრულიად გააბათილეს, მაგრამ იმ პერიოდში მადრიდელთათვის ეს მართლაც წინგადადგმული ნაბიჯი იყო.
რაც შეეხებათ "სამეფო კლუბის" გულშემატკივრების იმ კატეგორიას, ვინც 63 წლის მწვრთნელს იხსენებს უარყოფითად, მათ ამისთვის აქვთ სამი მიზეზი: 0:5 კატალონიელებთან, რობერტ ლევანდოვსკის პოკერი და კონფლიქტი მოთამაშესთან, რომელიც გუნდის სიმბოლოდ მარადიულად დარჩა.
საუბარია იკერ კასილასზე, ვისაც სანტიაგო ბერნაბეუზე დამსწრე პუბლიკამ "წმინდანი" უწოდა. 2011 წლის აპრილში "ბლაუგრანასთან" ფრედ დასრულებული შეხვედრის შემდეგ მოურინიო გასახდელში შევარდა ყვირილით: "თამაშამდე 4 საათით ადრე რეალის შემადგენლობა უკვე ტელევიზიაში იყო გაჟღერებული!
როგორ უნდა გავაკვირვოთ ვინმე, როდესაც მადრიდულ გუნდში ვიღაც მოღალატეა? ვინც არ უნდა იყოს, მე ამ ვირთხას ვიპოვი!". პორტუგალიელი სპეციალისტის ეჭვები საბოლოოდ შეჩერდა ესპანელ გოლკიპერზე, იმ პერიოდში სპორტული ჟურნალისტის, სარა კარბონეროს საქმროზე, მაგრამ ფრით უკმაყოფილო ის მხოლოდ ინფორმაციის გაჟონვის გამო არ ყოფილა.
მიზეზი ისიც იყო, რომ შურისძიება არ შედგა - პირველ წრეში "სამეფო კლუბი" კამპ ნოუზე ანგარიშით 0:5 განადგურდა. სპეკულაციები ჟოზესა და ბერნაბეუს ბინადრების კაპიტნის კონფლიქტის შესახებ აქტუალური რჩებოდა თვეების მანძილზე, 2012 წლის 22 დეკემბერს კი აგორდა ახალი ტალღა, როცა მალაგასთან შეხვედრის წინ, ვარსკვლავური გოლკიპერი სათადარიგოთა სკამზე აღმოჩნდა.
მოურინიოს გუნდი იმ მატჩში დამარცხდა, თუმცა ქულების დაკარგვაზე უფრო სენსაციური მოვლენა ესპანეთის ნაკრების პირველი ნომრის ძირითადის მიღმა ყოფნა გამოდგა. "მე გავაანალიზე სიტუაცია და შემადგენლობა ავარჩიე. შეგიძლიათ რაც გინდათ მოიგონოთ, მაგრამ ეს ნამდვილად ტექნიკური გადაწყვეტილებაა.
ადანი ამ მომენტში უკეთეს ფორმაშია, ხოლო ჩვენი პრობლემები გაცილებით უფრო გლობალურია. რეალი ბევრ ასპექტში სათანადოდ ვერ ფუნქციონირებს, განსაკუთრებით, დაცვით ფაზაში", - ამტკიცებდა პორტუგალიელი სპეციალისტი ანდალუსიაში წაგებული შეხვედრის დასრულების შემდეგ.
მოურინიოს ჩემთვის არაფერი უთქვამს. ჩვენ ნორმალური ურთიერთობა გვაქვს, თუმცა ის თავის გადაწყვეტილებებს არასდროს ხსნის. დამრიგებელი მიიჩნევს, რომ ადანი ამ ეტაპზე უკეთესია და მე აღნიშნულ მოსაზრებას პატივი უნდა ვცე. სინამდვილეში, ჩემს შეცვლაზე მეტად წაგებამ უფრო დამწყვიტა გული", - ეს კი კასილასის სიტყვებია.
პრესამ პორტუგალიელ მწვრთნელს არ დაუჯერა. ამის რამდენიმე მიზეზი არსებობდა. დამრიგებელსა და ადგილობრივ ჟურნალისტებს შორის ურთიერთობა თავიდანვე ვერ აეწყო, ბოლოს კი მათი საუბრები უბრალოდ ღია დაპირისპირებაში გადაიზარდა. ისინი იძულებულნი იყვნენ ერთმანეთი აეტანათ, მაგრამ მოთმინების ძალა უკვე თითქმის აღარ რჩებოდა.
სწორედ აქედან მოდიოდა პრესკონფერენციებზე გაუთავებელი ურთიერთსარკაზმი და სიტყვიერი შებრძოლებები, რომლებიც ზოგჯერ აშკარა შეურაცხყოფის ზღვარსაც კი უახლოვდებოდა. ესპანელი გოლკიპერი თავის მხრივ იყო ქვეყნის სახე და მედია ფავორიტი, ბოლოს და ბოლოს, მადრიდელთა აღზრდილი მოთამაშე და გუნდის კაპიტანი.
რთული მისახვედრი არ არის, თუ ვის მხარეს აღმოჩნდნენ ჟურნალისტები. პრესას რომ თავი დავანებოთ, ჟოზეს დიქტატორული მიდრეკილებები არ მოსწონდათ "სამეფო კლუბის" მოთამაშეებს და თუ უმრავლესობა გონივრულად დუმილს არჩევდა, იკერი მასთან ღია პოლემიკაში შედიოდა.
