დვალიშვილისა და ო'მალის განვლილი გზა
დვალიშვილი UFC-ში 2017 წლიდან გამოდის - ორი მარცხით დაწყებული გზა, შვიდი წლის შემდეგ, როგორც იქნა საჩემპიონო ბრძოლად დაგვირგვინდა. საჩემპიონო ქამრისკენ მიმავალ გზაზე ქართველმა მებრძოლმა სხვადასხვა დროს მოუგო ჟოზე ალდოს, ჰენრი სეხუდოს, პიოტრ იანს, მარლონ მორაესსა და სხვებს.
როგორც ვხედავთ, მერაბს UFC-ის ჩემპიონების დამარცხების პრობლემა არასდროს ჰქონია. მისი სტატისტიკა მსოფლიოს ყველაზე პოპულარულ ორგანიზაციაში ასეთია: 12 ჩხუბი, 10 მოგება და 2 წაგება. აღსანიშნავია ის ფაქტი, რომ თავისი 10 გამარჯვება "მანქანამ" ზედიზედ მოიპოვა. მისი აღმავლობის გზაზე სუპერმსუბუქმა დივიზიონმა, არც მეტი არც ნაკლები, 5 ჩემპიონი გამოიცვალა.
33 წლის მებრძოლის დიდების წუთი, შესაძლოა, უფრო ადრეც დამდგარიყო, რომ არა ალჯამეინ სტერლინგის ფაქტორი. როგორც ვიცით, ისინი მეგობრები არიან, დვალიშვილს კი ახლობელ ადამიანთან ჩხუბის გამართვა არ სურდა. მას აღნიშნული მიდგომის გამო ბევრიც აკრიტიკებდა, მაგალითად დეინა უაიტი.
ამერიკელ ბიზნესმენს არაერთხელ უთქვამს, რომ მეგობრობა ბრძოლის შემდეგაც არის შესაძლებელი და ქართველმა მებრძოლმა აღნიშნული გამოწვევა უნდა მიიღოს. საბოლოოდ ყველაფერი იმით დასრულდა, რომ ამერიკელი მებრძოლი 2 წლის მანძილზე ინარჩუნებდა საჩემპიონო ქამარს, სანამ გასული წლის აგვისტოში მან ო'მალისთან არ წააგო.
15 სექტემბერს გასამართი ბრძოლა გამორჩეულია იმითაც, რომ მერაბი დამარცხებული "ფანკ მასტერის" გამო ამერიკელ ჩემპიონთან შურისძიებას ეცდება. ცნობისთვის, "მანქანა" შონს ჩხუბზე ჯერ კიდევ 2018 წლის შემოდგომაზე იწვევდა, მაგრამ მათი გზები დიდი ხნის მანძილზე არ იკვეთებოდა. როგორც ვხედავთ, "შუგამ" ამ დროის მანძილზე ჩემპიონობა მოასწრო.
29 წლის ჩემპიონის სტატისტიკა UFC-ში ასეთია - 11 ბრძოლა, ცხრა გამარჯვება, ერთი მარცხი, ერთ ბრძოლაში კი მოგებულის ვინაობა არ გამოვლენილა. ის ერთადერთი წაგება ო'მალიმ მარლონ ვერასთან იგემა, 2020 წლის ზაფხულში, მაგრამ 4 წლის შემდეგ, მან რევანში აიღო. მოქმედ ჩემპიონს ზედიზედ 7 ჩხუბის განმავლობაში წაგება არ გამოუცდია.
ორი განსხვავებული სტილი
უხეშად რომ ვთქვათ, 33 წლის მებრძოლისა და ამერიკელი ჩემპიონის დაპირისპირება არის კლასიკური გრეპლერი VS სტრაიკერის ომი. ერთის სტიქია არის ჭიდაობა, მეორის კი - დარტყმები. დვალიშვილი გდებების მაჩვენებლით სუპერმსუბუქი დივიზიონის აბსოლიტური ჩემპიონია, მის ანგარიშზე საერთო ჯამში 66 გდებაა.
