წლის აღმოჩენები, ტოპ 10 მოთამაშე და შეფასებები - რა მოხდა ეროვნულ ლიგაში 2024 წელს?

მომდევნო წლის ევროტურნირებზე საქართველოს სახელს ჩემპიონთა ლიგაზე იბერია, კონფერენს ლიგაზე კი ტორპედო, დილა და სპაერი წარადგენენ.

წლის გამორჩეული მოთამაშეები, მწვრთნელების და ფედერაციის წარმომადგენლების კომენტარები, წლის აღმოჩენები და სხვა - გთავაზობთ ეროვნული ლიგის შეჯამებას.

სასიხარულოა, რომ ეროვნული ლიგის წლევანდელ სეზონში ბევრი კარგი ლეგიონერი ვიხილეთ. ტორპედოს ნორვეგიელი ფორვარდი ბიორნ იონსენი ჩემპიონატის ბომბარდირი 23 გოლით გახდა, მეორე ადგილი დილას შემტევმა ტაირელ ვოუტერმა დაიკავა. მათ გარდა, ბრწყინვალე სეზონი ჰქონდა გაგრას და ტორპედოს მეკარეებს ოლექსანდრ ვორობეისა და ფილიპ კლიაიჩს. ასევე, ტორპედოს შემტევს ფელიპე პირესს, რომელიც 10 საგოლე გადაცემით ჩემპიონატის საუკეთესო ასისტენტი გახდა. ასევე, იბერიას ფორვარდი შეიკნე სილა. ის წარმატებული სეზონის შემდეგ, კარიერას მაკაბიში გააგრძელებს. ვერ გეტყვით, რამდენად დადებითია, თუმცა ფაქტია, წლევანდელ სეზონში ყველა გუნდი, ასე თუ ისე, თანაბარი დონის იყო და ნებისმიერ გუნდს ერთამენთთან 3 ქულის მოპოვება შეეძლო, იქნება ეს აუტსაიდერი, თუ ფავორიტი და ხშირად ასეც ხდებოდა ხოლმე. სასიხარულოა ჩემპიონატის საუკეთესო ფეხბურთელის, გიორგი კოხრეიძის პერფორმანსი. კოხრეიძე წლების წინ ერთ-ერთ გამორჩეულ ტალანტად ითვლებოდა, თუმცა ტრავმების გამო მისი კარიერა უკან მიდიოდა. კოხრე დაბრუნდა და ამ სეზონში 16 გოლითა და 6 საგოლე გადაცემით გამოირჩა.

"მინდა წარმატებები ვუსურვო ყველა ქართულ კლუბს ევროტურნირებზე. 2024 წელი ქართული ფეხბურთისთვის გამორჩეული იყო. ის, რაც გვაკლია ევროტურნირებზე ქართული გუნდის თამაშია და იმედი მაქვს, ამ მხრივ 2025 წელი წარმატებული იქნება. დადებითი ისაა, რომ საკმაოდ კონკურენტუნარიანი ჩემპიონატი იყო და ბოლო ტურამდე ყველა გუნდი იბრძოდა. იქიდან გამომდინარე, რომ ეროვნული ლიგის ყოველი წელი საინტერესოა, ფორმატის ცვლილების საჭიროებას ვერ ვხედავ. ჩვენი მიზანია, ლიგა უფრო მრავალფეროვანი გახდეს. სიახლე ის არის, რომ მომავალი წლიდან ეროვნული ლიგა 2-ის კლუბებშიც სავალდებულო იქნება, ყველა მწვრთნელს PRO ლიცენზია ჰქონდეს, რაც ჩვენი ჩემპიონატის განვითარებისკენ კიდევ ერთი წინგადადგმული ნაბიჯია."

2024 წლის ეროვნული ლიგის მთავარი აღმოჩენა დინამო თბილისის ახალგაზრდა თავდამსხმელი ვახტანგ სალიაა. რამდენიმე თვის წინ, ქართული ფეხბურთისთვის წლის ერთ-ერთი ხმაურიანი ტრანსფერი განხორციელდა და სალია დინამოდან პრემიერ ლიგის წარმომადგენელ ნიუკასლში გადავიდა. მასთან ერთად, წლის აღმოჩენა საბა ხარებაშვილია. 16 წლის ფეხბურთელს დინამო თბილისში გამორჩეული სეზონი ჰქონდა და უკვე მოექცა ევროპული გრანდების ინტერესთა სფეროში. ასევე, გამოვარჩიოთ ლუკა ხარატიშვილი. საქართველოს 21-წლამდე ნაკრების მეკარემ ახალგაზრდულ ნაკრებში ჩატარებული წარმატებული მატჩების შემდეგ, თავი ეროვნულ ლიგაშიც გამოიჩინა და დაგვარწმუნა, რომ დღესდღეობით, ამ პოზიციაზე ბევრი კარგი მეკარე გვყავს. გამოვარჩევდით ლუკა ხორხელს. სამგურალის ნახევარმცველი უკვე წლებია ეროვნულ ლიგაში თამაშობს, თუმცა თავისი შესაძლებლობები წელს ყველაზე კარგად გამოავლინა - 11 გოლი და 6 საგოლე გადაცემა.

