როცა კუმირის რეკორდს ხსნი
"თეთრ-წითლებთან" შეხვედრაში თურქმა ორი საინტერესო მიღწევა დააფიქსირა. პირველი - ფაბიო მირეტის შემდეგ, ის გახდა "ბებერი ქალბატონის" ყველაზე ახალგაზრდა მოთამაშე, რომელმაც ევროპის ყველაზე პრესტიჟულ საკლუბო ტურნირზე ძირითადში ითამაშა. სხვაობა 2 მოთამაშეს შორის 102 დღე არის.
იტალიელი ცენტრალური ნახევარმცველი დებიუტის მომენტში იყო 19 წლისა და 34 დღის, თურქეთის ნაკრების თავდამსხმელი კი 19 წლისა და 136 დღის. მე-2 მიღწევა, თანაც რეკორდული: "ბიანკონერის" მე-10 ნომერი გახდა იტალიური გრანდის ყველაზე ახალგაზრდა მოთამაშე, რომელმაც ლიგაზე გოლის გატანა შეძლო.
19 წლის თავდამსხმელის გამოჩენამდე, რეკორდი ეკუთვნოდა დელე ალპის ლეგენდას, ალესანდრო დელ პიეროს, რომელმაც ჩემპიონთა ლიგაზე 20 წლისა და 308 დღის ასაკში გაიტანა გოლი. აღსანიშნავია ისიც, რომ ილდიზის კუმირი სწორედ ყოფილი იტალიელი ფორვარდია. საინტერესო არის ის, რომ ლეგენდარული შემტევი იყო ერთ-ერთი პირველი, რომელმაც ახალგაზრდა მოთამაშისთვის 10-ნომრიანი მაისურის გადაცემის იდეა წამოაყენა.
იუვენტუსის 10-ნომრიანი მაისურის მნიშვნელობა
იუვენტუსის ყველა დროის საუკეთესო ფეხბურთელად აღიარებული შემსრულებელი გუნდიდან 2012 წელს წავიდა და დღის წესრიგში მისი 10-ნომრიანი მაისურის ამოღება დადგა. ეს იდეა დაბლოკა თავად ტურინელთა ლეგენდარულმა 10-იანმა, რომელმაც განაცხადა, რომ აღნიშნული ნომერი მომავალი თაობისთვის სტიმული უნდა ყოფილიყო.
"პინტურიჩიოს" შემდეგ, "ბებერ ქალბატონში" აღნიშნული ნომრით თამაშობდნენ კარლოს ტევესი, პოლ პოგბა, პაულო დიბალა, ამიერიდან კი თურქი ფორვარდიც. დელ პიერომდე 10-ნომრიან მაისურს ატარებდნენ: რობერტო ბეტეგა, ფაბიო კაპელო, კლაუდიო ჯენტილე, გაეტანო შირეა, მიშელ პლატინი, რობერტო ბაჯო და სხვები. ალბათ ყველასთვის გასაგებია, თუ რას ნიშნავს "ბიანკონერის" 10-იანის ტარება.
ლეგენდარული იტალიელი თავდამსხმელი ჯერ კიდევ გასულ წელს ამბობდა, რომ მის 10 ნომერს სწორედ ქენანი იმსახურებდა. ვეტერანმა შემტევმა ალიანცის ბინადართა ფორვარდი მსოფლიოს ერთ-ერთ საუკეთესო ახალგაზრდა მოთამაშედ დაასახელა. ერთი სიტყვით, სანდრო მიესალმება იმ ფაქტს, რომ აღნიშნული ნომრის ტარების ტრადიცია იუვეში გრძელდება.
კომპლიმენტი კუმირისგან
რეკორდის მოხსნის შემდეგ, ტურინელთა ათიანმა იტალიის ნაკრების ლეგენდარულ თავდამსხმელს მოუბოდიშა:
"მინდა მას მოვუბოდიშო. ძალიან ვწუხვარ დელ პიეროს რეკორდის გამო. მატჩის წინ, ძალიან ვნერვიულობდი, მაგრამ ახლა უკვე კარგად ვარ", - განაცხადა 19 წლის ფორვარდმა, ფილიპს არენის ბინადართა კარის აღების შემდეგ.
ლეგენდარულ იტალიელ თავდამსხმელს თავის მხრივ გაუხარდა, რომ ილდიზის სახით, "ბებერ ქალბატონს" მომავლის ფეხბურთელი ჰყავს - "პირველი შეხება იყო იდეალური, შესრულება და დარტყმა კი უზუსტესი. ქენანმა დაამტკიცა, რომ ის იუვეს 10-ნომრიანი მაისურის ტარების ღირსია", - განაცხადა სანდრომ.
