23 წლის იტალიელმა ჩოგბურთელმა იანიკ სინერმა ისტორია დაწერა და ჩოგბურთის სამყაროში ყველაზე პრესტიჟული ტურნირი - უიმბლდონი კარიერაში პირველად მოიგო. თან, ფინალში უძლიერესი კარლოს ალკარასი დაამარცხა.
ავსტრალიის ღია პირველობა, როლან გაროსი, ამერიკის ღია პირველობა, მასტერსები - ამ ტურნირების მოგება ჩოგბურთელისთვის დიდი პრესტიჟია, თუმცა უიმბლდონი სულ სხვა დონეა, რადგან უიმბლდონი ჩოგბურთის სახე და უმაღლესი მწვერვალია.
2025 წლის როლან გაროსი სინერს ფაქტობრივად მოგებული ჰქონდა, მაგრამ ალკარასმა არნახული ქამბექი დადო და იტალიელს ჩემპიონის წოდება ხელიდან ამოაცალა. ეს სინერისთვის ყველაზე დიდი დარტყმა იყო კარიერაში, თუმცა მძიმე მარცხიდან 1 თვის თავზე, მან იმდენი შეძლო, რომ ნანატრი რევანში აიღო, თან უიმბლდონის ცენტრალურ კორტზე.
სინერმა ფინალის პირველი სეტი 4:6 წააგო, თუმცა მეორე სეტიდან ალკარასს საკუთარი თამაში მოახვია თავს. დღესდღეობით რთულია, ალკარასის ჩოგბურთს რაიმე გასაღები უპოვნო, სინერმა ეს შეძლო და აბსოლუტური დომინანტი იყო. მეორე და მესამე სეტის მოგების შემდეგ, სინერი მეოთხე სეტსაც იგებდა. ერთ ეპიზოდში, ალკარასი ახლოს იყო ბრეიკთან, როცა სინერს თვალწინ დაუგა ის ცუდადგასახსენებელი როლან გაროსის ფინალი, თუმცა ამჯერად, სინერი არ გატყდა და ყველაფერი თავის სასარგებლოდ დაასრულა.
იყო ცოტა გამართლებაც. უიმბლდონის მეოთხე რაუნდში სინერს დიმიტროვი 2:0 უგებდა, თუმცა ბუგლარელმა ტრავმა მიიღო და ტურნირს ჩაეხსნა. არადა, ყველაფერი დიმიტროვის კარნახით მიდიოდა და როცა ბულგარელს თამაში მისდის, მისი შეჩერება ნებისმიერი მეტოქისთვის რთულია.
გასაკვირი არაა, რომ სინერის კუმირი როჯერ ფედერერია. დღესდღეობით, სინერი და ალკარასი სწორედ როჯერის, რაფას და ნოვაკის მემკვიდრეები არიან და ჯერჯერობით, თავიანთი სტაბილურობით ამ მემკვიდრეობას ამართლებენ. "The Fox" ეს არის სინერის ზედმეტსახელი, რომელიც მას ბავშვობიდან შეარქვეს.
"ჩემი ყველაზე კარგი თვისება სიმშვიდეა", - ეს ფრაზა სინერმა კარიერის სტარტზე თქვა და მისი ეს თვისება ერთ-ერთი გადამწყვეტია, რის შედეგადაც ამდენ წარმატებას აღწევს. ჩოგბურთის შემდეგ ,სინერის საყვარელი სპორტი ფეხბურთია და ის მილანის გულშემატკივარია.
"მელიამ" თავისი უშუალო კონკურენტი იდეალურად შეისწავლა და ალკარასთან მატჩი სინერისგან იყო სიმშვიდის, სწორი თამაშისა და მოთმინების მაგალითი.
სინერი თანამედროვე ჩოგბურთის ყველანაირ სტანდარტს აკმაყოფილებს. სიმაღლე, ზუსტი და ძლიერი დარტყმები, კარგი მიღება და ტაქტიკური განსწავლულობა, მშვიდ ხასიათთან ერთად.
23 წლის სინერი ამაზე გაჩერებას არ აპირებს და კიდევ ბევრი დიდი ტურნირის მოგებას აპირებს. ისევე, როგორც ალკარასი. ჯერჯერობით, ეს ორი ჩოგბურთელი დღეს მსოფლიო ჩოგბურთი უკონკურენტოა. საინტერესოა, რამდენხანს გაგრძელდება მათი ეს დომინაცია. შემდეგი გაჩერება ამერიკის ღია პირველობაა.
