საქართველოს ნაკრების შემდეგი ნიშნული მსოფლიო ჩემპიონატი იქნება - მუნდიალზე მოხვედრის ორი გზა

ამასთან ერთად, ჩვენი ნაკრების თამაშში არ შეინიშნებოდა არავითარი სიფრთხილე და დაცვითი ფეხბურთი, მოწინააღმდეგის მიმართ შიშიც გამქრალი იყო. რაც შეეხება სტატისტიკას, დასრულდა 1/8 ფინალური მატჩები, მაგრამ გიორგი მიქაუტაძეზე მეტი ბურთი ჯერაც არავის აქვს გატანილი. გიორგი მამარდაშვილი კი თავისი 30 სეივით, სავარაუდოდ, ტურნირის ბოლომდე დარჩება პირველ პოზიციაზე.

"თეთრ-წითლების" ევროპული თავგადასავალი არ არის ზღაპარი ან შემთხვევითობა, ისინი ამ ნიშნულისკენ ნაბიჯ-ნაბიჯ მიდიოდნენ. საფეხბურთო სამყარო ვილი სანიოლის გუნდისგან ახალი სიურპრიზების მოლოდინშია, თავად ნაკრები კი არ აპირებს მიღწეულზე გაჩერებას და ხმაურიან დებიუტს ამჯერად მუნდიალზეც გეგმავს.

დამოუკიდებლობის დაბრუნების შემდეგ, საქართველოს მსოფლიო ჩემპიონატზე გასვლის შვიდი მცდელობა ჰქონდა, თუმცა თითოეული საკვალიფიკაციო რაუნდი წარუმატებლად სრულდებოდა. "ჯვაროსნები" მუნდიალზე გასვლასთან შედარებით ახლოს იყვნენ 2002-ში, როდესაც შესარჩევის ჯგუფში მე-3 პოზიციაზე გავიდნენ.

ჩვენს ნაკრებს მაშინ იტალიისა და რუმინეთის ეროვნულმა გუნდებმა აჯობეს. ცნობისთვის, წლევანდელ ევროპის ჩემპიონატამდე, ისტორიას ახსოვს კონტინენტის პირველობაზე ვერმოხვედრის ასევე 7 მცდელობა. როგორც ვხედავთ, ევროს მიმართებით ნავსი გატყდა მე-8 ცდაზე, ვნახოთ, რა იქნება მუნდიალზე. განვიხილოთ როგორ უნდა მოხვდნენ "თეთრ-წითლები" მსოფლიო ჩემპიონატზე და საერთოდაც, რა შანსები აქვთ მათ.

როგორც ვიცით, 2026 წლის მსოფლიო ჩემპიონატი ახალი ფორმატით ჩატარდება, მონაწილე ნაკრებების რაოდენობა გაზრდილია 48-მდე, აქედან ერთი მესამედი ნაწილი ევროპიდან იქნება წარმოდგენილი. გეგმა ასეთია: საქართველო თავისი კონფედერაციის 16 საუკეთესო ეროვნულ გუნდს შორის უნდა მოხვდეს.

აღნიშნული 16-ეული გადანაწილილებული იქნება შემდეგნაირად - 12-ვე ჯგუფის პირველადგილოსანი მსოფლიო ჩემპიონატზე მოხვდება ავტომატურად და ამით, 12 ვაკანტური პოზიცია შეივსება. რჩება 4 ადგილი, რომელიც გათამაშდება შესარჩევის ჯგუფებში მე-2 პოზიციაზე გასულ ეროვნულ გუნდებსა და ერთა ლიგის 4 საუკეთესო ნაკრებს შორის.

ჯერჯერობით უცნობია, თუ ვისთან ერთად იქნებიან "ჯვაროსნები" მსოფლიო ჩემპიონატის საკვალიფიკაციო რაუნდის ჯგუფურ ეტაპზე, წილისყრა მიმდინარე წლის დეკემბერში გაიმართება. შესარჩევი სტარტს აიღებს მომავალი წლის მარტში და ერთი წლის შემდეგ დასრულდება. აქვე დავამატებთ, შესარჩევში მონაწილეობას 54 ევროპული გუნდი მიიღებს.

ერთა ლიგა - ერთგვარი დამხმარე ვარიანტი, იმ შემთხვევაში, თუ ჩვენი ნაკრები მსოფლიო ჩემპიონატზე მოხვედრას საკვალიფიკაციო ეტაპიდან ვერ მოახერხებს. აღნიშნული ტურნირი "თეთრ-წითლებს" ერთხელ უკვე დაეხმარა, საუბარია ევრო 2024-ზე მოხვედრის შესახებ. შემდეგი ერთა ლიგა კი უკვე მუნდიალთან იქნება კავშირში.

როგორც აღვნიშნეთ, მსოფლიო ჩემპიონატის საკვალიფიკაციო პლეიოფში ერთა ლიგის ახალი სეზონის ოთხი საუკეთესო ჯგუფის გამარჯვებული გუნდი მიიღებს მონაწილეობას. თუ რომელიმე ეროვნული გუნდი ისედაც მოიპოვებს მუნდიალის საგზურს, თავის პოზიციას რიგით შემდეგ საუკეთესოს დაუთმობს.

მაგალითად, წესით ეს ნაკრებები უნდა იყვნენ A ლიგის ჯგუფების გამარჯვებულები. თუ რომელიმე მათგანს საგზური არ დასჭირდება, მას შეცვლის B ლიგის საუკეთესო ეროვნული გუნდი, შემდეგ B ლიგის მე-2 საუკეთესო ნაკრები და ასე მიყოლებით. შეგახსენებთ, რომ საქართველო სწორედ B ლიგაში ითამაშებს.

შეჯამების სახით შეგვიძლია ვთქვათ, B ლიგის საუკეთესო ნაკრებს აღნიშნული საგზური შეხვდება იმ შემთხვევაში, თუ A ლიგის ოთხი ჯგუფის გამარჯვებულებიდან რომელიმეს ის აღარ დასჭირდება. რაც შეეხება "ჯვაროსნების" მეტოქეებს B ლიგაში: ჩეხეთი, უკრაინა და ალბანეთი იქნებიან. ჯგუფური ეტაპი დაიწყება მიმდინარე წლის სექტემბერში და ნოემბერში დასრულდება.

7 სექტემბერი - საქართველო-ჩეხეთი

10 სექტემბერი - ალბანეთი-საქართველო

11 ოქტომბერი - უკრაინა-საქართველო

14 ოქტომბერი - საქართველო-ალბანეთი

16 ნოემბერი - საქართველო-უკრაინა

19 ნოემბერი - ჩეხეთი-საქართველო