[VIDEO] 4 ქართველი ფეხბურთელი, რომელმაც რეალი დაამარცხა

პარის სენ-ჟერმენმა მსოფლიო საკლუბო ჩემპიონატის ნახევარფინალში გაანადგურა (4:0) რეალ მადრიდი, რითაც აღნიშნული ტურნირის ფინალის საგზური მოიპოვა. ხვიჩა კვარაცხელია კი გახდა რიგით მე-4 ქართველი მოთამაშე, რომელსაც "სამეფო კლუბთან" მოუგია.

სანტიაგო ბერნაბეუს ბინადრების დამარცხება პირველმა მოახერხა კახა კალაძემ, თანაც ორი გუნდის შემადგენლობაში, ჯერ კიევის დინამოსთან ერთად, შემდეგ კი მილანთანაც. ჩემპიონთა ლიგის 1998/99 წლების სეზონი: ჯონ ტოშაკის გუნდი 1/4 ფინალში უკრაინულ კლუბთან აგებს.

საინტერესოა ისიც, რომ "თეთრ-ლურჯებს" თავიანთ ისტორიაში რეალი დამარცხებული ჰყავთ მხოლოდ ერთხელ, სწორედ ზემოაღნიშნულ შეხვედრაში. რაც შეეხება "როსონერისთან" ერთად მოგებას, 2003 წელს, ჩემპიონთა ლიგის ტრიუმფისკენ მიმავალ გზაზე, მე-2 ჯგუფურ ეტაპზე, იტალიურმა კლუბმა ქართველ უკანახაზელთან ერთად სწორედ მადრიდელებს მოუგო.

კიდევ ერთი ქართველი ფეხბურთელი, რომელმაც "სამეფო კლუბი" დაამარცხა ორჯერ, გიორგი მამარდაშვილი არის. პირველად ეს მოხდა 2023 წელს, მეორედ კი გასული სეზონის ბოლოს, თანაც პირდაპირ ბერნაბეუზე! ასეთი საჩუქარი დაუტოვა ლივერპულის მომავალმა გოლკიპერმა ვალენსიას ქომაგებს.

კარიერის ერთ-ერთი საუკეთესო მატჩი ზინედინ ზიდანის გუნდის წინააღმდეგ ჩაატარა დავით ხოჭოლავამ, როდესაც მისმა დონეცკის შახტარმა დი სტეფანოზე მოიგო. ეს ყველაფერი იმის გათვალისწინებით, რომ "მაღაროელები" 42-ე წუთისთვის რეალს 3:0-ს ანადგურებდნენ. მოედანზე ერთ-ერთი საუკეთესო სწორედ ქართველი უკანახაზელი იყო.

ბოლოს კი დავუბრუნდეთ პსჟ-ს ბენეფისს მადრიდელებთან, რომლის ერთ-ერთი აქტიური მონაწილე საქართველოს ნაკრების შვიდიანიც გამოდგა. 24 წლის ვინგერს ჰქონდა რამდენიმე მომენტი, მაგრამ სამწუხაროდ, "სამეფო კლუბის" კარის აღება მან ვერ შეძლო. არავის ეპარება ეჭვი იმაში, რომ ქართველი შემტევი მომავალში ამ დაუმთავრებელ საქმეს ბოლომდე მიიყვანს.

როდესაც ვსაუბრობთ სანტიაგო ბერნაბეუს ბინადრებსა და ქართველებზე, შეუძლებელი გიორგი დემეტრაძის დავიწყება არის. 1999/2000 წლების სეზონი, მე-2 ჯგუფური ეტაპი: ქართველი ფორვარდის აქტიურობის შედეგად ავტოგოლს იტანს ფერნანდო იერო, იქამდე კი ის ვალერი ლობანოვსკის გუნდს 11-მეტრიანსაც ჩუქნის.

ის მატჩი დასრულდა ფრედ, 2:2, დინამოს თავდამსხმელის მიერ მოპოვებული პენალტი კი სერგეი რებროვმა ვერ გამოიყენა. ასეთია ქართველ შემსრულებელთა შესანიშნავი ოთხეული (ხუთეული), რომელმაც რეალი მძიმე მდგომარეობაში ჩააგდო.