ჩემპიონთა ლიგის ფაზის მეოთხე ტურის ცენტრალურ მატჩში მადრიდის რეალი ლივერპულს ესტუმრება. აღნიშნული მატჩი განსაკუთრებული არის ჩაბი ალონსოსთვის, რომელიც დიდი ისტორიის ნაწილია, როგორც "სამეფო კლუბისთვის", ისე მერსისაიდელებისთვისაც. როგორც გვახსოვს, 2000-იანებში ესპანელი შუახაზელი "წითლებში" თამაშობდა.
ენფილდის ბინადრების ნახევარმცველის ინგლისური კარიერა შესაძლოა ყოფილიყო უფრო ხანგრძლივი და ნაყოფიერი, რომ არა სანტიაგო ბერნაბეუდან მოწვევა. ამის გარდა, "ლა ბარბა როხა" ახლოს იყო ლივერპულში დაბრუნებასთან უკვე დამრიგებლის რანგში, მაგრამ ამ შემთხვევაშიც ხელშემშლელი ფაქტორი ფლო პერესის ინიციატივა აღმოჩნდა.
როგორ წაართვა რეალმა მერსისაიდელებს ალონსო ორჯერ? თავდაპირველად როგორც ფეხბურთელი, ათწლეულების შემდეგ კი უკვე როგორც დამრიგებელი. მადრიდელებისა და "წითლების" მორიგი შეხვედრის წინ, გავიხსენოთ ესპანელი შუახაზელის ისტორია.
ლივერპულიდან - რეალში, როგორც ახალი გალაქტიკოს ნაწილი
ალონსოს საფეხბურთო კარიერა იწყებოდა სან სებასტიანის რეალ სოსიედადში, სადაც მან 2000-იანი წლების დასაწყისში 120-ზე მეტი მატჩის ჩატარება მოასწრო. ესპანელ შუახაზელს უკვე ჰქონდა ამომავალი ვარსკვლავის სტატუსი, მაგრამ პრიმერა დივიზიონის მთავარ ტიტანებს, რეალ მადრიდსა და ბარსას მისთვის იმ დროს არ ეცალათ.
"სამეფო კლუბში" დაკავებულები იყვნენ გალაქტიკოს პროექტით, კატალონიელები კი კრიზისიდან გამოსვლას ცდილობდნენ. ეს ის დროა, როდესაც ბერნაბეუზე დევიდ ბექჰემისგან უშედეგოდ ქმნიდნენ ჩამშლელ შუახაზელს, "ბლაუგრანაში" კი ფრანკ რაიკაარდი ახალ გუნდს რონალდინიო გაუჩოს გარშემო აშენებდა.
ფლორენტინო პერესისა და კამპ ნოუს ბინადრების უყურადღებობით ისარგებლა რაფაელ ბენიტესმა, რომელმაც 2004 წლის ზაფხულში ჩაბი ლივერპულში წაიყვანა. ესპანელმა სპეციალისტმა ბასკური გუნდის აღზრდილ შუახაზელთან ერთად პირველივე სეზონში ევროპის მთავარი საკლუბო ტურნირი მოიგო.
მერსისაიდელთა მე-14 ნომერი გახდა გუნდის უმნიშვნელოვანესი ფეხბურთელი და დროთა განმავლობაში მისი გავლენა უფრო და უფრო იზრდებოდა. ევროპის მთავარ საკლუბო ტურნირთან ერთად, "ლა ბარბა როხამ" "წითლებში" მოიგო დამატებით 3 ტიტული და ამის გარდა, მან კიდევ ერთი ლიგის ფინალიც ითამაშა.
ალონსომ სტივენ ჯერარდთან ერთად შექმნა პრემიერ ლიგის ნახევარმცველთა ერთ-ერთი ყველაზე დასამახსოვრებელი დუეტი, ხავიერ მასკერანოს გაფორმების შემდეგ კი ენფილდის ბინადრების შუახაზი ახალ საფეხურზე ავიდა. ის გუნდი იბრძოდა უმაღლესი მწვერვალებისთვის, მაგრამ ბენიტესისთვის სამწუხაროდ, რეალურ ტიტულებამდე საქმე არ მისულა.