ქართველი მებრძოლი ასევე, რეკორდსმენია ერთ ბრძოლაში განხორციელებული გდებების მცდელობებით (49). რაც შეეხება მისი გამარჯვებების პროცენტულობას: 76% შემთხვევაში საქმე მსაჯთა გადაწყვეტილებამდე მისულა, 18% ტექნიკური ნოკაუტი, 6% კი მეტოქის მტკივნეულ ილეთზე დაჭერა. ეს არის მერაბის ზოგადი სტატისტიკა, UFC-მდე ჩატარებული ჩხუბების ჩათვლით.
უშუალოდ მსოფლიოს ყველაზე პოპულარულ ორგანიზაციაში კი "მანქანის" ანგარიშზე არის მხოლოდ ერთი ტექნიკური ნოკაუტი - სამი წლის წინ, მორაესთან.
შონის ძლიერი მხარე კი, როგორც აღვნიშნეთ, არის სტრაიკინგი. მისი დარტყმების სიზუსტე შეადგენს 62%-ს, წუთში კი ის დაახლოებით 7.67 დარტყმას აკეთებს.
"შუგას" გამარჯვებების დიდი ნაწილი, უფრო კონკრეტულად კი 67%, სწორედ ტექნიკურ ნოკაუტს მოჰყვა. 28% შემთხვევაში იყო მსაჯების გადაწყვეტილება, 6% კი "საბმიშენი:. ამის მიუხედავად, სუპერმსუბუქ დივიზიონში ყველაზე მეტი დარტყმა ამ დროისთვის განხორციელებული აქვს არა 29 წლის ჩემპიონს, არამედ დვალიშვილს, უფრო კონკრეტულად კი 1736.
კომენტარები
ქართველი მებრძოლი და ო'მალი წლების განმავლობაში ერთმანეთს ტროლავდნენ, რაც გამოიხატებოდა კომენტარებში, სოციალურ ქსელში განხორციელებულ პოსტებსა და სხვადასხვა სახალისო ვიდეოებში. უშუალოდ ჩხუბის წინ კი მებრძოლებმა დაივიწყეს, თუ რა არის ხუმრობა, პრესკონფერენციაზე სრული სერიოზულობა იყო.
მერაბმა განაცხადა - "სტილს თუ გავითვალისწინებთ, ო'მალი ჩემთვის იდეალური მოწინააღმდეგეა, თუმცა ვიცით, რისი გაკეთება შეუძლია. ბრძოლა ჩემი კარნახით უნდა წარიმაართოს, მაგრამ შონს ძლიერი და სახიფათო დარტყმები აქვს. ერთმა დარტყმამ შეიძლება ყველაფერი შეცვალოს. UFC-ში არ არსებობს მარტივი ბრძოლა, ამიტომ 5-ვე რაუნდის მანძილზე ჭკვიანურად ვიმოქმედებ.
ეს ბრძოლა UFC-ის ტიტულისთვისა და მემკვიდრეობისთვისაა. "შუგამ" თავისი ინტერვიუს დროს ჩემს სამშობლოს პატივი არ სცა, ჩემთვის კი საქართველო ყველაფერია. ბრძოლა იმისთვის დავიწყე, რომ ჩემი ქვეყანა წარმედგინა და როცა ვინმე შენს ოჯახს ან ქვეყანას არ სცემს პატივს, პასუხი უნდა გასცე. მოგება და იმის ჩვენება მსურს, რომ თავმდაბალი უნდა იყო", - განაცხადა "მანქანამ".
ამერიკელმა ჩემპიონმა თავის მხრივ აღნიშნა, რომ 33 წლის მებრძოლი მისთვის უხერხული მოწინააღმდეგეა:
"ის ნამდვილი კარდიოს მანქანაა. დვალიშვილი არასდროს იღლება და მას კარგი გამძლეობა აქვს. ძალიან ნიჭიერიც არის და ამაზე მეტყველებს ის ფაქტი, რომ მან ზედიზედ 10 ჩხუბი მოიგო.
