2008 წელს ტოტენჰემ ჰოტსპური დაეუფლა ინგლისის ლიგის თასს და იმის შემდეგ, დედაქალაქური გუნდის ტიტულების კოლექცია ერთი ჯილდოთიც არ შევსებულა. ლონდონურ კლუბში უთამაშია არაერთ გამორჩეულ ფეხბურთელს, მაგრამ მათი კარიერა სწორედ უიღბლობასა და უტიტულობას ეწირებოდა.
ნავსის გატეხვის შესაძლებლობა სპურსს აქვს მიმდინარე სეზონში და ეს მოხდება იმ შემთხვევაში, თუ ევროპა ლიგის ფინალში დედაქალაქური კლუბი მანჩესტერ იუნაიტედს მოუგებს. რანგით მე-2 საკლუბო ტურნირის მთავარ შეხვედრამდე, გავიხსენოთ მოთამაშეები, რომლებმაც კარიერის მთავარი ტიტულები უშუალოდ ტოტენჰემიდან წასვლის შემდეგ მოიპოვეს.
გარეთ ბეილი
| ტიტულები ტოტენჰემში | 1 |
| ტოტენჰემის შემდეგ | 17, მათ შორის 5-ჯერ ჩემპიონთა ლიგა |
ბეილი ტოტენჰემში ირიცხებოდა ჯერ კიდევ მაშინ, როდესაც ეს გუნდი 2008 წელს ინგლისის ლიგის თასს დაუეფლა. 2010-იანების დასაწყისში გარეთი ევროპულ ფეხბურთში იქცა ნამდვილ მოვლენად, მაგრამ ჰოტსპურისთვის ტიტულების მოგება მან ვერ შეძლო. რა მოხდა შემდეგ? უელსელმა ვინგერმა ვარსკვლავური კარიერა მადრიდის რეალში აიწყო.
იმდროისთვის რეკორდული 91 მილიონი ევროს სანაცვლოდ, "სამეფო კლუბში" გადასვლის შემდეგ, ლონდონელების ყოფილმა გარემარბმა ყველა საფეხბურთო ოცნება აიხდინა. ბერნაბეუს ბინადრების მე-11 ნომერმა მოიგო 17 ტიტული, მათ შორის ევროპის ყველაზე პრესტიჟული საკლუბო ტურნირიც, თანაც, 5-ჯერ.
დიმიტარ ბერბატოვი
| ტიტულები ტოტენჰემში | 1 |
| ტოტენჰემის შემდეგ | 6, მათ შორის 2-ჯერ პრემიერ ლიგა |
ინგლისის ლიგის თასის ტრიუმფატორი ტოტენჰემის კიდევ ერთი წევრი, რომელმაც კარიერის ყველაზე ნაყოფიერი პერიოდი მანჩესტერში გაატარა. ბერბატოვმა იუნაიტედთან ერთად 3 წლის შუალედში ინგლისის ჩემპიონატი მოიგო 2-ჯერ, ამ ყველაფერს კი მან რამდენიმე თასიც დაუმატა.
სოლ კემპბელი
| ტიტულები ტოტენჰემში | 1 |
| ტოტენჰემის შემდეგ | 7, მათ შორის 2-ჯერ პრემიერ ლიგა |
2000-იანი წლების დასაწყისის ერთ-ერთი ყველაზე სკანდალური ტრანსფერი - კემპბელის გადასვლა მშობლიური ტოტენჰემიდან თანაქალაქელ არსენალში. სოლი ჰოტსპურის ქომაგებისთვის ერთ-ერთი ყველაზე საძულველი მოთამაშეა, მაგრამ როგორ შეიძლება მისი გამტყუნება იმ ყველაფრის შემდეგ, რასაც მან "მეთოფეებში" მიაღწია?
ინგლისელი მცველი "კანონირების" შემადგენლობაში პრემიერ ლიგის ტრიუმფატორი გახდა ორჯერ, თანაც 2004 წელს მან ეს ყველაფერი წაუგებლად შეძლო. დიახ, "დეზების" აღზრდილი უკანახაზელი იყო იმ ლეგენდარული გუნდის ნაწილი, რომელმაც 2003/04 წლების სეზონში არ იცოდა, თუ რას ნიშნავდა მარცხი.
მაიკლ კერიკი
| ტიტულები ტოტენჰემში | 0 |
| ტოტენჰემის შემდეგ | 18, მათ შორის 5-ჯერ პრემიერ ლიგა და ტრებლი |
ტოტენჰემის შემადგენლობაში ორი უტიტულო სეზონის შემდეგ, კერიკი გადავიდა მანჩესტერში, სადაც 18 ჯილდოს დაეუფლა. 2007-2013 წლების შუალედში მაიკლმა ინგლისის ჩემპიონატი მოიგო 5-ჯერ, 2008 წელს კი მან თავის კოლექციაში ტრებლიც ჩაიწერა. იმდროინდელი იუნაიტედი ინგლისელი შუახაზელის გარეშე პრაქტიკულად წარმოუდგენელი იყო.
კრისტიან ერიქსენი
| ტიტულები ტოტენჰემში | 0 |
| ტოტენჰემის შემდეგ | 2, მათ შორის სერია ა |
2010-იანი წლების ტოტენჰემის ერთ-ერთი სიმბოლო, რომელმაც თავისი გუნდი ნანატრ ტიტულამდე ვერ მიიყვანა. ერიქსენმა ნავსი გატეხა მილანის ინტერნაციონალეში გადასვლით, რომლის რიგებში მან სკუდეტო მოიგო. ინგლისში დაბრუნების შემდეგ კი უკვე მანჩესტერის მოთამაშის რანგში კრისტიანმა ლიგის თასიც მოიპოვა.