ის, თუ რას წარმოადგენდა 2000-იანი წლების მეორე ნახევრის ლივერპული კარგად ჩანს რეალთან დაპირისპირებაში, ჩემპიონთა ლიგის 2008/2009 წლების სეზონის 1/8 ფინალში, როცა ინგლისურმა კლუბმა მეტოქე ორი შეხვედრის ჯამში 5:0 გაანადგურა. მერსისაიდელებმა ჯერ სტუმრად მოიგეს მინიმალური ანგარიშით, საპასუხო დაპირისპირებაში კი მადრიდელებმა 4 უპასუხო ბურთი მიიღეს.
მართალია, ესპანელ ნახევარმცველს გოლი არ გაუტანია, თუმცა იმ ორმატჩიან დუელში მოედნის ცენტრის ბატონ-პატრონი სწორედ ის იყო. "წითლების" ქომაგებისთვის სამწუხაროდ, იმ შეხვედრიდან რამდენიმე თვეში, ჩაბი სწორედ "სამეფო კლუბში" აღმოჩნდა. ისმის კითხვა: რა იდგა ენფილდის ბინადრების შუახაზელის ბერნაბეუზე ტრანსფერის უკან?
უფრო სწორად, ვინ იდგა აღნიშნული გარიგების უკან? ვინ, თუ არა პერესი. 2009 წლის ზაფხულში ოდიოზურმა ბიზნესმენმა გამარჯვება მოიპოვა რეალის საპრეზიდენტო არჩევნებში და უმალვე დაგეგმა გალაქტიკოს პროექტის გაცოცხლება. იმ ზაფხულს ესპანურ კლუბში გადმოვიდნენ კრიშტიანუ რონალდუ, რიკარდო კაკა, ქარიმ ბენზემა, მათთან ერთად კი ბენიტესის გუნდის მე-14 ნომერიც.
"ლა ბარბა როხამ" ვერ თქვა უარი იმ გრანდიოზულ გეგმებზე, რომლითაც ის ესპანელმა პრეზიდენტმა მოაჯადოვა. ლივერპულმა თავის მხრივ ვერ თქვა უარი 34.5 მილიონზე, სწორედ ეს თანხა გადაიხადეს მადრიდელებმა ალონსოს სანაცვლოდ. ასე გახდა ევრო 2008-ის ჩემპიონი ესპანელი შუახაზელი "სამეფო კლუბის" ნაწილი.
რა მოხდა შემდეგ? ჩაბი მალევე იქცა სანტიაგო ბერნაბეუზე ფუნდამენტურ ფეხბურთელად და წლების შემდეგ მან ჩემპიონთა ლიგის კიდევ ერთი ტიტული მოიგო. ანოეტას ბინადრების აღზრდილი შუახაზელი გახდა რიგით მე-2 ლეგენდარული ფინალის მონაწილე: 2005 წლის სტამბოლისა და 2014 წლის ლისაბონის.
2010-იანი წლების დასაწყისის ჟოზე მოურინიოსა და კარლო ანჩელოტის გუნდების მისამართით პერიოდულად ისმოდა კრიტიკა, თუმცა ეს ყველაზე ნაკლებად ესპანეთის ეროვნული გუნდის მე-14 ნომერს ეხებოდა. ის არასდროს აგდებდა უმაღლეს დონეს, მათ შორის უკვე სოლიდურ ასაკშიც, მიუნხენის ბაიერნში, პეპ გუარდიოლასთან.
რაც შეეხება მერსისაიდულ გუნდს "ლა ბარბა როხას" წასვლის შემდეგ, ის ჩამოიშალა, ამ სიტყვის პირდაპირი მნიშვნელობით. როგორც გვახსოვს, 10-იანების დასაწყისში "წითლები" აღმოჩნდნენ ღრმა კრიზისში და ამ ჩავარდნის ერთ-ერთი უმთავრესი მიზეზი ალონსოს ღირსეული შემცვლელის არ არსებობა იყო.
იურგენ კლოპის საოცნებო მემკვიდრე, რომელიც რეალმა წაიყვანა
საფეხბურთო კარიერის დასრულების შემდეგ, ჩაბიმ მწვრთნელის სავარძელში მალევე გადაინაცვლა. პირველი ნაბიჯები ახალ საქმეში ესპანელმა დამრიგებელმა გადადგა რეალ მადრიდისა და სოსიედადის იუნიორთა გუნდებში, ერთ დღეს ევროპის ყველაზე ტიტულოვან კლუბში დაბრუნების ოცნებით.
