ბარსელონას მაისური ყოველთვის უკავშირდებოდა დიდ ფეხბურთელებს, მაგრამ ერთი ნომერი განსაკუთრებით გამორჩეული და სიმბოლურია — 10. ის არა მხოლოდ მოედნის პოზიციას, არამედ პასუხისმგებლობას, შთაგონებასა და გენიალობასაც გამოხატავს. მომავალი სეზონიდან 10-იანს მოირგებს ლამინ იამალი, ჩვენი კი გავიხსენოთ მისი დიდებული წინამორბედები.
ლიონელ მესი - ბარსელონას ათიანის განსახიერება
თუ არსებობს ერთი ფეხბურთელი, რომელიც მთლიანად ერგება ბარსელონას 10 ნომერს, ეს უდავოდ ლიონელ მესია. არგენტინელმა გენიოსმა 2008 წელს ეს ნომერი რონალდინიოსგან გადაიბარა და იმავე წელს დაიწყო ეპოქა, რომელმაც კლუბის ისტორია სრულად შეცვალა. 17 სეზონში მან ბარსელონას მაისურით 672 გოლი გაიტანა 778 მატჩში, მოიგო 10 ლა ლიგა, 4 ჩემპიონთა ლიგა და 7 ოქროს ბუცი. თუმცა ციფრების მიღმაც, მესი იყო ბარსელონას სული და გული — ლიდერი, მხსნელი და თაობების შთაგონება.
რონალდინიო - ღიმილიანი ჯადოქარი
2003 წელს ბარსელონა საკუთარ იდენტობას ეძებდა და სწორედ მაშინ გამოჩნდა რონალდინიო — ფეხბურთელი, რომელმაც კლუბს ახალი სიცოცხლე შთაბერა. მისი 10 ნომერი შოუს, თავისუფლებისა და სიხარულის სიმბოლოდ იქცა. მან მოიგო ოქროს ბურთი, მოიგო გულშემატკივრების გული და კლუბი გამარჯვების გზაზე დააყენა. სწორედ მან გადასცა ეს ნომერი ლიონელ მესის — მომავლის ლიდერს.
რივალდო - ლიდერი რთულ დროს
რონალდინიოს წინ იყო რივალდო — გენიალური ტექნიკითა და ძლიერი ხასიათით გამორჩეული ფეხბურთელი. ბრაზილიელმა ბარსელონაში გატარებულ 5 სეზონში დაუვიწყარი გოლები გაიტანა, ორჯერ მოიგო ლა ლიგა და 1999 წელს ოქროს ბურთითაც დაჯილდოვდა. მისი ჰეთ-თრიქი ვალენსიასთან და ბოლო წუთზე გატანილი საჯარიმო გოლი ლა ლიგის ისტორიაში ერთ-ერთ საუკეთესო ინდივიდუალურ შესრულებად დარჩა.
რომარიო - ბრაზილიური ჯადოქრობის ფესვები
1993-94 წლების სეზონში რომარიომ მთელი ევროპა დაიპყრო. ბარსელონაში პირველი სეზონიდანვე ბომბარდირი გახდა — 30 გოლი ლა ლიგაში და იოჰან კრუიფის „დრიმ თიმის“ ერთ-ერთი ვარსკვლავი. მისი 10 ნომერი იყო ინსტინქტური ბრაზილიური მაგიის, სისწრაფისა და სიმსუბუქის გამოვლინება.
დიეგო მარადონა - გენიოსი, რომელსაც დრო არ მისცეს
დიეგო მარადონა ბარსელონაში მხოლოდ ორი სეზონი (1982–1984) თამაშობდა, თუმცა ეს პერიოდი ტრავმებითა და დაძაბულობით იყო სავსე. მიუხედავად ამისა, მოედანზე მაინც იგრძნობოდა მისი განსაკუთრებული ტალანტი და ინდივიდუალური სიძლიერე. მართალია, ბარსელონაში 10 ნომრის დიდი ხნით ტარება ვერ მოახერხა, მაგრამ კლუბის ისტორიაში მისი სახელიც მნიშვნელოვან ადგილს იკავებს.
