იმ შემთხვევაში, თუ ლიგა 1-ის შემდეგ ტურში პსჟ დაამარცხებს ანჟეს, კონკურენტები დედაქალაქური გუნდის გადასწრების თეორიულ შანსს დაკარგავენ. როგორც ვხედავთ, პარიზში გადასვლიდან სულ რაღაც 2.5 თვეში, ქართველი ვინგერი უკვე ჩემპიონობას იფორმებს. აღსანიშნავია ისიც, რომ კალჩოში "პარტენოპეის" ტრიუმფის შემთხვევაში, "ლურჯ-წითლების" შემტევი იტალიის ლიგის ჩემპიონიც გახდება.
გადავინაცვლოთ თურქეთში, სადაც ჯერ კიდევ "ლურჯების" საკუთრებაში მყოფი ვიქტორ ოსიმენი სტამბოლის გალათასარაისთან ერთად, ჩემპიონობასთან ასევე ახლოს არის. 28 ტურის შემდეგ, "ლომები" 71 ქულით არიან პირველ პოზიციაზე და უახლოეს მდევარს, მეზობელ ფენერს 6 ქულით უსწრებენ. თავად ნიგერიელი ფორვარდი კი შესანიშნავ ფორმაშია.
"წითელ-ოქროსფრების" თავდამსხმელმა 32 შეხვედრაში 28 გოლის გატანა მოასწრო. მიმდინარე სეზონის დასრულების შემდეგ, ის უდიდესი ალბათობით გაიყიდება სხვა კლუბში, მაგრამ იქამდე, 26 წლის ფორვარდი რამს პარკის ბინადრებისთვის მორიგი ტიტულის მოპოვებას ეცდება. თურქეთში მან დაამტკიცა, რომ ელიტურ ევროპულ ფეხბურთს "აძურის" ყოფილი მე-9 ნომერი ჯერ კიდევ სჭირდება.
დიეგო მარადონას ბინადრების ჩემპიონობა წარმოუდგენელი იქნებოდა კიმ მინ ჯეს გარეშე, რომელიც იმ სეზონში სერია ა-ს საუკეთესო მცველადაც დასახელდა. აურელიო დე ლაურენტისმა კორეელი უკანახაზელი გაყიდა იმ სეზონის დასრულებისთანავე, მიუნხენის ბაიერნში. საინტერესოა, რომ "რეკორდმაისტერში" გატარებული პირველი სეზონი ნაპოლის ყოფილი მცველისთვის უტიტულო გამოდგა.
დიახ, ბავარიელებს აჯობა ლევერკუზენის ბაიერმა, რომელიც ბუნდესლიგის ჩემპიონი დაუმარცხებლად გახდა. რაც შეეხება მიმდინარე სეზონს, 28 წლის უკანახაზელი ტრიუმფთან ამჯერად ახლოს არის. გერმანიის ჩემპიონატის დასრულებამდე დარჩენილია 7 ტური, ალიანც არენას ბინადრები კი "ფარმაცევტებს" 6 ქულით უსწრებენ.
"პარტენოპეის" საჩემპიონო ოთხეულის უკანასკნელი წევრი - პიოტრ ჟიელინსკი, რომელიც ჩემპიონობას მილანის ინტერის შემადგენლობაში უმიზნებს. საინტერესოა, რომ "ნერაძურის" მთავარი კონკურენტები არიან სწორედ "ლურჯები", რომელთა შემადგენლობა პოლონელმა შუახაზელმა გასული სეზონის დასრულების შემდეგ დატოვა.
სერია ა-ში ჩატარებული 30 ტურის შემდეგ, "გველები" "აძურის" სამი ქულით უსწრებენ. დიახ, იტალიის ჩემპიონატში გადაწყვეტილი ჯერჯერობით არაფერია, მაგრამ მარადონას ბინადრების არასტაბილურობის ფონზე, სასკუდეტო ბრძოლაში ფავორიტად მაინც სიმონე ინძაგის გუნდი მოიაზრება. ყველაფერი 8 ტურის შემდეგ გაირკვევა.
აღსანიშნავია ისიც, რომ ლუჩიანო სპალეტის გუნდის დატოვების შემდეგ, ჩემპიონობა გასულ სეზონში იზეიმა ორმა ფეხბურთელმა - ირვინგ ლოზანომ და ტანგი ნდომბელემ. მექსიკელი ვინგერი ნაპოლის დატოვების შემდეგ დაბრუნდა პსვ ეინდჰოვენში, რომლის შემადგენლობაში ერედივიზიის ტრიუმფატორი გახდა.
რაც შეეხება ფრანგ ნახევარმცველს, "პარტენოპეიდან" გალათასარაიში განათხოვრების წესით გადასვლის შემდეგ, ის თურქეთის ჩემპიონობას დაეუფლა. ბოლოს კი გავიხსენოთ 1987-1990 წლების სკუდეტოს 2-გზის მფლობელი "ლურჯები", რომელთა შემადგენლობიდან სხვა კლუბთან ერთად ჩემპიონი სულ რაღაც 3 მოთამაშე გახდა.
პირველ რიგში გამოსარჩევია ჩირო ფერარა - "აძურის" ლეგენდარული ცენტრალური მცველი, რომელიც ტურინის იუვენტუსის ეპოქალური ფეხბურთელიც გახდა. სან პაოლოზე 320-ზე მეტი მატჩის ჩატარების შემდეგ, იტალიელი უკანახაზელი გადავიდა "ბებერ ქალბატონში", რომლის შემადგენლობაშიც მან 5 სკუდეტო მოიგო.
სხვა ჩემპიონები - ფერნანდო დე ნაპოლი და ლუკა ფუზი. ალბერტო ბიგონის გუნდში მიღწეული წარმატების გამეორება აღნიშნულმა დუეტმა "ბიანკონერისა" და მილანში შეძლო. აღსანიშნავია ის ფაქტი, რომ მათი წვლილი არც ისეთი დიდი იყო. იტალიელმა შუახაზელმა 1993-1994 სასკუდეტო წლებში "როსონერიში" სულ რაღაც 9 მატჩი ჩაატარა.
რაც შეეხება დელე ალპის ბინადრების ყოფილ მცველს - 10 შეხვედრა საჩემპიონო სეზონში. დავბრუნდეთ თანამედროვე ეპოქაში, სადაც როგორც აღვნიშნეთ, ნაპოლის 4 ჩემპიონს აქვს თავის ახალ გუნდში ტრიუმფის შანსი. პირველი ასპარეზზე გამოდის ლუის ენრიკეს გუნდის მე-7 ნომერი, რომელიც ტიტულის მოგებასთან ერთ ნაბიჯშია.