პირველი დიდი გამოწვევა ალონსოს სამწვრთნელო კარიერაში გამოდგა ლევერკუზენის ბაიერი, რომელიც მისი დანიშნვის მომენტისთვის გერმანიის ქვედა ლიგაში გავარდნის პირას იყო. "ფარმაცევტები" იყვნენ მე-17 პოზიციაზე, "სამეფო კლუბის" კასტილიის ყოფილი დამრიგებლის დახმარებით კი სეზონის ბოლოს მე-6 ადგილზე აღმოჩნდნენ.
რა მოხდა შემდეგ? "ლა ბარბა როხამ" მოახდინა ფურორი და ბაიარენას ბინადრები მიიყვანა ბუნდესლიგის ჩემპიონობამდე, თავიანთ ისტორიაში პირველად და თანაც, წაუგებლად. ამ წარმატების შემდეგ, 43 წლის დამრიგებელს დაუდგა რიგი მისი ყოფილი კლუბებისგან: ბერნაბეუს ბინადრებისგან, ლივერპულისა და ბაიერნისგან.
სამივე გუნდს სჭირდებოდა გადატვირთვა და ახალი ეტაპის დაწყება, რომლის სულისჩამდგმელი უნდა გამხდარიყო ახალგაზრდა მწვრთნელი თანამედროვე ხედვით. იდეალური კანდიდატი ამ ყველაფრისთვის სწორედ ალონსო იყო. პერსპექტიული დამრიგებლისთვის ბრძოლაში ფავორიტად თავიდანვე პერესის კლუბი მოიაზრებოდა.
ესპანელი მწვრთნელი ყოველთვის ღიად აფიქსირებდა რეალში დაბრუნების სურვილს და მისი ოცნება ვერც იურგენ კლოპის განცხადებამ გადაფარა, როცა მან თავის საოცნებო მემკვიდრედ სწორედ გერმანიის ჩემპიონი დამრიგებელი დაასახელა. საბოლოოდ ყველაფერი დასრულდა იმით, რომ მერსისაიდში დაინიშნა არნე სლოტი, მიუნხენში კი ვენსან კომპანი.
ჩაბი კიდევ ერთი სეზონით დარჩა ბუნდესლიგის ჩემპიონთა რიგებში, მანამდე, სანამ მადრიდში თავის საქმეებს ანჩელოტი არ მორჩა. გასული სეზონის დასრულებისთანავე იტალიელმა სპეციალისტმა სამუშაოდ გადაინაცვლა ბრაზილიის ეროვნულ გუნდში, მის ადგილას კი როგორც დაგეგმილი იყო ლევერკუზენის დამრიგებელი მივიდა.
რა მოცემულობა გვაქვს ახალი სეზონის დასაწყისისთვის? "ლა ბარბა როხამ" იმარჯვა თავის პირველ ელ კლასიკოში და "სამეფო კლუბი" მისი დამრიგებლობით პრიმერა დივიზიონის პირველ პოზიციაზე მყარად დამკვიდრდა. ამის გარდა, ბერნაბეუს ბინადრებმა 3/3 მატჩი ევროპის მთავარ საკლუბო ტურნირზეც მოიგეს.
ერთი სიტყვით, 43 წლის მწვრთნელს თავის ახალ გუნდში გამოუვიდა იდეალური სტარტი, რასაც ვერ ვიტყვით "წითლებზე", რომელთა თამაშში ამ სეზონში კრიზისის ნიშნები იკვეთება. 4 ნოემბერს გაიმართება შეხვედრა, რომელიც გამოცდა იქნება როგორც რეალისთვის, ისე ენფილდის ბინადრებისთვის, ასევე პერსონალურად ალონსოსთვისა და მისი ნიდერლანდელი ოპონენტისთვის.
ამ მატჩში გამოჩნდება, თუ რა დაკარგა ლივერპულმა, როდესაც ესპანელი მწვრთნელის დათანხმება ვერ მოახერხა. ასევე რაზე თქვა უარი თავად ჩაბიმ, როცა მერსისაიდის ნაცვლად, მადრიდი აირჩია. 4 ნოემბერი, 23:55 საათი, ევროპული ფეხბურთის კიდევ ერთი კლასიკური დაპირისპირება, რომლის ყურადღების ცენტრში "სამეფო კლუბის" ამჟამინდელი დამრიგებელი იქნება.