სანტიაგო ბერნაბეუს ბინადრების იმდროინდელ მწვრთნელს მსგავსი ინიციატივები შეგირდების მხრიდან ყოველთვის აღიზიანებდა. "განსაკუთრებულისთვის" ფეხბურთელი პირველ რიგში არის ერთგული ჯარისკაცი, რომელიც თავისი მეთაურის ბრძანებებს უსიტყვოდ ასრულებს.
ასე იყო "ნერაძურიში", ჩელსისა და პორტუში, თუმცა არა მოურინიოს იმდროინდელ გუნდში. ამ ყველაფრის მიზეზი "ფურია როხას" კაპიტნის დაუმორჩილებლობა აღმოჩნდა. პორტუგალიელმა სპეციალისტმა მოგვიანებით უფრო ღრმად შეტოპა და დააბრუნა დიეგო ლოპესი, რომელმაც სწორედ რეალის 1 ნომრის ადგილი დაიკავა.
იქმნებოდა ისეთი შთაბეჭდილება, თითქოს ჟოზე ამ ნაბიჯით უპირისპირდებოდა არა მხოლოდ კასილასს, არამედ მთელ სამყაროს. მადრიდელთა დამრიგებელს ატარებდნენ კრიტიკის ქარ-ცეცხლში და ღირსეული პასუხისთვის მას რჩებოდა მხოლოდ 1 ვარიანტი: ყველა შესაძლო ტიტულის მოგება.
მსგავსი არაფერი მომხდარა - მარცხი ლა ლიგის საჩემპიონო ბრძოლაში ბარსელონასთან და კოპა დელ რეის ფინალში თანაქალაქელ ატლეტიკოსთან. ამის გარდა, ევროპის ყველაზე პრესტიჟული ტურნირის 1/2 ფინალში "სამეფო კლუბი" დორტმუნდის ბორუსიასთან განადგურდა.
ბრძოლაში, რომელიც იყო მთელი სამყაროს წინააღმდეგ, "განსაკუთრებული" დამარცხდა. ესპანეთის დედაქალაქში მას აკრიტიკებდა ყველა, გარდა ალვარო არბელოასი. როგორც აღვნიშნეთ, 63 წლის სპეციალისტის მუშაობის განუყოფელი ნაწილი არის თავის რაზმში ერთგული ჯარისკაცების ყოლა და ბერნაბეუზე ასეთი სწორედ ესპანელი უკანახაზელი იყო.
"მოურინიო არის ბრწყინვალე პიროვნება და არა ისეთი, როგორიც ჟურნალისტების წარმოდგენაშია. მასთან საუბარი, როგორც მეგობართან, უსასრულოდ შემიძლია. ჟოზესი მადლობელი უნდა იყოს ყველა, ესპანეთის პრემიერ-მინისტრიც კი, რადგან მისი დამსახურებით, ხალხისთვის მთავარი სალაპარაკო თემა იყო რეალი და არა ქვეყნის პრობლემები.
პორტუგალიელი მწვრთნელი უმნიშვნელოვანესი ფიგურაა, ბარსელონას ჰეგემონია მან დაამხო. საფეხბურთო სამყაროში ყველაზე მამაცი პიროვნება სწორედ მადრიდული გუნდის ყოფილი დამრიგებელი არის. მისი ყველაზე ძლიერი თვისება? ყოველთვის სიმართლეს ამბობს", - ეს არის "სამეფო კლუბის" ამჟამინდელი დამრიგებლის ციტატები ლისაბონის ბენფიკას მოქმედი მენეჯერის შესახებ სხვადასხვა ინტერვიუებიდან.
2025/2026 წლების სეზონი - ჩემპიონთა ლიგის ფაზის უკანასკნელი ტურის წინ, სანტიაგო ბერნაბეუს ბინადრების სათავეში აღმოჩნდა სწორედ 43 წლის დამწყები დამრიგებელი, რომლის პირველი მოწინააღმდეგე ევროსარბიელზე "განსაკუთრებული" იყო. როგორც გვახსოვს, მოგებული აღნიშნულ დუელში 63 წლის სპეციალისტი გამოვიდა.
"არწივებმა" გამარჯვების მომტანი გოლი გაიტანეს 98-ე წუთზე, თავიანთი მეკარის, ანატოლი ტრუბინის დამსახურებით. ამ შედეგმა ხაზი გადაუსვა არბელოას გუნდის შანსებს პირდაპირ მოხვედრაზე 1/8 ფინალში, მოურინიოს შეგირდები კი 24 საუკეთესოს შორის აღმოჩნდნენ. რამდენიმე დღეში რეალი ეშტადიუ და ლუშის ბინადრებს კიდევ ერთხელ შეხვდება.
სასწორზე ჩემპიონთა ლიგის მერვედფინალის საგზური დევს. ერთ მხარეს არის მადრიდული გუნდი, რომელიც სეზონის გადარჩენას ცდილობს ესპანელი თავკაცის დახმარებით, მეორე მხარეს კი პორტუგალიელი სპეციალისტი, რომელმაც დიდხნიანი პაუზის შემდეგ, თავი კვლავ "განსაკუთრებულის" სტატუსით შეგვახსენა.