ლევან კორღალიძე (იბერიას მთავარი მწვრთნელი) LaGazzetta.ge-სთან: "ვულოცავ ყველას ამ ჩემპიონობას. აქამდე მოსასვლელად დიდი სამუშაო იქნა გაწეული. გულშემატკივარს ვპირდებით, რომ როგორც მთელი ეს სეზონი ვიბრძოდით, მომავალშიც ასე იქნება. ყველაფერს მაქსიმალურად გავაკეთებთ, რათა ევროტურნირებზე საქართველო ვასახელოთ. მივაღწიოთ და გავაკეთოთ ის, რასაც ქართველი ხალხი დიდი ხანია ელოდება."

გიორგი კოხრეიძე (იბერიას კაპიტანი) LaGazzetta.ge-სთან: "საქართველოს ჩემპიონი მეორედ გავხდი და ეს ენით აღუწერელი ემოციაა. ჩემპიონობა გუნდში მყოფი ყველა ადამიანის დამსახურებაა. კარგი თამაშები ვაჩვენეთ და ჩემპიონობა დავიმსახურეთ. რაც შეეხება ჩემს თამაშს, ერთ-ერთი საუკეთესო სეზონი მქონდა და ამაში გუნდიც დამეხმარა, რისთვისაც მადლობას ვუხდი".

ხაზი უნდა გავუსვათ იმას, რომ ეროვნული ლიგის წლევანდელ სეზონში უამრავი უცხოელი ფეხბურთელი თამაშობდა. თუ წინა წლებში საშუალო დონის ქართველი ფეხბურთელები საქართველოს ჩემპიონატის სხვადასხვა გუნდში თამაშობდნენ და ბევრ დასამახსოვრებელ მომენტს გვჩუქნიდნენ, დღესდღეობით, ყველა ასეთი ფეხბურთელი ყაზახეთის, უზბეკეთისა თუ სხვა არასაფეხბურთო ქვეყნის ჩემპიონატებში წავიდა. ამაზე, პირველ რიგში, ქართულმა კლუბებმა უნდა იზრუნონ, რათა თავიანთი გუნდის ლიდერები შეინარჩუნონ, სათანადო პირობები შეუქმნან მათ და ამ ქვეყნებში წასვლის სურვილი აღარ ჰქონდეთ. სამწუხაროა, რომ ბოლო წლების 2 გამორჩეული გუნდი "დინამო თბილისი" და "დინამო ბათუმი" ევროტურნირების გარეშე დარჩა, წელს მათ განსხვავებული პოლიტიკა ჰქონდათ. იგრძნობოდა ისიც, რომ 2024 წელს საქართველოს ნაკრების ისტორიულმა წარმატებამ ყველაფერი გადაფარა და საქართველოს ჩემპიონატს ისეთი დიდი ყურადღება აღარ ექცეოდა, როგორც აქამდე. იქნებოდა ეს ყურებადობა თუ გაშუქება...და მთავარი უარყოფითი ფაქტი - 2024 წელსაც ევროტურნირებზე ვერცერთი ქართული კლუბი ვერ გავიდა.

როგორც სფფ-ის ხელმძღვანელმა დავით მუჯირმა ჩვენთან ინტერვიუში აღნიშნა, 2025 წელს რომელიმე ქართული კლუბის ევროტურნირებზე გასვლას ელის და ჩვენი მოლოდინიც იდენტურია. სპაერი, რომელიც სიურპრიზების გაკეთებას კონფერენს ლიგაზეც გვპირდება, დილა, რომელიც ყოველ წელს სტაბილურად კარგად თამაშობს, ჩემპიონი იბერია, რომელიც მომავალი სეზონისთვის ლიდერების შენარჩუნებასა და ახალი მოთამაშეების დამატებას გეგმავს და ტორპედო, რომელიც მაღალი დონის ლეგიონერების ჩამოყვანას და კვალიფიციური მწვრთნელის დანიშვნას აპირებს. ქართული გუნდების მზადებასა და ყველა სიახლეს LaGazzetta.ge ყოველდღიურად მოგაწვდით.