მერაბი ძალიან, ძალიან სახიფათო მოწინააღმდეგეა. მინდა გითხრათ, სტერლინგთან მოსამზადებელი კემპი შეიძლება ითქვას, რომ არ გამივლია. უკანასკნელი 6 კვირის მანძილზე ტრავმირებული ვიყავი. ახლა კი საუკეთესო კემპი იყო, რაც კი ოდესმე მქონია. სავარაუდოდ, ალჯოს უნდა, რომ მე ქართველ მებრძოლს მოვუგო.
ეს "ფანკ მასტერს" თავს უკეთ აგრძნობინებს. ვფიქრობ, რომ "მანქანასაც" გაუხარდა, როცა მე ის დავამარცხე, რადგან ასე რომ არ მომხდარიყო, ის ახლაც სატიტულო ჩხუბის მოლოდინში იქნებოდა", - განაცხადა 29 წლის ჩემპიონმა.
სფეროს ეფექტი
როგორც აღვნიშნეთ, UFC-ის 306-ე ღონისძიება, რომელიც წოდებულია Riyadh Season Noche (სახელი არის მექსიკის დამოუკიდებლობის დღისთვის მიძღვნილი რეფერენსი) გაიმართება ლას-ვეგასში, სფეროში. ეს არის უდიდესი გასართობი კომპლექსი, რომელიც გასული წლის სექტემბერში ამუშავდა.
სფეროს გახსნა ჯერ კიდევ 2020 წელს იგეგმებოდა, თუმცა გარკვეული მიზეზების გამო, აღნიშნულმა პროცესმა რამდენიმე წლით გადაიწია. კომპლექსის მშენებლობა საერთო ჯამში 2.3 მილიარდი დოლარი დაჯდა. სფეროს გახსნის შემდეგ, აღნიშნულ არენაზე კონცერტი გაუმართავთ ისეთ ლეგენდარულ ჯგუფებს, როგორებიც არიან U2, Eagles და Phish.
სფერო ასევე არის ფორმულა 1-ის ლას-ვეგასის ტრასის ნაწილი. მიმდინარე წლის ივლისის ბოლოს აქ გაიმართა NHL-ის 2024 წლის დრაფტი, ძალიან მალე კი თავის ივენთს UFC-ის გამართავს. ბრძოლის გამართვის ადგილი ძალიან კარგად მიგვანიშნებს, თუ როგორი მასშტაბის არის დვალიშვილისა და ო'მალის დაპირისპირება.
ვინ იქნება გამარჯვებული?
დიახ, ეს არის კლასიკური გრეპლერი VS სტრაიკერის ბრძოლა, თუმცა ქართველი და ამერიკელი მებრძოლები ერთმანეთისგან კარდინალურად განსხვავდებიან, იმდენად რომ მათ ჩხუბში ნებისმიერი შედეგი მოსალოდნელიa. ობიექტურად, შანსები 50/50-ზეა. მერაბის მხარეს არის ჭიდაობა და ის თავის მთავარ იარაღს ბოლომდე გამოიყენებს.
"მანქანისგან" ალბათ, ნაკლებად სავარაუდო იქნება ტექნიკურ ნოკაუტზე სწორება, ის მიჰყვება თავის სტანდარტულ სცენარს, რაც გულისხმობს მოწინააღმდეგის დაღლას, გდებას და 5 რაუნდის მსაჯების გადაწყვეტილებამდე მიყვანას. შონი კი, პირველ რიგში, ეცდება დარტყმის მიყენებას, როგორც ეს ხშირ შემთხვევაში ხდება.
33 წლის მოწინააღმდეგის ჭიდაობისგან თავის დაღწევის შემთხვევაში, "შუგას" გამარჯვების ალბათობა საკმაოდ მაღალი იქნება, თუმცა მეორე საკითხია, რამდენად შეძლებს ის ამის გაკეთებას. 29 წლის ჩემპიონმა თავად აღნიშნა, რომ დვალიშვილი ნამდვილი კარდიო მონსტრია და მასთან 5 რაუნდის გაძლება ურთულესი იქნება.
