როცა ახალგაზრდა მეკარე ლეგენდის წასვლას ელოდება

წლების წინ, ასეთი მდგომარეობა იყო ლონდონის ჩელსიშიც, როდესაც პრემიერ ლიგის გრანდმა გაიფორმა ტიბო კურტუა, თუმცა ამ გუნდის კარში პეტრ ჩეხი ბრწყინავდა. გავიხსენოთ "არისტოკრატების" გოლკიპერების ამბავი და შევადაროთ იმ ყველაფერს, რაც დღეს მერსისაიდში ხდება. მსგავსება ნამდვილად არის.

2011 წელს, ჩელსიმ 19 წლის კურტუა ცხრა მილიონ ევროდ გაიფორმა. დედაქალაქურ გუნდში იმ დროს მეფობდა ჩეხი, რის გამოც ახალგაზრდა მეკარეს განათხოვრების წესით მადრიდის ატლეტიკოში გადასვლა მოუწია. ბელგიელი გოლკიპერი პეტრის წასვლას ელოდებოდა 3 წლის მანძილზე (2011-2014) და ამ შუალედში ის მსოფლიოს ერთ-ერთ საუკეთესო კარის დარაჯად ჩამოყალიბდა.

ტიბომ "როხიბლანკოში" ჩაატარა 154 შეხვედრა, რომელშიც მან 125 გოლი გაუშვა. რაც შეეხება მშრალად ჩატარებული თამაშების რიცხვს - 76. ამის გარდა, "ინდიელთა" გოლკიპერი გახდა პრიმერა დივიზიონის ჩემპიონი, ასევე ევროპა ლიგის, უეფას სუპერთასისა და კოპა დელ რეის ტრიუმფატორიც. არ უნდა დაგვავიწყდეს ჩემპიონთა ლიგის ფინალში გასვლაც.

სანამ დიეგო სიმეონეს გუნდის მე-13 ნომერი ელოდებოდა თავის შანსს, ჩეხი მეკარე ლონდონში წარმატებით ამტკიცებდა მსოფლიოს ერთ-ერთი საუკეთესო გოლკიპერის სტატუსს. 165 მატჩი, ჩემპიონთა ლიგის, ევროპა ლიგისა და ასოციაციის თასის ტიტულები. გამოსარჩევია ევროპის ყველაზე პრესტიჟული საკლუბო ტურნირის ფინალი, რომელშიც "არისტოკრატების" კარის დარაჯმა ჯამში სამი 11-მეტრიანი მოიგერია.

ერთი უშუალოდ თამაშში, ორი კი პენალტების სერიაში. ფინალის დასრულების შემდეგ, "ლურჯების" გულშემატკივრებმა თავიანთი გუნდის პირველი ნომერი მატჩის საუკეთესო მოთამაშედ დაასახელეს. ორი წლის შემდეგ, ევროპის ყველაზე პრესტიჟული საკლუბო ტურნირის ფინალში უკვე კურტუამ ითამაშა.

2014/2015 წლების სეზონი ბელგიელმა მეკარემ დაიწყო სტემფორდ ბრიჯზე და ეს ჟოზე მოურინიოს მოთხოვნა იყო. საინტერესოა ის ფაქტი, რომ "მისტერ ზერო" რომან აბრამოვიჩის კლუბიდან არ წასულა, ვარსკვლავური გოლკიპერები ერთმანეთის კონკურენტები გახდნენ. რაც შეეხება მათ შორის პირველს, პორტუგალიელმა ტაქტიკოსმა ჩეხს ტიბო ამჯობინა.

პეტრმა კონკურენტის მოსვლის შემდეგ ჩაატარა სულ რაღაც 16 შეხვედრა, მეტროპოლიტანოს ბინადრების ყოფილმა მეკარემ კი 39. ერთი სიტყვით, ლეგენდარულმა ჩეხმა გოლკიპერმა კონკურენცია წააგო ჩელსის ახალ მე-13 ნომერთან, რის შემდეგაც, სეზონის დასრულების შემდეგ ის მეზობელ არსენალში გადავიდა.

როგორც აღვნიშნეთ, ლივერპულმა გაიფორმა მამარდაშვილი, თუმცა განათხოვრების წესით ვალენსიაში დატოვა. პრემიერ ლიგის გრანდს აქვს გათვლა - ალისონის სწორედ ქართველი გოლკიპერით ჩანაცვლება. საინტერესოა ის, რომ ვარსკვლავური კარის დარაჯი "წითლებიდან" წასვლას ჯერჯერობით არ ჩქარობს.

არის საუბრები ბრაზილიელი მეკარის საუდის არაბეთში წასვლაზე, თუმცა თავად ფეხბურთელი აღნიშნავს, რომ მერსისაიდული გუნდის დატოვება მის გეგმებში ჯერჯერობით არ შედის. ამის გარდა, ბეკერს არ აქვს პრობლემები არც მოტივაციასთან და არც სათამაშო ფორმასთან...პარის სენ-ჟერმენთან მატჩი ამის ნათელი მტკიცებულებაა.

ამ ყველაფრის ფონზე, საკმაოდ მაღალია იმის ალბათობა, რომ გიორგი კვლავ განათხოვრებული მეკარის ამპლუაში ვიხილოთ. იქნება ეს ისევ "ღამურები" თუ სხვა კლუბი, ჯერჯერობით უცნობია. ყველაფერი სეზონის ბოლოს გაირკვევა. რაც შეეხება სეზონის მიმდინარეობას, "სქაუზერები" იბრძვიან უმაღლესი მიზნებისთვის, "ლოს ჩესი" კი პრიმერაში ადგილის შენარჩუნებას ცდილობს.

უნდა ვაღიაროთ ისიც, რომ "მურსელაგოსის" მეკარეს მიმდინარე სეზონში რამდენიმე უსიამოვნო მომენტი ჰქონდა. შეგვიძლია გავიხსენოთ შვიდი გოლის გაშვება ბარსელონასგან, ასევე შეცდომები სევილიასა და ვალიადოლიდთან. ამის გარდა, მნიშვნელოვნად დაცემულია 24 წლის გოლკიპერის შედეგიანობა სეივების მხრივ.

წინა სეზონებში პროცენტული მაჩვენებელი არ ჩამოდიოდა 70-ს ქვემოთ, ახლა კი 60-ს ქვემოთ არის. არ უნდა დაგვავიწყდეს "ბლაუგრანასთან" შეხვედრაში მომხდარი ეპიზოდი, როდესაც ფერან ტორესმა მესტალიის ბინადრების 25-ე ნომერს ჰკითხა, თუ რატომ დარჩა ის პრიმერა დივიზიონში. ახალგაზრდა გოლკიპერმა ესპანელ ფორვარდს პირდაპირ უპასუხა, რომ მიზეზი ენფილდის ბინადრების ამჟამინდელი კარის დარაჯი იყო.

დიახ, მამარდაშვილის გარშემო ბევრი პრობლემაა, თუმცა სისულელეა იმაზე საუბარი, რომ ის არნე სლოტის გუნდში თავის შანსს არ მიიღებს. ეს აუცილებლად მოხდება, მაგრამ უცნობია, თუ როდის. ყველაფერი ლივერპულის ამჟამინდელ პირველ ნომერზეა დამოკიდებული.