მიუნხენის ბაიერნის კაპიტნის ჩრდილში იმყოფებოდა მარკ-ანდრე ტერ შტეგენი, რომელსაც "მანშაფტის" მაისურით დიდ სანაკრებო ტურნირებზე დღემდე ერთი მატჩიც არ აქვს ჩატარებული. გერმანელი კარის დარაჯი ალემანთა გუნდში ირიცხება 2012 წლიდან, მაგრამ "რეკორდმაისტერის" 1 ნომერთან კონკურენცია მისთვის არარეალური იყო.
დიახ, მათ შორის მოწინავე პოზიციაზე ყოველთვის იყო ნოიერი, თუმცა დამსახურებულად? 2012 წლის ევროპის ჩემპიონატსა და 2014 წლის მსოფლიო ჩემპიონატზე კი, უპირობოდ. მანუ იმ დროს იყო მსოფლიოს საუკეთესო კარის დარაჯი, ბარსელონას მომავალი გოლკიპერი კი უბრალოდ იმედისმომცემი ახალგაზრდა.
სიტუაცია ბუნდოვანი გახდა მომდევნო წლებში, როდესაც ბავარიელთა მეკარის კარიერაში დაისადგურა ტრავმატულმა პერიოდმა, კატალონიელთა გოლკიპერი კი თავის პოზიციაზე ერთ-ერთი საუკეთესო გახდა. ალიანც არენას ბინადრების 1-მა ნომერმა გამოტოვა მთელი 2017/18 წლების სეზონი, მაგრამ რუსეთში გამართულ მუნდიალზე იოაჰიმ ლიოვის გუნდის ძირითადის კარის დარაჯი მაინც ის იყო.
გერმანიამ ვერ მოახერხა ჯგუფიდან გასვლა, ნოიერმა კი სამხრეთ კორეასთან უხეში შეცდომა დაუშვა. ყველაფერი მიდიოდა იმისკენ, რომ უახლოეს საერთაშორისო ტურნირისთვის "ბუნდესნაკრებში" იქნებოდა ცვლილებები, მაგრამ ეროვნული გუნდის თავკაცის ფავორიტად ისევ მანუ დარჩა. "ბლაუგრანას" 1 ნომერი უკმაყოფილებას ვერ მალავდა:
"არ ვიცი, ასე რატომ ხდება. ბარსელონაში კარგი თამაშით ვიკეთებ რეკლამას, თუმცა შემდეგ, მოვდივარ გერმანიის ნაკრებში და სათადარიგოთა სკამზე ვჯდები. ჩემთვის ეს დიდი დარტყმაა და ყოველ ჯერზე უფრო მიჭირს ამის ატანა", - აცხადებდა ტერ შტეგენი 2019 წელს. ბაიერნის კარის დარაჯის პასუხმა არ დააყოვნა:
"ტერ შტეგენი ჩუმად იყო როდესაც იმყოფებოდა გერმანიის ნაკრების განკარგულებაში და ახლა გადაწყვიტა უკმაყოფილების გამოხატვა? მსგავსი განცხადებები გუნდში არსებულ ატმოსფეროზე უარყოფითად მოქმედებს", - აცხადებდა მიუნხენელთა 1 ნომერი. ამის შემდეგ, კომენტარი გააკეთა კვლავ მარკმა, რომელიც მეგობრულად განწყობილი აღარ იყო.
"რასაც ვფიქრობდი, ის ვთქვი. ნოიერს საერთოდ არ უნდა ჰქონდეს საქმე იმასთან, თუ რას ვფიქრობ მე. ჩემი ფიქრები და გრძნობები მხოლოდ მე მეხება", - აცხადებდა გერმანელი კარის დარაჯი. ორ გოლკიპერს შორის მდგომარეობა გაამწვავა ული ჰიონესმა, რომელმაც დაიცვა მანუ, მისი კონკურენტი კი გააკრიტიკა:
"ნოიერი ნომერ პირველია და უკონკურენტო. ტერ შტეგენი საუბრობს ისე ქედმაღლურად, თითქოს მსოფლიო ჩემპიონი 17-ჯერ გახდა. ჩვენი ფეხბურთელების რეპუტაციის შელახვის უფლებას არავის მივცემთ. საუკეთესო მოთამაშე ყოველთვის ბაიერნიდან იქნება", - განაცხადა ყოფილმა გერმანელმა ფორვარდმა.
ამ ყველაფრის შემდეგ, საფეხბურთო სამყაროს აინტერესებდა ლიოვის პოზიცია, თანაც მისი მოსაზრება იყო ორმაგად აქტუალური, რადგან იმ დროს 2020 წლის ევროპის ჩემპიონატი ახლოვდებოდა. გერმანელმა თავკაცმა უპირატესობა კვლავ მანუს მიანიჭა: "თუ რაიმე გაუთვალისწინებელი არ მოხდება, გერმანიის ეროვნული გუნდის ძირითადის კარის დარაჯი ნოიერი იქნება".
მწიფდებოდა ახალი კონფლიქტი, თუმცა შემდეგ სამყაროში დაისადგურა კორონავირუსის პანდემიამ, ევროპის ჩემპიონატი გადაიდო ერთი წლით, ტურნირის გამართვის მომენტისთვის კი მარკი მკურნალობდა მუხლის ტრავმას, ის ნებისმიერ შემთხვევაში ვერ ითამაშებდა. რაც შეეხება 2022 წლის მუნდიალს, ძირითადში კვლავ მიუნხენელთა კაპიტანი იყო.
ეს ყველაფერი იმის გათვალისწინებით, რომ მსოფლიო ჩემპიონატის დაწყებამდე ერთი თვით ადრე, "რეკორდმაისტერის" პირველმა ნომერმა მიიღო ტრავმა, "ლურჯ-ბროწეულისფრების" კარის დარაჯმა კი პრიმერა დივიზიონის პირველ 13 მატჩში კარი მშრალად 11-ჯერ შეინახა. რაც შეეხება მუნდიალზე დაფიქსირებულ შედეგს, "ბუნდესნაკრებმა" ჯგუფიდან გასვლა კვლავ ვერ შეძლო.
უკანასკნელი ტურნირი, რომელზეც "რეკორდმაისტერის" პირველი ნომერი მოგვევლინა "მანშაფტის" სასტარტოში, საშინაო ევროპის ჩემპიონატი იყო. ტურნირის დაწყების წინ, 38 წლის კარის დარაჯმა განაცხადა: "11 ფეხბურთელიდან მეკარე არის მხოლოდ ერთი. არცერთ მწვრთნელს არ გამოუყვანია მოედანზე 2 გოლკიპერი".
2024 წლის ევროპის ჩემპიონატისთვის აღარავის უკვირდა ის ფაქტი, თუ რატომ იდგა ალემანების კარში ნოიერი და არა კამპ ნოუს ბინადრების პირველი ნომერი. დღეს, შეგვიძლია ვთქვათ, რომ მეტოქეობა დასრულებულია. მანუ გერმანიის ეროვნული გუნდიდან წავიდა, ახლა ყველაფერი 32 წლის კარის დარაჯის ხელშია. ტერ შტეგენი ძალიან თბილად გამოეხმაურა ბავარიელთა კაპიტნის წასვლას, რომელსაც მან გერმანული და მსოფლიო ფეხბურთის ლეგენდა უწოდა.