დანიელი გამთამაშებელი ახლაც იუნაიტედშია და ემზადება ევროპა ლიგის ფინალისთვის, სადაც მისი გუნდის მოწინააღმდეგე სწორედ ჰოტსპური იქნება. ვნახოთ, შეძლებს, თუ არა "წითელი ეშმაკების" ფლეიმეიქერი რიგით მე-3 ტიტულის მოგებას დედაქალაქური კლუბის დატოვების შემდეგ.
ჰარი კეინი
| ტიტულები ტოტენჰემში | 0 |
| ტოტენჰემის შემდეგ | 1, ბუნდესლიგა |
დიახ, კეინის პოსტ-ტოტენჰემური კარიერა ჯერჯერობით არ არის ისეთი ნაყოფიერი, როგორიც თუნდაც იგივე ბეილის იყო, თუმცა მის შემთხვევაში ყველაზე მნიშვნელოვანი არის ის, რომ უტიტულობის ნავსი როგორც იქნა გატყდა. პრაქტიკულად მთელი კარიერის ჰოტსპურში გატარების შემდეგ, ჰარი ამჯერად უკვე მიუნხენის ბაიერნის მოთამაშის რანგში გერმანიის ჩემპიონი გახდა.
ლუკა მოდრიჩი
| ტიტულები ტოტენჰემში | 0 |
| ტოტენჰემის შემდეგ | 28, მათ შორის 6-ჯერ ჩემპიონთა ლიგა |
2012 წლის ზაფხულში მორიგი უტიტულო სეზონის შემდეგ, მოდრიჩი ტოტენჰემიდან რეალში გადავიდა. საინტერესოა, რომ ლა ლიგის პირველი წრის დასრულების შემდეგ, ესპანურმა პრესამ ლუკას ტრანსფერი სეზონის პირველი ნახევრის ყველაზე წარუმატებელ გარიგებად აღიარა.
რა მოცემულობა გვაქვს 2025 წლისთვის? ხორვატი გამთამაშებელი 28 ჯილდოთი მადრიდელთა ისტორიაში ყველაზე ტიტულოვანი ფეხბურთელია. ეს ყველაფერი იმის გათვალისწინებით, რომ "სამეფო კლუბის" კაპიტანს 27 წლამდე ევროპის ტოპ 5 ლიგაში არაფერი ჰქონდა მოგებული.
ტედი შერინგემი
| ტიტულები ტოტენჰემში | 0 |
| ტოტენჰემის შემდეგ | 7, მათ შორის 3-ჯერ პრემიერ ლიგა და ტრებლი |
შერინგემი ტოტენჰემის შემადგენლობაში ბრწყინავდა 1990-იანი წლების პირველ ნახევარში, თუმცა მისი კარიერა უტიტულობას ეწირებოდა. სიტუაცია შეიცვალა მას შემდეგ, რაც ტედი ჰოტსპურიდან გადავიდა მანჩესტერში, რომლის რიგებში მან მოიგო 7 ტიტული, მათ შორის ტრებლი, 1999 წელს.
სწორედ ინგლისელი თავდამსხმელი იყო იმ ლეგენდარული ქამბექის ერთ-ერთი მთავარი შემოქმედი, რომელიც იუნაიტედმა ბაიერნთან მოახდინა. ტიტულებით სავსე პერიოდის შემდეგ, "წითელი ეშმაკების" ფორვარდი დაბრუნდა ლონდონში, მაგრამ ჯილდოების მოგება მან ვერც მე-2 ცდაზე შეძლო.
გრემ სუნესი
| ტიტულები ტოტენჰემში | 0 |
| ტოტენჰემის შემდეგ | 22, მათ შორის 5-ჯერ ინგლისის ჩემპიონატი, 3-ჯერ ჩემპიონთა თასი |
1970-იანი წლების ბოლოსა და 1980-იანი წლების ლეგენდარული ლივერპულის კაპიტანი, რომლის საფეხბურთო კარიერა ტოტენჰემში იწყებოდა. ჰოტსპურის მთავარ გუნდში 1 შეხვედრის ჩატარების შემდეგ, სუნესმა მერსისაიდელთა ისტორიაში უბრალოდ წარუშლელი კვალი დატოვა.
კაილ უოკერი
| ტიტულები ტოტენჰემში | 0 |
| ტოტენჰემის შემდეგ | 17, მათ შორის 6-ჯერ პრემიერ ლიგა და ტრებლი |
პეპ გუარდიოლამ დაწერა პრემიერ ლიგის თანამედროვე ისტორია, როდესაც შვიდ წელიწადში ტიტულს ექვსჯერ დაეუფლა. მის ერთგულ ჯარისკაცად რჩებოდა უოკერი, რომელმაც ესპანელ ტაქტიკოსთან ერთად, 17 ტიტული მოიგო. ყველაფერი კი იწყებოდა ტოტენჰემში, სადაც კაილმა უბრალოდ არ იცოდა, თუ რას ნიშნავდა ჩემპიონობა.
ასევე გამოსარჩევია: კევინ-პრინც ბოატენგი, ერიკ დაიერი, ფრედერიკ კანუტე, ერიკ ლამელა, პაულინიო ჟუნიორი, კირან ტრიპიე, კრის უადლი.
